Mathais 5:3
3 Cov uas paub hais tias lawv ua tsis tau lawv lub neej raws li Vajtswv lub siab nyiam; cov ntawd tau koob hmoov, rau qhov Ntuj Ceebtsheej yog lawv tug!
Phau txhais tshiab Hmowsv hais tias: “Cov uas pluag sab ntsujplig tau nyob kaj siab lug, rau qhov Ntuj Ceebtsheej yog lawv tug lawm”.
Lus nug rau sawvdaws xav: Tus pluag sab ntsujplig yog tus zoo li cas? Vim li cas tus neeg pluag sab ntsujplig tau koob hmoov? Qhov koob hmoov tau txais yog dabtsi? Yuav ua li cas kom peb thiaj ntshaib nqhis sab ntsujplig?
Mathais 5:3 yog thawj qhov koob hmoov hauv yim qhov koob hmoov uas Tswv Yexus qhia. Qhov no tsis yog yam uas yuam ib tug neeg ua kom tau txojsia ntev dhawv ibtxhis tiamsis yog ib tug duab qhia txog tus ntseeg Yexus lub neej. Zaj lus Tswv Yexus qhia no qhia paub, thaum ib tug neeg tau txais Vajtswv txojkev cawm dim ces Vaj Ntsujplig ua haujlwm rau nws, tus neeg ntawd yuav muaj cov yamntxwv zoo li hais hauv zaj kawm no.
“Koob hmoov” yog yam uas Vajtswv muab pub rau tibneeg. Vajtswv cov menyuam sab ntsujplig yuav muaj zog, muaj peevxwm ua tau yog tus Tswv pub xwb (Phau Ntawv Nkauj 68:35; 72:18; I.Timautes 1:11). Vim li ntawd nyob hauv tus Tswv, tibneeg tau txais Nws txoj koob hmoov thiab muaj tus yamntxwv saum ntuj. Yuav tsis tau koob hmoov yog hais tias yus tus kheej tsis muaj txojkev sib raug zoo nrog Vajtswv (II. Petus 1:4).
Thawj yam koob hmoov pub rau “cov uas paub hais tias lawv ua tsis tau”. Tus neeg pluag lossis ua tsis tau yog cov neeg uas pab tsis tau lawv tus kheej thiab pheej vamkhom lwm tus pab. Yog li ntawd, tus neeg pluag sab ntsujplig yog tus neeg uas zeem paub sab ntsujplig mus tsis taus, tas kev cia siab. Ua lwm seem lus hais, “cov uas paub hais tias lawv ua tsis tau” txog sab ntsujplig yog cov neeg uas tsis khavtheeb, paub txajmuag, zeem paub nws tus kheej ua tsis tau dabtsi tabmeeg Vajtswv, nws ua tsis tau ib qhov zoo kom haum Vajtswv siab li.
“Cov neeg uas paub hais tias lawv ua tsis tau” txog sab ntsujplig tau koob hmoov, rau qhov yog tsis zeem paub tias yus tsis tau muaj txaus, tus neeg ntawd yuav tsis muaj puv ntoob, yog li koob hmoov yog lub qhovrooj qhib txhua yam koob hmoov. Qhov tseemceeb uas Vajtswv xav tau ntawm no yog “lub siab” – qhov uas ib tug tibneeg tig rov los ntsia yus, zeem paub yus tus kheej; qhov no tsis yog ib tug neeg ua rau ib tug tibneeg tiamsis yog Vajtswv thiab nws tus kheej.
Ua li cas kom “paub hais tias…ua tsis tau” txog sab ntsujplig? Tim ib, qhov no yog Vaj Ntsujplig tes haujlwm, yog tsis muaj Nws ces ib tug neeg txhaum tsis paub hais tias nws tabtom pluag sab ntsujplig li. Tim ob, thaum los ntseeg tus Tswv lawm, peb yuav tau ntsia ntsoov Nws kom peb pom txoj koob hmoov uas Nws pub rau yus, yog tsis li ntawd yus twb puastsuaj lawm. Ib tug neeg khavtheeb, tsis nqhis sab ntsujplig, tsuas yog muab yus piv rau lwm tus, lossis nws xwbtim cia li ntsaws pobntseg, pos qhovmuag tsis yeem ntsia tus Tswv thiab Nws tej haujlwm. Cia kom paub tus Tswv thiab yus tus kheej ntau dua, peb cheemtsum nyeem Vajtswv Txojlus kom ntau, ntsia saib yam uas tus Tswv xav kom peb ua, thov Vajtswv pab txhua hnub, kom yus pom thiab paub hais tias ua tsis tau lub neej sab ntsujplig yus thiaj tau txais Vajtswv lub Tebchaws.
Thov Vajtswv,
Ua tus Tswv tsaug, Koj cawm nyuam yaus thaum tseem yog ib tug txhaum tawmtsam Koj. Thov Koj pub kom nyuam yaus sab ntsujplig nqhis thiab nrhiav tus Tswv Koj txhua hnub. Amees.
Peb puas zeem paub hais tias yus pluag sab ntsujplig thiab?
Nyeem Vajluskub hauv peb lub xyoos: Xalumoos Tej Nkauj 2:8-3:11
Kênh Youtube BHKTHN:
