Klei Aê Diê Blŭ: Y-Đaniel 6:21-28
Êlan kliăng: “Kâo brei klei mtă tar ƀar anôk hlăm ƀuôn ala mtao kâo brei mnuih ktư̆ yơ̆ng leh anăn huĭ ti anăp Aê Diê Y-Đaniel, Kyuadah Ñu jing Aê Diê hdĭp, Ñu dôk hlŏng lar; ƀuôn ala mtao Ñu amâo thâo rai tuč ôh, leh anăn klei Ñu kiă kriê srăng dôk hlŏng lar.” (Y-Đaniel 6:26).
Klei êmuh ksiêm mĭn: Si mtao Đarius hưn kơ Aê Diê leh anăn si ñu lač kơ knuih Aê Diê jing? Mơ̆ng anôk mtao mâo klei thâo săng kơ Aê Diê msĕ snăn? Ya klei drei hriăm kơ ai tiê čiăng hưn mdah Khua Yang kơ phung mâo anôk bruă prŏng hĭn leh anăn drŏng sah hĭn?
Leh ƀuh ti anăp ală mta klei Y-Đaniel mâo klei răng mgang yuôm bhăn hlăm war êmông gu, mtao Đarius brei sa klei mtă. Hlăm klei mtă anăn, mtao lač kơ knuih “hdĭp”, “dôk hlŏng lar” Aê Diê, kơ ƀuôn ala mtao Ñu leh anăn klei Ñu kiă kriê (êlan 26). Mtao lač Aê Diê jing Pô “dŏng leh anăn bi mtlaih”, Pô “ngă klei bi knăl leh anăn klei yuôm bhăn” (êlan 27). Jih klei mtao Đarius thâo kơ Khua Yang jing klă djŏ sơăi, ƀiădah jing klei drei khăng hmư̆ mơ̆ng ƀăng êgei phung đăo đuč. Klei mơak êdimi hlăm klei mtă anăn jing mtao mă yua jih jang klei djŏ anăn dưm jing mta phŭn kơ klei mtă brei phung ƀuôn sang dôk tar ƀar anôk hlăm ƀuôn ala mtao ñu huĭ mpŭ kơ Aê Diê (êlan 26).
Djŏ mơ̆ ară anei kơh mtao Đarius thâo kơ Aê Diê? Hơăi, amâo djŏ ôh! Êlâo kơ arăng hwiê Y-Đaniel hlăm war êmông gu, mtao lač leh: “Brei Aê Diê ih, Pô ih mă bruă nanao, bi mtlaih ih!” (êlan 16). Si mgi, mtao kgŭ ưm aguah ruăt nao ti mbah ƀăng êmông gu leh anăn iêu: “Ơ Y-Đaniel, dĭng buăl Aê Diê hdĭp, Aê Diê ih, pô ih mă bruă nanao, dưi bi mtlaih ih mơ̆ng êmông gu mơ̆?” (êlan 20). Sĭt nik Y-Đaniel tuôm hưn mdah leh Khua Yang kơ mtao anei hŏng klei gĭr leh anăn jăk găl yơh kyuanăn mtao thâo săng klă djŏ snăk kơ Khua Yang, wăt tơdah mtao knŏng lač “Aê Diê Y-Đaniel” (êlan 26) ñu ka lač Aê Diê kơ ñu pô dê ôh. Ƀiădah, bruă klam kơ sa čô pô hưn bi sĭt jing hưn mdah Khua Yang kơ pô mkăn, bi bruă “Aê Diê Y-Đaniel” lŏ jing “Aê Diê mtao Đarius” amâodah hơăi jing tui si klei mtao pô wĭt lač yơh amâo djŏ bruă klam Y-Đaniel ôh.
Y-Đaniel ngă djŏ leh anăn ngă jăk leh bruă klam jao kơ ñu, jing klei ñu sĭt suôr hưn bi sĭt Aê Diê kơ mtao, pô mâo anôk bruă dlông hĭn leh anăn mdrŏng sah hĭn kơ ñu. Lu blư̆ drei ăt dôk huĭ amâo jhŏng hưn Khua Yang kơ phung mâo anôk bruă dlông hĭn leh anăn mdrŏng sah hĭn kơ drei ôh. Tui hlue rup bi hmô Y-Đaniel, akâo kơ Khua Yang brei drei jhŏng hưn Anăn Ñu kơ jih jang mnuih Aê Diê mdưm jŭm găn drei kyuadah diñu ăt čiăng mâo Khua Yang msĕ si drei mơh. Brei drei wah lač čiăng kơ Aê Diê drei srăng hnưm jing Aê Diê kơ jih jang mnuih.
Si ngă drei ƀuh dleh mơ̆ hưn Khua Yang kơ phung mâo klei tŭ jing hĭn, mâo anôk bruă dlông hĭn kơ drei? Ya klei mtrŭt ih ngă mơ̆ng rup bi hmô Y-Đaniel?
Wah lač: Ơ Khua Yang, bi mni kơ Ih kyua Y-Đaniel brei leh rup bi hmô hŏng knhuah hdĭp ñu leh anăn hưn Aê Diê kơ phung mâo anôk bruă dlông leh anăn tŭ jing hĭn kơ ñu. Akâo kơ Khua Yang đru kâo kăp hưn mâo Khua Yang dôk mbĭt kơ jih jang mnuih Aê Diê mdưm dôk jŭm dar kâo, kyuadah diñu ăt čiăng mâo Khua Yang mơh.
Dlăng Klei Aê Diê Blŭ hlăm tlâo thŭn: Y-Yôp 16:1-22; 17:1-16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
