Klei Aê Diê Blŭ: Galati 5:22-26
Êlan kliăng: “Tơdah drei dôk hdĭp kyua Yang Mngăt Jăk, brei drei dôk dơ̆ng ƀơ̆ng huă tui si Yang Mngăt Jăk mơh.” (Galati 5:25).
Klei êmuh ksiêm mĭn: Ya klei phung Israel bi mĭn hlăk Khua Yang mtô, pô êdu êun srăng dưi dưn lăn ala? Si Klei Aê Diê Blŭ mblang thâo luă gŭ amâodah êdu êun? Si ngă čiăng dưi dôk hdĭp êdu êun?
Boh blŭ “prätēs” hlăm klei Grek mblang jing “êdu êun” hlăm Galati 5:22, leh anăn mblang “thâo luă gŭ” hlăm Y-Mathiơ 5:5, dua boh blŭ anei mâo klei čiăng lač msĕ sơăi. Hlăk Khua Yang Yêsu mtô lač “Jăk mơak yơh phung thâo luă gŭ, kyuadah diñu srăng dưn ya klei Aê Diê ƀuăn leh” (Y-Mathiơ 5:5) snăn phung Israel ƀuh klei mtô anei amâo mâo sĭt ôh, kyuadah diñu dôk jing hlŭn kơ phung Rôm. Tui si diñu bi mĭn, yua klei ktang leh anăn bruă lĭng kahan, ang ka dưi dưn “ya klei Aê Diê ƀuăn” mơh, hĭn êjai leh, êdu êun amâodah thâo luă gŭ! Năng ai hŏng lu mnuih, hlăm ênuk Khua Yang Yêsu leh anăn wăt ară anei hin msĕ mơh, êdu êun leh anăn thâo luă gŭ knŏng pioh kơ phung awăt êdu, phung dôk hdĭp dlăng si truh mă, phung amâo čiăng tlă anăp hŏng klei lông dlăng dleh dlan ôh, phung blao.
Mklăk hŏng klei bi mĭn msĕ snăn, êdu êun hlăm Klei Aê Diê Blŭ êlâo hĭn jing boh blŭ bi êdah kơ sa čô mnuih thâo ksiêm klei bluh ai krêñ ñu pô. Pô mblang Klei Aê Diê Blŭ William Barclay lač, pô êdu êun amâo ăl ngêñ ôh kyua klei êka ai tiê ñu pô ƀiădah ñu ăl ngêñ hlăk klei jhat luh liê truh kơ pô mkăn. Ti djiêo anăn, êdu êun ăt jing boh blŭ yua čiăng lač kơ sa drei hlô mnơ̆ng arăng bi juăt mƀlum leh, mđăo bi hriăm kăp gưt ngă tui si asăp mtrŭn leh anăn aruăt klei gang. Boh blŭ anei čiăng lač kơ sa čô mâo knuih, thâo bi knăng ñu pô, leh anăn thâo luă gŭ, sa čô mnuih amâo brei ôh klei blŭ, klei ngă ñu bi msoh amâodah bi êka arăng.
Êgao hĭn dơ̆ng, boh blŭ êdu êun hlăm Klei Aê Diê Blŭ kreh yua čiăng bi êdah kơ knuih sa čô thâo luă gŭ leh anăn đăo knang ti anăp Aê Diê. Snăn ti sa nah tĭng, êdu êun jing sa knuih hlue si êda dơ̆ng ti krah drei pô hŏng Khua Yang hĭn kơ êda mgăn, čiăng lač kơ sa čô mnuih êdu êun jing mnuih thâo bi ti gŭ ñu pô ti anăp Aê Diê leh anăn thâo săng kơ klei hdĭp ñu mâo klei Aê Diê pap brei leh anăn bi mlih leh. Blŭ mdê, êdu êun mdê hŏng krưh mgao, leh anăn hlăm klei êdu êun mâo klei luă gŭ sĭt leh anăn kyuanăn lui hĕ jih jang klei mgao.
Snăn, mdê hŏng lu mnuih bi mĭn, êdu êun amâo djŏ ôh jing awăt êdu, amâo mâo ai mĭn jhŏng ktang, alah kba, amâodah blao, ƀiădah jing klei bi mguôp mbĭt mơ̆ng klei mĭn hur har, ai tiê jhŏng leh anăn klei ktang. Êdu êun kbiă hriê mơ̆ng klei thâo săng djŏ kơ Aê Diê, kơ ñu pô, leh anăn mơ̆ng anăn yơh atăt kơ klei thâo dôk dơ̆ng djŏ hŏng phung riêng gah, wăt hŏng pô dôk bi êka ai tiê ñu. Êdu êun jing boh Yang Mngăt Jăk, leh anăn klei jing anak mnuih yang đar amâo dưi mâo ôh knuih kpă ênuah, jăk leh anăn siam anei. Drei knŏng dưi dôk hdĭp thâo luă gŭ, êdu êun tơdah pơ̆ng asei mlei kđeh mbĭt hŏng klei tluh drei pô ti kyâo bi kal, knang kơ Yang Mngăt Jăk čiăng dưi dôk hdĭp leh anăn êbat tui hlue Yang Mngăt Jăk (êlan 24-25).
Si ngă drei dôk hdĭp thâo luă gŭ, êdu êun djŏ tui si klei mblang mơ̆ng Klei Aê Diê Blŭ leh mơ̆ ka?
Ơ Khua Yang, akâo kơ Ih brei kơ kâo grăp hruê dưi msĕ hŏng Ih hĭn, bi êdah knuih jăk siam Ih hŏng klei hdĭp kâo, leh anăn đru boh êdu êun đĭ hriê kơ prŏng ktang hlăm kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 16:23-17:13
Kênh Youtube BHKTHN:
