Blŭng a 3:9-19
“Dah ih sa sĭt ih gô lôch.” (Blŭng a 2:17b)
Nơ̆r jet tơchĕng pơwao:
– Kon bơngai pŭ iŏk tơdrong kiơ đơ̆ng rŏng kơ pơm yoch?
– Yua kơ kiơ bơ̆n lăng hmă đĕch phĕ sa plei ‘long na pŭ iŏk tơdrong trăp thoi noh?
– Lu bơ̆n pơhrăm iŏk tơdrong kiơ đơ̆ng ‘bai pơhrăm ‘nâu?
Kơplah lê̆ kon bơngai arih lămg pơgar ‘bĕnh kơ hiôk hian, Kră Yang đei bơtho lu sư: “Đơ̆ng noh Kră Yang ‘Bok Kei-Dei pơkă thoi âu: Ih gơh sa mơ̆ng kơ wă dôm lu plei ‘long lăm pơgar, Mă-lei gah tơnơm ‘long băt tơdrong ‘lơ̆ng păng tơdrong kơnê̆, ih ‘nĕ kơ sa hŏ; dah ih sa sĭt ih gô lôch.” (Blŭng a 2:16-17). Lôch wă khan hlôh lăm to sư gô tơklah, pơgăn. Mưh pơm yoch, kon bơngai tơklah đơ̆ng ‘Bok Kei-Dei, tơduă, păng lăm teh đak.
Mă mônh, kon bơngai tơklah đơ̆ng Kră Yang bre sư kơdâu ôn kơplah Kră Yang năm tơ sư (trong 10). Tơplih kơ arih tơ’bưh hiôk chơt hăm Kră Yang tơdrong yoch pơm kơ bre sư hli tơrơ. Mă ‘bar, kon bơngai tơklah dih băl kơplah Kră Yang apinh jet sư hăm trŏ kơ biĕm sa plei ‘long noh ưh, na jơ noh hloi Ađam khan đơ̆ng yă Ewơ athei sư sa, na yă Ewơ khan yua kơ đơ̆ng ‘bih pơhlŭ sư (trong 12-13). Hăm trŏ kơ tơdrong ‘noh mă dôm tơdrong kiơ kon bơngai hlôi bơih mă rim jơhnơr mưh đei tơhlâu tơ’bôh bơ̆n pơm yoch? Athei đei bơngai bu noh pŭ iŏk mălei ưh kơ trŏ kơ inh! Mă pêng, kon bơngai tơklah đơ̆ng tơduă đơ̆ng bơngai ala teh. Lăm trong 17-19, Kră Yang khan kơ Ađam thoi âu “Yua kơ ih chu nơ̆r akăn ih na sa plei ‘long mă Inh khă ưh kơ ăn sa, ‘thoi noh teh gô pŭ hơngiap yua kơ ih,’ lăm chăl arih ih athei chu gleh lap na đei tơmam sa kơ ih lĕch đơ̆ng teh. Teh gô chăt lu jơla păng ‘long bơmrôm, păng ih gô sa tơmam chăt đơ̆ng lăm mir pơgar; Ih athei jang lĕch đak bơuh bơang tơ klĕng ih ‘mơ̆i na đei sa,d ding truh tơ năr ih brŏk tơ teh dơ̆ng, teh mă đêl man ih sơ̆, yua kơ ih đơ̆ng ‘mui teh, ih gô brŏk tơ ‘mui teh.” Trŏ sư lăm teh đak gô tơmam ăn kơ kon bơngai, na dang ei kon bơngai gô jang gleh pơmat ‘mơ̆i na đei sa.
Tơdrong arih kon bơngai ưh kơ sĭ rơih iŏk sa plei ‘long lăp minh tơnơm đĕch ôh, mălei athei rơih iŏk trong yak. Kră Yang ăn kơ kon bơngai rơngei gơh rơih mơ̆ng kơ wă lui gơnang kơ Kră Yang păng arih lăm tơdrong Kră Yang tơdă hơmet. Mălei kon bơngai rơih iŏk trong kiơ̆ kơdih, ưh kơ chu kiơ̆ tơdrong tơdă hơmet păng nơ̆r Kră Yang bơtho. Đơ̆ng tơdrong noh bơih na lu sư gô tơ’bơ̆p tơdrong phak. Dang ei kư̆m thoi noh, tơmam apah ăn đĕch ‘măn kơ đĭ đăng kon bơngai “Bơngai bu lui kơ Kon Sư, bơngai ‘noh sư gô oei hơdai hăm ‘Bok Kei-Dei arih ling lang. Bơngai bu ưh kơ lui yom kơ Kon Sư, bơngai ‘noh sư ưh kơ đei arih ling lang ôh. ‘Bok Kei-Dei hil kơ sư tơpă păng sĭt gô phak sư ning-mônh.” (Yôhan 3:36).
Đơ̆ng tơdrong hơ’mon ‘nâu, lu bơ̆n ‘bôh hơđăl bơih, mưh bơ̆n rơih trong kiơ̆ kơdih, ưh kơ chu Kră Yang păng ưh kơ pơm kiơ̆ tơdrong tơdă hơmet, lei tơdrong arih kon bơngai bơ̆n tơ anăp thoi lĕ anih teh hrĕng kro, na ưh kơ trŏ thoi pơgar Êđen pŭn hiôk. Lĕch đơ̆ng tơdrong pơm yoch krưp dêh, ưh kơ sĭ ‘bơm kơdih bơ̆n đĕch mălei ‘bơm truh tơ hnam dơnŏ, kon pơlei pơla na đơ̆ng noh ‘bơm truh lăm teh đak âu. Mă khan lei ră, bơ̆n ‘bôh ‘Bok Kei-Dei oei ‘mêm mơnat kơ bơ̆n đĕch, mă kon bơngai chă ôn mălei Kră Yang oei krao chă (trong 9). Păng tơdrong ‘lơ̆ng hloh noh nơ̆r Sư pơkă gô ăn ‘Bok Dŏng Pơklaih (trong 15).
Ơ Kră Yang, lăng ‘bôh dôm tơdrong kiơ tơdrong kơnê̆ pơm kơ kon bơngai pơgăn kon bơngai năm tiw Ih, păng tơduă, păng kon bơngai tơ ala teh. Jơhngơ̆m inh sơ’ngon păng ơh dêh. Mălei inh bơnê kơ Ih Kră Yang, Ih ưh hơchăng lê̆ kon bơngai lôch răm lăm tơdrong yoch. Wă kơ kon bơngai lăng ‘bôh păng băt mơn tơdrong ‘mêm Ih, krao khan yua anăn Kră Yang Yêsu Krist, Amen.
Lăng ‘bôh lĕch đơ̆ng tơdrong pơm yoch krưp tơpă, lu bơ̆n tơchĕng bơ̆n kăl kơ pơm tơdrong kiơ?
Đŏk Sơ̆p Hla bơar ‘Bok Kei-Dei lăm pêng sơnăm: Hôsia 1
Kênh Youtube BHKTHN:
