Pajlug 18:1-3
Nqe cim:
“…nej txhua tus muaj lus siab xav ib yam nkaus, muaj lub siab hlub ib yam nkaus thiab sawvdaws koom ua ib lub siab, ib tug nrog ib tug sib raug zoo. Yog nej ua li ntawd yuav ua rau kuv zoo siab kawg li. Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug” (Filipis 2:2-3).
Lus nug rau sawvdaws xav: Vajntxwv Xalumoos hais txog tus neeg ruam zoo li cas hauv ntu Vajluskub no? Kev ua neej ib leeg thiab khavtheeb yuav tau nqi zog dabtsi? Muaj tej lus hais, tej haujlwm twg yus cheemtsum hloov pauv kom yus muaj txojkev sib raug zoo nrog lwm tus?
Txhim tsa tej kev sib raug zoo hauv neeg yog ib yam uas tseemceeb kawg nkaus li. Vajntxwv Xalumoos hais tias cov neeg uas tsis nrog luag ua phoojywg ces yog neeg ruam. Tus neeg uas tsis nyiam ua phoojywg tsuas nrhiav yam uas nws nyiam xwb, tsis hmov tshua txog lwm tus txojkev xav thiab kev cheemtsum li. Twb tsimnyog ua kom muaj kev sib raug zoo los lawv tseem sib cav sib ceg txog qhov yog thiab tsis yog, zoo thiab tsis zoo kom muaj kev sib faib. Dua li ntawd, thaum muaj kev tsis sib haum nrog lwm tus, twb tsimnyog ua twjywm mloog lwm tus tham, los lawv xav ua “tus yeej nkaus xwb”. Qhov uas tsis mloog luag hais no qhia tawm txojkev ruam, tsis zam txim, tsis sib totaub yog li thiaj sib haum tsis taus.
Tej lus hais, cwjpwm qhia tawm lub siab, tus yamntxwv ntawm tibneeg: “Thaum tus neeg ruam chim, nws ua rau luag paub tamsim ntawd ntag, tus neeg ntse nyiaj taus tej uas luag ua saib tsis taus nws” (Pajlug 12:16). Tus cwjpwm uas pheej hais tias yus yog, ua tsis raws yus xav ces yuam, tsis mloog lus thiab tsis ua tib zoo saib tej uas lwm tus hais yog neeg ruam. Qhov uas ua neej tsis muaj phoojywg thiab saib yus tsimtxiaj dua hauv nqe 1 thiab 2, txaus ntshai kawg nkaus vim raug tej phoojywg txav deb, thuam. Ua li no yog lub neej ntawm tus neeg raum, yuav raug txob thuam, poob ntsejmuag (nqe 3). Tus Tswv tej lus qhia meej heev: “Cov neeg txawj ntse yuav tau koob meej zoo, tiamsis cov neeg ruam yuav poob ntsejmuag” (Pajlug 3:35).
Nimno, ntau leej nyob hauv Pawg Ntseeg kuj xav yuam kev muaj tus cwjpwm cais tus kheej tsis kam nrog lwm tus ua phoojywg, thaum muaj kev tsis sib haum nws tu kev kwvtij tagnrho. Ibtxhia muaj tus cwjpwm khavtheeb, saib tsis taus lwm tus kev tawm suab thiaj ua rau muaj kev sib faib ua pab pawg. Vajtswv Txojlus qhia kom Nws cov menyuam tsis txhob ua neej cais tus kheej, tiamsis cia li txhim tsa txojkev sib raug zoo nrog lwm tus los ntawm txojkev sib hlub, ib leeg saib taus ib leeg. Timthawj Paulus qhia rau peb txhua tus, tsimnyog muaj lub siab zoo ib yam li Yexus Khetos lub. Peb cia li koom ua ke, koom kev hlub, koom ib lub siab, koom ib txojkev xav, cia li txo hwjchim saib lwm tus muaj nqis dua yus (Filipis 2:1-5). Thov Vajtswv pab kom peb ua tus neeg ntse, txhim tsa txojkev sib raug zoo nrog cov kwvtij hauv Pawg Ntseeg, tsevneeg thiab chaw ua haujlwm, zej zos kom peb niaj hnub ua rau tus Tswv tau ntsejmuag.
Thov Vajtswv,
Tus Tswv, Koj yog nyuam yaus Leej Txiv. Koj qhia nyuam yaus thiab pub nyuam yaus muaj Koj Txojlus. Thov Koj pab kom nyuam yaus ua neeg txo hwjchim, saib taus cov kwvtij thiab muaj kev sib raug zoo hauv tsevneeg thiab Pawg Ntseeg. Amees.
Peb tabtom ua neeg cais tus kheej lossis txo hwjchim saib lwm tus muaj nqis ib yam Yexus Khetos lub siab?
Nyeem Vajluskub hauv peb lub xyoos: Yaxayas 1:21-2:11
Kênh Youtube BHKTHN:
