Klei Aê Diê Blŭ: Klei Mphŭn Dơ̆ng 3:9-19
Êlan kliăng: “Kyuadah hruê ih ƀơ̆ng boh anăn ih srăng djiê sĭt nik” (Klei Mphŭn Dơ̆ng 2:17b)
Klei êmuh ksiêm mĭn: Ya boh jhat mnuih srăng mă tŭ leh ngă soh? Ya ngă knŏng ƀơ̆ng sa asăr boh đuč ƀiădah tŭ hĕ boh jhat ktrŏ msĕ snăn lĕ? Ya klei hriăm drei mâo mơ̆ng klei yăl dliê anei?
Tơdah Aê Diê dưm mnuih hdĭp hlăm war djam Êđen anôk bŏ hŏng klei jăk mơak Ñu mtă kơ gơ̆ snei: “Ih dưi ƀơ̆ng boh jih jang ana kyâo hlăm war djam; ƀiădah đăm ih ƀơ̆ng ôh boh ana kyâo klei thâo kral klei jăk hŏng klei jhat; kyuadah hruê ih ƀơ̆ng boh anăn ih srăng djiê sĭt nik” (Klei Mphŭn Dơ̆ng 2:16-17). Djiê hlăm klei čiăng lač êlam hĭn jing bi ktlah, bi kgăn hĕ. Tơdah ngă soh, klei soh bi kgăn hĕ mnuih hŏng Aê Diê, mnuih hdơ̆ng mnuih, leh anăn mnuih hŏng lăn adiê.
Tal sa, mnuih bi ktlah mơ̆ng Aê Diê, diñu đuĕ dăp tơdah hmư̆ ênai Aê Diê hriê kơ diñu (êlan 10). Hrô kơ klei dôk hlăm klei bi mguôp jăk hŏng Aê Diê, klei soh ngă kơ diñu mâo klei huĭ. Tal dua, bi kgăn mnuih hdơ̆ng mnuih. Tơdah Aê Diê êmuh ih tuôm ƀơ̆ng mơ̆ boh Kâo ghă amâo brei ƀơ̆ng anăn, snăn Y-Ađam bi lĕ kơ H’Êwơ mtam, bi H’Êwơ bi lĕ kơ ala (êlan 12-13). Djŏ mơ̆ anăn yơh jing klei mnuih hlăm jih jang ênuk lŏ wĭt ngă tơdah arăng ktrâo klei soh ñu? Srăng mâo sa čô klam brei klei soh anăn ƀiădah amâo djŏ kâo pô ôh! Tal tlâo, bi kgăn mnuih hŏng lăn adiê. Hlăm êlan 17-19, Aê Diê lač kơ Y-Ađam “lăn mâo klei tăm pah kyua ih,…ih srăng mâo mnơ̆ng ƀơ̆ng huă mơ̆ng lăn hŏng klei suăi.” Tui si djŏ lăn čŏng čiăng brei mă mnơ̆ng ƀơ̆ng huă kơ mnuih, bi ară anei, mnuih srăng mă bruă hŏng klei suăi, leh anăn bruă răng kriê lăn adiê ƀrư̆ hruê ƀrư̆ jing dleh dlan hĭn.
Klei truh leh kơ mnuih amâo djŏ knŏng klei ruah sa mta boh ƀơ̆ng ôh ƀiădadah jing klei ruah êlan. Aê Diê brei kơ mnuih klei mĭn êngiê čiăng ruah klei gưt asăp kơ Ñu leh anăn hdĭp hlăm hdră Ñu mkra leh. Ƀiădah mnuih ruah leh êlan diñu pô, hngah kơ hdră leh anăn kơ klei Aê Diê mtă. Leh anăn kyua klei anăn yơh diñu srăng tŭ klei bi kmhal. Hruê anei ăt msĕ mơh, klei pap brei leh kơ jih jang mnuih, hlei pô đăo kơ Yêsu Krist srăng mâo klei hdĭp hlŏng lar, hlei pô amâo đăo ôh srăng tŭ klei bi kmhal (Y-Yôhan 3:36).
Mơ̆ng klei yăl dliê anei, drei ƀuh tơdah drei ruah êbat tui si êlan drei pô, amâo gưt asăp ôh kơ Khua Yang leh anăn hngah kơ hdră Ñu mkra leh, snăn klei hdĭp mnuih srăng jing knŏng klei hdĭp bŏ hŏng klei dleh dlan knap mñai amâo djŏ klei hdĭp bŏ hŏng klei jăk mơak ôh. Boh jhat mơ̆ng klei soh jhat êdimima, amâo djŏ knŏng hjăn pô ngă soh ôh srăng tŭ klei bi kmhal, ƀiădah bi hmăi wăt kơ gŏ sang, kơ găp djuê, bi hmăi wăt kơ lăn adiê mơh. Ƀiădah tinăn drei ăt ƀuh mơh klei pap Aê Diê. Wăt tơdah mnuih đuĕ dăp ƀiădah Aê Diê ăt duah (êlan 9). Leh anăn yuôm bhăn hĭn jing klei Aê Diê ƀuăn srăng brei kơ lăn ala sa čô Pô Bi Mtlaih (êlan 15).
Tơdah ƀuh boh jhat mơ̆ng klei soh jing jhat êdimima, ya klei drei srăng ngă?
Wah lač: Ơ Khua Yang, dlăng kơ jih jang ya klei klei soh ngă leh kơ mnuih, bi ktlah mnuih mơ̆ng Ih, mnuih hdơ̆ng mnuih leh anăn mnuih mơ̆ng lăn adiê, ai tiê kâo ênguôt snăk. Ƀiădah kâo bi mni kơ Ih Khua Yang, kyuadah Ih amâo lui mnuih rai luč hlăm klei soh ôh. Brei lăn ala anei thâo kral leh anăn mă tŭ klei pap Khua Yang. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Ôsê 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
