Klei Aê Diê Blŭ: Klei Bi Hriêng 18:1-3
Êlan kliăng: “Brei diih bi ênŭm klei mơak kâo hlăm klei diih mâo klei mĭn msĕ, klei khăp msĕ, jing sa ai leh anăn sa klei mĭn. Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô.” (Philip 2:2‑3).
Klei êmuh ksiêm mĭn: Si knhuah hdĭp pô mluk, mtao Salômôn lač hlăm trăn Klei Aê Diê Blŭ anei? Knhuah hdĭp amâo bi mguôp hŏng phung mkăn leh anăn mgao atăt truh kơ ya boh klei? Mâo mơ̆ ya mta klei blŭ, klei ngă drei brei bi mlih hĕ čiăng bi mđĭ klei drei bi mguôp hŏng pô mkăn?
Mkŏ mdơ̆ng klei bi mguôp hŏng phung mkăn hlăm klei hdĭp jing mta klei yuôm êdi. Mtao Salômôn kñăm lač kơ pô ruah klei hdĭp dôk kah hjăn jing mnuih mluk kluôm dhuôm. Phung amâo bi mguôp hŏng phung mkăn knŏng tui duah klei diñu pô čiăng, amâo mđing uêñ kơ klei bi mĭn amâodah klei kƀah phung mkăn ôh. Hrô kơ klei kñăm mkŏ mdơ̆ng klei bi mguôp hŏng phung mkăn, diñu yua klei bi mneh msao, amâo guôn soh djŏ, thâo mĭn amâodah mluk mgu ôh ngă bi kah phung. Ti djiêu anăn, êjai bi mneh msao hŏng pô mkăn, hrô kơ klei kăp mđing hmư̆ klei ayŏng adei wĭt lač, bi diñu lĕ “knŏng čiăng hưn klei ñu pô mĭn”. Klei blŭ hrăm knŏng sa nah tĭng bi êdah klei mluk mgu, kƀah klei thâo bi pap, kƀah klei bi thâo săng hdơ̆ng găp, snăn dleh yơh mâo klei dôk jăk bi hlĭ mbĭt.
Klei blŭ, klei ngă bi êdah ai tiê, knuih sa čô mnuih: “Sa čô mnuih mluk bi êdah mtam klei ñu ngêñ; ƀiădah mnuih thâo mĭn amâo uêñ ôh kơ klei arăng dlao wač” (Klei Bi Hriêng 12:16). Knhuah hdĭp knŏng yap pô yơh djŏ, ya mta mdê hŏng klei mĭn pô jing soh sơăi yơh, amâo čiăng mđing hmư̆, amâo ksiêm klei mĭn pô mkăn, anăn amâo djŏ jing mnuih thâo mĭn ôh ƀiădah bi sĭt klei pô jing mnuih mluk mgu. Dơ̆ng mơ̆ng klei amâo čiăng bi mguôp hŏng phung mkăn leh anăn mpŭ hjăn kơ ñu pô hưn mdah hlăm êlan 1 leh anăn 2, atăt truh kơ klei jhat tơdah êpul êya ñĕ đuĕ kbưi, mưč mač. Anăn jing klei hdĭp phung mluk, tŭ klei arăng mưč, bi êmut, mbĭt hŏng lu mta klei jhat ƀai mkăn (êlan 3). Klei Aê Diê Blŭ mtô klă snăk: “Phung knhâo srăng dưn klei mpŭ, ƀiădah phung mluk mâo klei hêñ” (Klei Bi Hriêng 3:35).
Hruê anei, lu mnuih hlăm Phung Sang Aê Diê ăt soh čhuai mơh tơdah mâo knhuah hdĭp dôk kah hjăn, klah đuĕ mơ̆ng ayŏng amai adei tơdah mâo klei bi mneh msao. Bi phung mkăn đa, mâo knuih mgao, dlăng hơăi mang kơ klei mĭn, klei bluh ai phung mkăn snăn atăt truh kơ klei bi kah phung. Klei Aê Diê Blŭ mtô phung anak ƀuôn sang Aê Diê đăm ngă klei dôk kah hjăn ôh, ƀiădah bi mkŏ mdơ̆ng klei bi mguôp hdơ̆ng găp hlăm klei bi khăp, bi mpŭ hdơ̆ng găp. Khua ƀĭng kna Y-Pôl mtô grăp čô drei brei mâo sa ai tiê klei mĭn msĕ si Yang Krist mâo leh. Brei drei dôk sa ai hdơ̆ng drei, mâo klei mĭn msĕ, klei khăp msĕ, jing sa ai leh anăn sa klei mĭn, hŏng klei luă gŭ yap phung mkăn jing prŏng hĭn kơ drei pô (Philip 2:1‑5). Akâo kơ Khua Yang đru drei hdĭp thâo mĭn, mkŏ mdơ̆ng klei bi mguôp jăk hŏng ayŏng amai adei hlăm Phung Sang Aê Diê, hlăm gŏ sang, hŏng phung riêng gah, čiăng kơ knhuah hdĭp drei bi guh kơang kơ Anăn Khua Yang nanao.
Si ngă drei dôk hdĭp kah hjăn amâodah luă gŭ bi mpŭ hdơ̆ng găp msĕ si ai tiê klei mĭn Yang Krist mâo leh?
Wah lač: Ơ Khua Yang, Ama kâo Ti Dlông. Bi mni lač jăk kơ Khua Yang mtô lač leh kơ kâo, brei kơ kâo Klei Ih Blŭ. Akâo Khua Yang đru kâo hdĭp luă gŭ, thâo mpŭ kơ ayŏng amai adei leh anăn bi mđĭ klei bi mguôp jăk hlăm gŏ sang leh anăn hlăm Phung Sang Aê Diê.
Dlăng Klei Aê Diê Blŭ hlăm tlâo thŭn: Y‑Êsai 1:21 – 2:11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
