II Kauleethaus 4:7-18
Nqe cim:
“Rau qhov peb tsis muab siab npuab tej uas peb qhovmuag pom, tiamsis peb muab siab npuab tej uas peb qhovmuag tsis pom. Tej uas peb qhovmuag pom tsuas nyob ib ntus xwb, tiamsis tej uas peb qhovmuag tsis pom yuav nyob mus ibtxhis li” (II Kauleethaus 4:18).
Lus nug rau sawvdaws xav:
- Tej yam muaj nqis Timthawj Paulus hais txog hauv nqe 7 yog dabtsi?
- Lub laujkaub av piv txog dabtsi?
- Timthawj Paulus hais licas txog tej kev sim siab, kev txomnyem uas nws tiv thaum mus tshajtawm Txojmoo Zoo?
- Yam dabtsi pab peb tiv dhau kev sim siab?
Nyob rau Timthawj Paulus tiam, luag pheej zais tej yam muaj nqis rau hauv tej tais av lossis laujkaub av uas tsis tshua ntxim saib. Dhau qhov pivtxwv ntawd, Timthawj Paulus qhia txog tej yam nws xav hais, ntawd yog Txojmoo Zoo uas nws tabtom qhia yog yam tseemceeb, cia ntsa iab thiab muaj nqis heev, tiamsis Vajtswv zoo siab siv nws los “ntim” yam muaj nqis no. Paulus muab tibneeg uas tsis muaj nqis, tsis muaj zog thiab nyob tsis ntev piv rau lub laujkaub av, tiamsis tau txoj koobhmoov thaum Vajtswv siv los qhia tshwm Nws lub tshwjchim dhau ntawm Yexus. Yam muaj nqis ntim hauv lub laujkaub av, yog Tus Cawmseej Txojmoo Zoo.
Thaum xam pom txog yam tseemceeb no, Timthawj Paulus thiab cov nrog nws ua haujlwm, thiaj txaus siab hlo hais tias “Thaum peb tseem ua neej nyob peb cov uas ua Yexus Khetos tes haujlwm, peb niaj hnub txaus siab raug kev ploj kev tuag kom sawvdaws pom peb ua peb lub neej ib yam li Yexus Khetos lub” (nqe 11). Yog li ntawd, txawm lawv yuav ntsib ntau yam tsis raws siab xav, xws li: raug kev nyuaj siab, kawg tswvyim, raug tsimtxom, raug ntaus, los tej ntawd yeej tsis dhau qhov uas lawv tiv taus. Cov tubtxib uas muab siab npuab Vajtswv saib tej ntawd zoo li “tej teebmeem me me uas…raug ib nyuag ntu”, vim paub hais tias tej kev sim siab ntawd “yuav ua rau peb tau txoj koob hmoov zoo uas yuav nyob mus ibtxhis, tej teebmeem uas peb raug yeej piv tsis tau txoj koob hmoov uas peb tau li” (nqe 17). Tsis tas li ntawd xwb, lawv ua lubneej ntseeg khov kho hais tias, txawm yog lawv raug tuag, los lawv yog cov uas kovyeej lawm, vim yuav tau nrog tus Tswv nyob mus ibtxhis: “Peb paub hais tias Vajtswv tus uas tsa Tswv Yexus sawv hauv qhov tuag rov qab los, nws yuav tsa peb cov uas nrog Yexus koom ib txojsia sawv hauv qhov tuag rov qab los ib yam nkaus, nws yuav coj peb thiab nej mus cuag nws” (nqe 14).
Niaj hnub nimno tus Tswv cov menyuam kuj ntsib ntau kev khwv vim lawv txojkev ntseeg. Tsuas yog thaum peb xam pom hais tias, peb txojkev ntseeg tus Tswv yog yam tseemceeb dua ntais hauv lubneej, ces peb thiaj txaus siab hlo tiv kev sim siab thiab pom txog qhov muaj nqis ntawm tej teebmeem uas peb raug. Tej teebmeem uas peb ntsib tsis yog vimchiv rau peb yws thiab poob siab, tiamsis yog zoo sijhawm rau Vajtswv siv los pub Nws txoj koobhmoov rau ntau tug thiab yuav muaj coob leej los ua Nws tsaug, ua rau Nws tau koobmeej (nqe 15).
Peb xam pom txog Vajtswv zoo licas thaum ntsib kev sim siab?
Vajtswv Tus uas muaj hwjchim loj kawg nkaus! Nyuam yaus thov ua tsaug vim Koj qhia Koj txojkev hlub rau nyuam yaus. Thov Koj pab nyuam yaus pom txog nuj nqis ntawm txojsia ibtxhis, kom nyuam yaus tiv taus tej kev sim siab me me thiab raug ib nyuag ntu hauv ntiajteb no. Amees.
Nyeem Vajluskub hauv peb lub xyoos: Phau Ntawv Nkauj 145
Kênh Youtube BHKTHN:
