Chivkeeb 3:9-19
Nqe cim:
“Yog koj noj hnub twg, koj yuav tuag hnub ntawd” (Chivkeeb 2:17b)
Lus nug xav:
– Tibneeg yuav ris lub txim txhaum twg tom qab uas txhaum?
– Vim li cas noj lub txiv xwb raug lub txim hnyav ua luaj li ntawd?
– Peb kawm tau zaj kawm li cas dhau zaj no?
Thaum cia neeg nyob hauv lub Vaj Edees kaj siab, tus Tswv hais rau nkawd tias: “Kuv pub koj noj txhua yam txiv ntoo uas nyob hauv lub vaj no, tiamsis kuv tsis pub koj noj tsob txiv ntoo uas ua rau paub qhov phem thiab qhov zoo xwb. Koj yuav tsum tsis txhob noj tsob ntoo ntawd cov txiv; yog koj noj hnub twg, koj yuav tuag hnub ntawd” (Chivkeeb 2:16-17). Tuag hais rau seem lub ntsiab tob ces yog cais tawm, nrug deb. Thaum ua txhaum, tibneeg nrug deb Vajtswv, sib nrug, thiab nrug tej uas tus Tswv tsim.
Tim ib, tibneeg nrug deb Vajtswv. Nkawd khiav mus nkaum thaum tus Tswv los (nqe 10). Twb tsimnyog nyob hauv txojkev sib raug zoo nrog Vajtswv, kev txhaum ua rau nkawd muaj kev txhawj. Tim ob, tibneeg ib leeg nrug ib leeg. Thaum tus Tswv nug puas yog nkawd noj tsob txiv txwv, Adas txawm liam txim rau Evas, hos Evas liam txim rau nab (nqe 12-13). Puas yog qhov ntawd yog tej uas tibneeg ntsib raug txhua tiam los puavleej ua li thaum ua txhaum? Yuav tsum muaj ib tug ris qhov ntawd tsis yog kuv! Tim peb, tibneeg nrug tej uas Vajtswv tsim. Hauv nqe 17-19, tus Tswv qhia rau Adas paub tias “Vim koj tau ua li ntawd av thiaj raug foom tsis zoo. Koj yuav tau siv zog khwv mus tas simneej, koj thiaj tau noj tau haus.” Tej uas Vajtswv tsim los ua zaub ua mov rau tibneeg noj, tiamsis zaum no tibneeg yuav tsum siv zog khwv, thiab tswj kav tej ntawd yim hnub yim nyuaj tuaj.
Tibneeg qhov teebmeem tsis yog xaiv noj ib tsob txiv ntoo tiamsis yog xaiv txojkev taug. Tus Tswv pub rau tibneeg muaj kev ywjpheej xaiv ntseeg Nws thiab ua neej nyob hauv Vajtswv txojkev npaj. Tiamsis tibneeg xaiv taug txojkev ua raws siab nyiam, tsis lees yuavVajtswv txojkev npaj thiab tej lus qhia. Thiab qhov ua li ntawd ua rau nkawd raug txim. Nimno kuj ib yam nkaus, pob khoom pub dawb pub rau tagnrho txhua tus neeg, yog leejtwg ntseeg tus Tswv ces yuav tau txojsia ntev dhawv mus ibtxhis, tus uas tsis ntseeg yuav raug txim (Yauhas 3:36).
Los ntawm zaj lus no, peb pom hais tias thaum xaiv taug txojkev ua raws siab nyiam, tsis mloog Vajtswv lus thiab tsis lees yuav Nws txojkev npaj, ces tibneeg lub neej tom ntej ces yog lub tiaj nras qhuav nkig nkuav tsis yog lub vaj muaj kev kaj siab lawm. Nqi zog ntawm txojkev txhaum txaus ntshai heev, tsis yog raug tus kheej xwb tiamsis raug tagnrho tsevneeg, tebchaws, thiab tej uas tus Tswv tsim. Txawm yog li ntawd los, qhov ntawd ua rau peb pom Vajtswv txojkev hlub. Txawm yog tibneeg khiav nkaum los tus Tswv tseem mus nrhiav (nqe 9). Thiab qhov zoo kawg nkaus yog Vajtswv coglus tso tus Cawmseej los pab (nqe 15).
Thov Vajtswv,
Vajtswv, ntsia rau tej kev txhaum raug tibneeg ntiajteb, thaiv txojkev nyuam yaus los cuag Koj, sib raug zoo thiab nrog tej uas tus Tswv tsim, nyuam yaus lub siab mob thiab tu siab heev. Tiamsis ua Vajtswv tsaug vim muaj Nws tsis tso cov neeg tuag hauv kev txhaum tseg. Thov kom tibneeg ntiajteb paub txog thiab tau txais tus Tswv txojkev hlub. Nyuam yaus tuav Tswv Yexus lub npe thov, Amees.
Ntsia pom nqi zog txaus ntshai ntawm kev txhaum, peb xav tias peb yuav ua li cas?
Nyeem Vajluskub hauv peb lub xyoo: Hauxeyas 1
Kênh Youtube BHKTHN:
