Klei Aê Diê Blŭ: II Kôrantô 4: 7-18
Êlan kliăng: “Kyuadah hmei amâo dlăng ôh kơ mnơ̆ng arăng dưi ƀuh, ƀiădah kơ mnơ̆ng arăng amâo dưi ƀuh ôh. Kyuadah mnơ̆ng arăng dưi ƀuh dôk bhiâo, ƀiădah mnơ̆ng arăng amâo dưi ƀuh ôh dôk hlŏng lar.” (II Kôrantô 4:18).
Klei êmuh ksiêm mĭn: Ya mnơ̆ng yuôm bhăn Khua ƀĭng kna Y-Pôl lač hlăm êlan 7? Čeh lăn bi hmô kơ ya klei? Si Khua ƀĭng kna Y-Pôl bi mklă kơ klei lông dlăng, klei truh ñu tlă anăp sĭt hiu hưn Klei Mrâo Mrang Jăk? Ya klei đru drei kjăp ai tiê hgao klei lông dlăng?
Hlăm ênuk Khua ƀĭng kna Y-Pôl, arăng khăng mdăp ngăn drăp yuôm hlăm čeh lăn mâo rup amâo jăk siam ôh. Mơ̆ng rup anăn, Khua ƀĭng kna Y-Pôl hưn klei ñu čiăng lač, anăn jing Klei Mrâo Mrang Jăk ñu dôk hiu hưn jing yuôm bhăn snăk, guh kơang leh anăn yuôm bhăn, ƀiădah Aê Diê mơk ruah ñu čiăng “dưm” ngăn yuôm bhăn anei. Ñu bi hmô anak mnuih điêt dhiêt hŏng klei thâo leh anăn klei hdĭp điêt msĕ si sa boh čeh lăn, lŏ dưi bi guh kơang sĭt Aê Diê bi êdah klei guh kơang Ñu mơ̆ng Khua Yang Yêsu hlăm čeh lăn điêt dhiêt anăn. Ngăn yuôm dưm hlăm čeh lăn anăn jing Klei Mrâo Mrang Jăk mơ̆ng Pô Bi Mtlaih Lăn Ala.
Leh thâo săng klei yuôm bhăn anei, Khua ƀĭng kna Y-Pôl hŏng phung ƀĭng kna mơak “Kyuadah êjai hmei dôk hdĭp arăng jao hmei nanao kơ klei djiê kyua Yêsu, čiăng kơ klei hdĭp Yêsu dưi bi êdah hlăm kđeh hmei thâo djiê” (êlan 11). Kyua anăn wăt tơdah tlă anăp hŏng lu klei lông dlăng: arăng ngă jhat hŏng lu hdră, kƀah, arăng čăm biêng ƀiădah jih jang klei anăn jing amâo êgao đei klei diñu dưi tŭ ôh. Phung dĭng buăl sĭt suôr Aê Diê dlăng jih jang klei anăn jing “hdjul leh anăn êjai”. Kyua thâo mơ̆ng klei lông dlăng anei srăng “mjing kơ hmei klei guh kơang prŏng hĭn hlŏng lar êgao kơ arăng dưi mkă” (êlan 17). Hĭn mơh, diñu hdĭp hlăm klei đăo kjăp wăt hŏng klei djiê hŏng diñu ăt jing klei tŭ dưi guh kơang kyua dưi hdĭp lă lar hŏng Khua Yang: “Êjai hmei thâo kơ Pô bi kbiă lŏ hdĭp leh Khua Yang Yêsu srăng bi kbiă lŏ hdĭp hmei msĕ mơh mbĭt hŏng Yêsu, leh anăn atăt hmei mbĭt hŏng diih mŭt ti anăp Ñu” (êlan 14).
Hruê anei phung ƀuôn sang Aê Diê ăt tuôm nanao hŏng lu klei dleh dlan kyua klei pô đăo. Knŏng hbĭl drei thâo săng klei đăo drei hlăm Khua Yang Yêsu jing klei yuôm bhăn hĭn hlăm klei hdĭp, hlăk anăn kơh drei tlă anăp hŏng klei lông dlăng leh anăn ƀuh ênoh yuôm hlăm klei lông dlăng. Klei lông dlăng amâo lŏ jing mta phŭn ngă kơ drei blŭ duñ duñ leh anăn êdu ai ôh, ƀiădah jing klei găl Aê Diê brei klei pap êbeh dlai čiăng kơ lu mnuih dưi tlaih leh anăn ƀrư̆ lu mnuih myơr kơ Khua Yang êbâo klei bi mni, ba klei guh kơang kơ Ñu (êlan 15).
Si drei tuôm thâo kơ Aê Diê sĭt tuôm hŏng klei dleh dlan?
Wah lač: Ơ Aê Diê Pô Myang! Kâo bi mni lač jăk kơ Ih kyua Ih mơak bi êdah klei pap leh anăn klei guh kơang Ih kơ kâo jing sa mta mnơ̆ng điêt dhiêt. Akâo kơ Ih đru kâo thâo kral klei guh kơang yuôm bhăn hlăm klei hdĭp lă lar čiăng mơak tŭ klei lông dlăng hlăm klei hdĭp anei msĕ si sa klei hriăm mjuăt klei đăo.
Dlăng Klei Aê Diê Blŭ hlăm tlâo thŭn: Klei Mmuñ Hđăp 145:1-21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
