Pajlug 20:23; Mathais 5:20
Nqe cim zaj kawm:
“Tus TSWV ntxub cov neeg uas muab rab teev ntxo coj los luj ntxo luag tug” (Pajlug 20:23).
Lus nug rau sawvdaws xav:
– Rab teev ntxo luag tug piv txog yam dab tsi?
– Vim li cas Tswv Yexus xav kom peb yuavtsum ua neeg kom ncaj tshaj cov xibhwb qhia Vajtswv txoj kevcai thiab cov Falixais?
– Koj cheemtsum ua neeg ncaj thiab ua zoo kawg nkaus raws tus qauv twg?
Vajtswv xav kom Nws cov menyuam yuavtsum ua neeg ncaj vim Nws yog Tug Uas Ncaj Ncees. “Rab teev ntxo luag tug” nws tsis yog rab teev txwm li sawvdaws ib txwm siv, tiamsis yog rab teev ua loj lawm lossis me lawm uas hu ua “rab teev cuav”, ntawd yog piv txwv txog tus yam ntxwv dag. Tus Tswv tsis txaus siab rau txoj kev dag ntawd li (Pajlug 20:10). Lo lus “tus Tswv ntxub” yog qhia txog tus Tswv tsis txaus siab rau txoj kev dag, ntxo luag tug. Tus neeg txawj ntse tshawb fawb kev to taub txog Vajtswv Meir Leibush Malbin qhia rau peb paub nqe Pajlug no lub ntsiab meej hais tias: “Yog koj raug luag dag hauv txoj kev ua lag luam dua lawm, tsis txhob xav tswvyim rov dag pauj, vim qhov uas rov dag pauj tsis yog kev ncaj ncees. Tej uas peb ua dag lwm tus, lwm tus dag peb puavleej yog yam uas Vajtswv ntxub ntxaug kawg li”.
Ua neej ncaj ncees tsis yog yam uas peb ua tshwm qhia qhua sab nraum xwb, tiamsis yuavtsum yog ua hauv lub siab uas paub hwm Vajtswv tawm tuaj. Txawm yog lwm tus ua tsis ncaj rau peb los peb tsis txhob ua pauj vim peb yog Vajtswv menyuam. Peb yuavtsum ua neeg ncaj ncees rau txhua fab tsis hais hauv kev ntseeg, hauv qhov chaw ua haujlwm, hauv tej tsev kawm ntawv huv tibsi… Tsis tas li ntawd xwb, txoj kev ua neej ncaj ncees txuas tau phoojywg zoo nrog lwm tus thiab ua tau qauv zoo rau yus lub tsev neeg, menyuam, kwvtij, neej tsa sawvdaws xyaum thiab.
Nyob rau hauv phau Vajluskub tshiab, Tswv Yexus qhia “Kuv qhia rau nej hais tias, yog nej tsis ua ncaj dua cov xibhwb uas qhia Vajtswv txoj Kevcai thiab cov Falixais, ces nej yuav tsis tau mus nyob saum ntuj Ceebtsheej” (Mathais 5:20). Tswv Yexus qhia ua neeg ncaj yog pib los ntawm qhov uas paub hwm Vajtswv thiab hlub tibneeg tiag tiag. Cov xibhwb uas qhia Vajtswv txoj Kevcai thiab cov Falixais yog cov uas ua neej raws li txoj kevcai xwb. Vajtswv tsis yog xav kom peb ua neej raws li txoj kevcai ib yam li lawv xwb tiamsis yuavtsum heev tshaj qhov ntawd. Txhua yam kev xav, txhua tes haujlwm uas peb ua yuavtsum yog tshwm tawm hauv lub siab uas paub hwm Vajtswv thiab hlub tibneeg. Muaj qee yam uas peb ua yeej tsis txhaum txoj kevcai lossis nomtswv txoj kevcai, tiamsis ntawm Vajtswv lub xub ntiag yog yam ua tsis ncaj ncees, ces peb yeej tsis muaj cai yuav ua thiab. Tswv Yexus zaj lus qhuab qhia saum roob, qhia kom peb yuavtsum ua neeg zoo tshaj tej tej neeg nyob rau hauv lub ntiajteb no. Tibneeg ntiajteb qhia hais tias “Hlub nej cov kwvtij thiab ntxub nej cov yeebncuab”. Tiamsis Tswv Yexus qhia rau peb hais tias: “Hlub nej cov yeebncuab thiab thov Vajtswv pab rau cov uas tsimtxom nej… nej yuav tsum ua zoo kawg nkaus ib yam li nej Leej Txiv tus uas nyob saum ntuj ceebtsheej, nws yog tus zoo kawg nkaus.” (Mathais 5:43-48). Peb txhua tus yog Vajtswv menyuam peb yuavtsum ua neeg ncaj kom kawg nkaus ib yam li peb Leej Txiv tus uas zoo kawg nkaus.
Thov Vajtswv
Vajtswv, thov pab kom nyuam yaus nco ntsoov ua neej paub hwm Koj thiab hlub tibneeg. Thov pab nyuam yaus ua neej ncaj ncees rau txhua lub sijhawm kom Koj lub npe tau qhuas. Nyuam yaus tuav Tswv Yexus Khetos lub npe thov, Amees.
Peb puas ntsia ntsoov Tswv Yexus yog lub hauv paus kev ntseeg, kom txaus siab ua lub neej ncaj ncees rau txhua lub sijhawm?
Nyeem Vajluskub hauv peb xyoos: 1 Kauleethaus 1:1-2:4
Kênh Youtube BHKTHN:
