Klei Aê Diê Blŭ: Klei Bi Hriêng 20:23; Y‑Mathiơ 5:20
Êlan kliăng: “Yêhôwa bi êmut kheh kơ boh ktrŏ amâo djŏ ôh, leh anăn knăng amâo djŏ amâo bi mơak kơ Ñu ôh” (Klei Bi Hriêng 20:23)
Klei êmuh ksiêm mĭn: Boh ktrŏ amâo djŏ leh anăn knăng amâo djŏ kơ ya klei bi hmô? Ya ngă Khua Yang Yêsu čiăng drei hdĭp kpă ênô kdlưn hĭn kơ phung khua čih hră leh anăn phung Pharisi? Ti klei bi hmô kơ klei kpă ênô leh anăn klei jing jăk klă brei ih tui hdĭp?
Aê Diê čiăng kơ phung anak čô Ñu hdĭp kpă ênô kyuadah Ñu jing Pô Kpă Ênô. “Boh ktrŏ amâo djŏ” jing knăng mâo dua boh ktrŏ pioh mkă, mkă mda, mkă khua. “Boh ktrŏ amâo djŏ” amâodah “knăng amâo djŏ” bi êdah kơ klei luar. Yêhôwa amâo tŭ ôh kơ klei luar anăn (Klei Bi Hriêng 20:10). Boh blŭ “bi êmut kheh” amâodah “ăl snăk” bi êdah kơ Aê Diê amâo tŭ ôh kơ klei luar, klei mplư. Pô hriăm êlam kơ Klei Aê Diê Blŭ Meir Leibush Malbin brei drei thâo săng klă klei mblang kơ Klei Bi Hriêng ti dlông hŏng sa bruă êlam leh anăn klă hĭn: “Tơdah arăng tuôm mplư ih hlăm klei blei mnia, đăm brei ih mâo klei mĭn lŏ mplư wĭt čiăng bi knar ôh. Klei mplư wĭt msĕ snăn amâo djŏ klei kpă ênô ôh. Jih jang bruă ngă čiăng mplư wĭt mnuih mplư leh pô ăt jing klei Pô Mâo Jih Klei Myang bi êmut kheh mơh.”
Hdĭp kpă ênô amâo djŏ bi êdah mă knŏng hŏng bruă ngă ti êngao ôh, ƀiădah brei klei kpă ênô anăn kbiă hriê wăt mơ̆ng klei huĭ mpŭ kơ Aê Diê hlăm lam mơh. Wăt tơdah arăng ngă klei amâo mâo mtăp mđơr hŏng drei dưn, drei kăn srăng bi mlih rei klei drei jing kyua phung wê anăn kyuadah drei jing phung anak čô Aê Diê. Klei dôk dơ̆ng ƀơ̆ng huă hŏng klei kpă ênô hlăm klei đăo amâodah hlăm klei hdĭp phung ƀuôn sang amâodah hlăm klei blei mnia amâo mâo dưi bi ktlah ôh. Ƀai hĭn, klei hdĭp kpă ênô drei mâo klei bi mguôp sĭt suôr leh anăn bi hmăi nanao kơ phung anak čô, gŏ sang leh anăn phung găp djuê drei.
Hlăm Klei Bi Mguôp Mrâo, Khua Yang Yêsu mtô hdĭp kpă ênô kbiă hriê mơ̆ng klei khăp sĭt kơ Aê Diê leh anăn kơ mnuih: “Kyuadah Kâo lač kơ diih, tơdah klei kpă ênô diih amâo jing kdlưn hĭn kơ klei kpă ênô phung khua čih hră leh anăn phung Pharisi, diih amâo srăng mŭt hlăm ƀuôn ala mtao adiê ôh” (Y‑Mathiơ 5:20). Phung khua čih hră leh anăn phung Pharisi jing phung hdĭp bi hmô djŏ tui si klei bhiăn. Khua Yang čiăng kơ drei amâo djŏ knŏng gưt kơ klei bhiăn ôh ƀiădah brei kdlưn hĭn kơ anăn mơh, jih klei drei mĭn, klei drei ngă brei kbiă hriê mơ̆ng klei huĭ mpŭ kơ Aê Diê, khăp kơ mnuih. Mâo lu klei drei ngă năng ai amâo soh ôh hŏng klei bhiăn, leh anăn wăt tơdah klei bhiăn ti êngao brei drei ngă dưn, ƀiădah tơdah klei anăn kƀah klei kpă ênô ti anăp Aê Diê snăn kăn drei dưi ngă rei. Hlăm klei mtô ti dlông čư̆, Khua Yang Yêsu mtô brei drei hdĭp kdlưn hĭn kơ klei bhiăn lăn ala. Klei mnuih mtô: “Brei ih khăp kơ pô riêng gah ih leh anăn bi êmut kơ pô roh ih.” Ƀiădah Khua Yang mtô phung anak čô Ñu snei: “Khăp bĕ kơ phung roh diih, leh anăn wah lač brei kơ phung ngă jhat kơ diih … Snăn yơh brei diih jing jăk klă msĕ si Ama diih hlăm adiê jing jăk klă” (Y‑Mathiơ 5:43-48). Brei grăp čô drei hdĭp kpă ênô, jăk klă msĕ si Ama drei jing jăk klă.
Drei dlăng kơ Yêsu jing Pô Khua leh anăn Pô bi klă klei đăo drei čiăng kơ drei jhŏng hdĭp kpă ênô hlăm djăp mta klei truh mơ̆?
Wah lač: Ơ Khua Yang, đru kâo hdĭp hŏng klei huĭ mpŭ kơ Ih, khăp kơ mnuih nanao. Đru kâo hdĭp kpă ênô nanao hlăm djăp mta klei truh, bi mơak kơ Ih leh anăn bi guh kơang kơ anăn Ih hlăm gŏ sang, hlăm ƀuôn sang. Kâo wah lač hlăm anăn Yêsu Krist. Amen.
Dlăng Klei Aê Diê Blŭ hlăm tlâo thŭn: II Kôrantô 1:1-2:4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
