Klei Aê Diê Blŭ: Klei bi hriêng 17:12-15
Êlan kliăng: “Kyuadah Yêhôwa răng kriê êlan phung kpă; ƀiădah êlan phung ƀai srăng rai tuč.” (Klei Mmuñ Hđăp 1:6).
Klei êmuh ksiêm mĭn: Si Mtao Salômôn bi hriăm anak ñu ñĕ kơ êlan phung ƀai? Si phung đăo kơ Krist hdĭp leh thâo Yêhôwa Aê Diê jing doh jăk ? Ya klei đru drei dưi gĭr, tŭ klei luč liê amâodah klam klei dleh dlan sĭt hdĭp doh jăk?
Mtao Salômôn lač kơ êlan phung ƀai kñăm đru kơ anak ñu ñĕ kbưi, leh anăn hdĭp thâo mĭn bi mơak kơ Aê Diê, tŭ dưn kơ pô mkăn. Tal sa, brei anak ñĕ kơ phung ƀai hlăk êjai diñu dôk ngă klei mluk. Amâo djŏ ôh djăp pô thâo sơaĭ klei bhiăn hdĭp, tŭ ư kơ klei kpă ênô, sĭt nik. Hlăm ai tiê phung ƀai amâo lŏ mâo ôh klei kpă ênô, hlăk êjai ngă klei mluk ƀrư̆ huĭ hyưt hĭn. Mtao bi msĕ klei mluk phung ƀai huĭ hyưt leh anăn amâo dưi ktuê dlăng hĭn kơ klei sa drei kgâo ana arăng tlĕ leh êđai. Anak mnuih lŏ lač “đuê̆ kơ êman djăp êlan êđăp ênang”, kyua anăn jăk hĭn, brei anak ñĕ kơ phung mluk hlăk êjai diñu ngă klei mluk. Tal dua, brei anak thâo hdĭp hdơr kơ pô mkăn. Phung ƀai amâo uêñ kơ klei khăp, kyua khăp kơ klei tŭ dưn leh anăn mă klei ƀai ba wĭt kơ klei jăk. Êngao anăn, diñu ruah leh klei tŭ ti anăp mta amâo bi mĭn ôh kơ klei jhat êdei anei. Diñu mă klei jhat ba wĭt kơ klei jăk, si dưi ñĕ kơ klei arăng bi êmut leh anăn klei Aê Diê bi kmhal. Tal tlâo, brei anak thâo hdĭp thâo mĭn dưi ư̆ ăn sĭt bi tăng mgăl. Ăt msĕ si êa kluh amâo dưi mkhư̆, boh jhat mơ̆ng klei bi tăng mgăl srăng êgao hnơ̆ng dưi krơ̆ng. Brei anak mdei bi tăng mgăl êlâo kơ truh kơ klei bi čik bi čăm. Knhal tuč, ai tiê anak brei kpă ênô, ƀăng êgei anak brei blŭ klei kpă ênô. Phung phat kđi hmư̆ mơ̆ng klei bi mklă čiăng phat kđi klei soh sa čô mnuih. Sĭt anak lač phung ƀai jing kpă ênô, amâodah phat kđi phung kpă ênô jing anak ngă klei ƀai kyua klei anăn ba truh kơ klei phat kđi soh. Yêhôwa Aê Diê bi êmut kơ klei ƀai snăn.
Klei Aê Diê Blŭ mơ̆ng klei mphŭn dơ̆ng truh ară anei bi hriăm nanao anak mnuih klei sĭt nik čiăng tui hlue leh anăn klei măk ƀai čiăng ñĕ đuê̆. Aê Diê lač: “Lač bĕ kơ jih phung ƀuôn sang Israel bi kƀĭn, Brei diih jing doh jăk, kyuadah kâo, Yêhôwa Aê Diê diih jing doh jăk” (Bruă Lêwi 19:2). Akâo kơ Aê Diê pap brei čiăng grăp čô drei hdĭp doh jăk mơ̆ng klei mĭn truh bruă ngă. Hlăm klei hdĭp grăp hruê, brei drei ñĕ kơ klei bi mmiă, bi mneh msao hŏng phung ƀai, kyua klei bi lông hlei pô dưi snăn bi luč klei jăk siam Aê Diê. Wăt tơdah tŭ klei luč liê amâodah huĭ hyưt kyua ai tiê kpă ênô, klei blŭ kpă mngač, ăt brei drei gĭr tŭ. Klei Aê Diê Blŭ lač: “Kyuadah Yêhôwa răng kriê êlan phung kpă; ƀiădah êlan phung ƀai srăng rai tuč.” (Klei Mmuñ Hđăp 1:6). Aê Diê thâo nanao bruă drei ngă leh anăn ñu srăng hơêč hmưi klei jăk jĭn kơ drei.
Akâo kơ Yang Mngăt Jăk đru drei mâo klei thâo mĭn čiăng thâo ngă bruă, blŭ tlao djŏ hnơ̆ng, đru drei ñĕ kơ klei kpĕ êka leh anăn mâo klei jăk mơ̆ng Aê Diê.
Ya klei brei drei bi mlih čiăng hdĭp bi mơak kơ Aê Diê leh anăn amâo hmaĭ mơ̆ng phung ƀai mơ̆?
Wah lač: Ơ Khua Yang, kâo bi mni lač jăk kơ Ih brei leh kơ kâo Klei Aê Diê Blŭ. Akâo kơ Yang Mngăt Jăk đru kâo hdĭp kpă ênô, blŭ tlao thâo mĭn hlue si klei Khua Yang mtô. Akâo kơ Ih đru kâo sĭt suôr hŏng Khua Yang leh anăn bi guh kơang Anăn Ih hlăm klei blŭ, bruă ngă.
Dlăng Klei Aê Diê Blŭ hlăm tlâo thŭn: Klei Bi Hriêng 4:1-27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
