Klei Aê Diê Blŭ: II Y‑Timôthê 3:13-15
Êlan kliăng: “Ƀiădah bi kơ ih, dôk kjăp bĕ hlăm klei ih hriăm leh anăn đăo sĭt leh. Ih thâo mơ̆ng hlei pô ih hriăm leh klei anăn, leh anăn si ih thâo leh mơ̆ng hlăk hđeh klei čih doh jăk dưi bi hriăm ih kơ klei bi mtlaih hŏng klei đăo hlăm Krist Yêsu.” (II Y‑Timôthê 3:14-15)
Klei êmuh ksiêm mĭn: Ya klei khua ƀĭng kna Y‑Pôl mtă mtăn kơ Y‑Timôthê? Ya mta klei yuôm hĭn čiăng brei drei duh? Si klei drei duh hlăm klei hriăm Klei Aê Diê kơ drei pô leh anăn kơ gŏ sang drei?
Hlăm ênuk knhal tuč, klei hdĭp ƀuôn sang ƀrư̆ mâo lu hĭn mnuih jhat ƀai leh anăn hnơ̆ng klei ƀai đĭ kdlưn lu hĭn êjai. Knhuah hdĭp jhat ƀai jing lar, arăng bi luar bi mplư hdơ̆ng găp (êlan 13). Klei jing hlăm ƀuôn sang mtŭk mtŭl msĕ snăn, khua ƀĭng kna Y‑Pôl mtă mtăn kơ anak ñu mjing jing Y‑Timôthê brei dôk hdĭp tui si hnơ̆ng Aê Diê čuăn thâodah hlăm klei găl amâodah amâo găl.
Tal sa, ñu mtă kơ anak ñu brei djă pioh ya klei hriăm leh leh anăn đăo sĭt leh. Khua ƀĭng kna Y‑Pôl mñă kơ Y‑Timôthê lŏ hdơr ya klei blŭ phung mtô lač leh kơ ñu. Boh blŭ “hlei pô” hlăm êlan 14 lač kơ lu pô, kñăm čiăng lač kơ dua čô mniê mtô leh Klei Aê Diê Blŭ leh anăn bi mjuăt hriăm klei đăo kơ Y‑Timôthê jing aduôn ñu H’Lôis leh anăn amĭ ñu H’Ônis (II Y‑Timôthê 1:5). Tal dua, khua ƀĭng kna Y‑Pôl kñăm kơ klei hriăm Klei Aê Diê Blŭ. Boh blŭ “thâo” hlăm Klei Aê Diê Blŭ tui si klei mblang phŭn lač kơ “mâo klei thâo săng, juăt mưng, amâodah raih” kñăm kơ klei ksiêm hriăm, ksiêm mĭn Klei Blŭ Doh Jăk mơ̆ng Aê Diê. Hŏng Klei Aê Diê Blŭ, anak mnuih dưi mă tŭ klei thâo săng mơ̆ng Khua Yang, thâo kral klei doh jăk, klei khăp leh anăn klei bi mtlaih mơ̆ng Aê Diê. Klei Aê Diê Blŭ amâo dưi bi mtlaih mnuih ôh (Y‑Yôhan 5:39-40), ƀiădah Klei Aê Diê Blŭ brei klei ktang kơ hlei pô ksiêm hriăm čiăng dôk hdĭp kjăp ti anăp klei truh, leh anăn brei klei thâo săng “klei bi mtlaih hŏng klei đăo hlăm Krist Yêsu” (êlan 15).
Dôk ti anăp adring thŭn mrâo 2023, lu mnuih hlăm phung drei dôk tlă anăp hŏng lu klei lông dlăng dleh dlan leh anăn tăp năng êdu ai tơdah ƀuh ai tiê mnuih jhat ƀai thiăm hĭn leh anăn hnơ̆ng klei ƀai đĭ kdlưn hĭn grăp hruê. Akâo kơ Aê Diê brei drei mâo klei mđĭ ai mơ̆ng trăn Klei Aê Diê Blŭ hruê anei, jih ai tiê bi hriăm Klei Aê Diê Blŭ leh anăn dôk hdĭp bi êdah klei đăo kơ anak čô. Năng ai drei dôk gĭr duh lu snăk čiăng đru anak čô drei mâo klei tŭ jing hlăm klei hriăm hră mơar, ngăn prăk amâodah klei suaih asei mlei, ƀiădah tăp năng drei wơr bĭt hĕ klei duh yuôm hĭn kơ anak čô drei jing klei hdĭp hlŏng lar. Ti djiêo klei anăn, brei drei pioh hruê mmông duh kơ drei pô hŏng klei ksiêm hriăm leh anăn dôk hdĭp tui si Klei Aê Diê Blŭ mtô mtă čiăng kơ Khua Yang ktrâo atăt drei thâo dôk hdĭp thâo mĭn, thâo duh kơ Ƀuôn Ala Mtao Adiê hlŏng lar hrô kơ knŏng kñăm kơ klei hdĭp mâo kdriêl knhal anei. Hmăng hmưi thŭn mrâo grăp čô drei srăng bi knal klei mơak, klei êđăp ênang leh anăn klei čang hmăng hlăm Khua Yang Yêsu Krist.
Ya klei drei ƀuăn rơ̆ng bi mlih hlăm thŭn anei?
Wal lač: Ơ Ama kâo khăp, bi mni kơ Ama brei leh Klei Blŭ Ih kơ kâo. Akâo Ih brei kâo thâo duh kơ klei hriăm Klei Aê Diê Blŭ leh anăn akâo Yang Mngăt Jăk mtrang mngač brei kơ kâo mâo klei thâo mĭn, thâo săng Klei Aê Diê Blŭ čiăng kơ hŏng klei anăn kâo mâo klei đăo kjăp hlăm Khua Yang Yêsu Krist.
Dlăng Klei Aê Diê Blŭ hlăm tlâo thŭn: Y‑Yêrêmi 50:33–51:10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
