Daniyees 6:21-28
Nqe cim:
“Kuv hais rau sawvdaws paub haistias txhua tus pejxeem uas kuv kav yuav tsum hwm thiab saib taus Daniyees tus Vajtswv. “Nws yog tus Vajtswv uas muaj sia nyob, thiab nws yuav kav mus ibtxhis. Nws lub tebchaws yuav tsis raug kev puastsuaj, thiab nws yuav muaj hwjchim nyob mus ibtxhis” (Daniyees 6:26).
Lus nug rau sawvdaws xav:
- Vajntxwv Dali-us lees paub Vajtswv yog tus zoo li cas, thiab hais txog Vajtswv yam dab tsi?
- Los ntawm dab tsi vajntxwv thiaj paub Vajtswv zoo npaum ntawd?
- Peb kawm tau yam dab tsi txog kev qhia txog Vajtswv rau tej neeg qib siab thiab neeg nplua nuj dua yus?
Ib tsoom mloog txhua tus,
Thaum vajntxwv Dali-us pom Vajtswv cawm tau Daniyees tsis raug tsov ntxhuav tom, vajntxwv tau tawm tsab ntawv tseb rau pejxeem sawvdaws. Hauv tsab ntawv tseb tawm vajntxwv hais txog Vajtswv yog tus:“muaj sia nyob”, thiab yuav kav tebchaws mus“ ibtxhis” (nqe 26). Vajntxwv hais tias Vajtswv yog tus “cawm thiab pab tau neeg dim”, Vajtswv yog tus “ua tej txujci tseemceeb” (nqe 27). Tej yam uas vajntxwv Dali-us paub txog Vajtswv yeej yog yam muaj tseeb uas peb tsuas hnov cov ntseeg tham txog tej ntawd xwb. Qhov zoo ntxiv thiab yog, vajntxwv siv tej yam muaj tseeb los ua lus tseb tawm mus rau nws tej pejxeem thoob tebchaws yog kom txhua tus yuav tsum saib taus Vajtswv ( nqe 26).
Puas yog thaum no vajntxwv Dali-us mam paub txog Vajtswv? Tsis yog li! Ua ntej uas Daniyees raug muab pov hauv qhov tsov ntxhuav, vajntxwv twb hais tias: “thov koj tus Vajtswv uas koj muab siab npuab pab cawm koj.” (nqe 16). Hnub tom qab uas vajntxwv tuaj txog ntawm qhov tsov ntxhuav nws hais tias: “Daniyees uas yog Vajtswv tus muaj sia nyob tus tubtxib, koj tus Vajtswv uas koj muab siab npuab puas pab tau koj dim ntawm cov tsov ntxhuav los tsis tau?” (nqe 20). Paub tseeb hais tias, Daniyees yeej muaj lub siab ua zoo qhia rau Dali-us paub txog Vajtswv, vajntxwv thiaj paub meej Vajtswv li ntawd. Tiamsis vajntxwv tsuas hais tias, “Daniyees tus Vajtswv” xwb (nqe 26) tsis tau hais tias yog nws tus Vajtswv. Txawm li ntawd los, cov neeg ua tim khawv tes haujlwm tsuas yog qhia txog tus Tswv pub rau lwm tus xwb, tshuav qhov uas Daniyees tus Vajtswv puas yog Dali-us tus Vajtswv ces yog nyob txij ntawm vajntxwv kev xaiv xwb, tsis yog Daniyees li haujlwm.
Daniyees ua zoo thiab ua tiav teg haujlwm uas ua timkhawv txog Vajtswv rau vajntxwv, tus uas muaj fwjchim kav nws. Ntau zaug peb coob tug tseem tsis kam hais txog tus Tswv rau tej neeg uas nyob qib siab lossis tej neeg nplua nuj. Xyaum raws Daniyees tus qauv, thov Vajtswv pab kom peb muaj lub siab tawv qhia txog Vajtswv rau tej neeg ib ncig ntawm peb. Cia li thov Vajtswv pab kom peb tus Vajtswv kuj yog sawvdaws tus Vajtswv.
Thov Vajtswv,
Tus Tswv, ua Koj tsaug uas Daniyees tau ua qauv zoo rau nyuam yaus xyaum ntawm kev ua neej ntseeg thiab qhia txog Koj tej neeg sawvdaws. Thov Koj pab nyuam yaus npaj nroos qhia rau txhua tus paub txog Vajtswv Koj yog tus Tswv uas muaj sia zees nyob rau tej neeg ib ncig. Amees.
Ib tsoom mloog uas hmov thiab tshua,
Peb puas hnov khwv qhia txog Vajtswv rau tej neeg muaj meej mom siab? Daniyees lub neej puas muaj yam txhawb tau peb lub zog?
Nyeem Vajluskub hauv peb lub xyoo: Yauj 16:1-17:16
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
