Klei Aê Diê Blŭ: Y-Luk 24:1-9.
Êlan kliăng: “Gơ̆ amâo dôk tinei ôh, Gơ̆ kbiă lŏ hdĭp leh…” (Y-Luk 24:5b).
Klei êmuh ksiêm mĭn: Si ai tiê phung mniê leh nao čuă ti msat Khua Yang? Ya klei dĭng buăl jăk lŏ mñă wĭt? Ya diñu ngă leh thâo si hdră Khua Yang kbiă lŏ hdĭp leh? Ya klei mñă kơ drei hlăm yan bi hdơr klei Khua Yang kbiă lŏ hdĭp thŭn anei?
Hŏng ai tiê khăp kơ Khua Yang Yêsu, aguah ưm ang dar hruê tal sa hlăm hruê kăm phung mniê nao ti msat čiăng trôč êa ƀâo mngưi kơ asei atâo Khua Yang. Diñu nao ti msat Khua Yang hŏng lu klei rŭng răng. Dŭm klei diñu rŭng răng jing phung kahan Rôm brei diñu nao trôč êa ƀâo mngưi hlăm asei atâo Khua Yang mơ̆ (Y-Mathiơ 27:62-66), leh anăn si ngă čiăng dưi klư̆ boh tâo ti ƀăng msat kyua “boh tâo prŏng snăk”? (Y-Markôs 16:2-4). Ƀiădah leh nao ti msat Khua Yang, diñu huĭ hyưt hĭn kyua amâo ƀuh sa čô kahan dôk gak ôh, boh tâo gang ti ƀăng msat klŭng leh ti anôk mkăn, leh anăn leh mŭt hlăm lam msat amâo lŏ ƀuh ôh asei atâo Khua Yang Yêsu. Hlăk êjai rŭng răng leh anăn huĭ hyưt, dĭng buăl jăk lač kơ diñu, “…Si ngă diih duah pô hdĭp ti krah phung djiê? Gơ̆ amâo dôk tinei ôh, gơ̆ kbiă lŏ hdĭp leh…” (êlan 5-6). Diñu wơr hĕ klei Khua Yang lač, diñu wơr hĕ Ñu jing Pô Hdĭp. Kyua klei mñă anei, phung mniê lŏ hdơr ya klei Khua Yang Yêsu lač leh hŏng diñu, mơ̆ng luč klei čang hmăng ară anei diñu bŏ hŏng klei čang hmăng leh anăn hơ̆k mơak. Diñu ruăt wĭt kơ sang čiăng hiu hưn hŏng phung ƀĭng kna Khua Yang sĭt nik Khua Yang Yêsu lŏ hdĭp leh.
Hlăm knăm bi hdơr kơ klei Khua Yang Yêsu kbiă lŏ hdĭp, drei lŏ dlăng wĭt klei hdĭp pô, ya klei ngă kơ drei rŭng răng, huĭ hyưt, luč êđăp ênang hlăm klei hdĭp, bruă mă, klei khăp amâodah êdei anăp hĕ? Drei dôk luč klei čang hmăng amâodah čang hmăng ti anăp klei pô dôk găn? Hlăk êjai tar rŏng lăn dôk hdĭp hlăm klei rŭng răng luč čang hmăng snăn drei mâo Klei Aê Diê Blŭ mñă Khua Yang Yêsu lŏ hdĭp leh leh anăn ñu dôk hdĭp lă lar. Khua Yang Yêsu jing klei čang hmăng kơ dŭm klei drei dôk găn msĕ si Klei Bi Êdah 1:17b-18 “…kâo jing Pô tal êlâo hĭn leh anăn Pô knhal tuč, leh anăn Pô dôk hdĭp. Kâo djiê leh, leh anăn nĕ anei, kâo dôk hdĭp nanao hlŏng lar, leh anăn kâo djă kliăng Klei Djiê leh anăn Ƀuôn Phung Djiê.”
Năng ai hlăm hruê mlan êgao, drei dôk luč klei čang hmăng leh anăn luč êđăp ênang msĕ si phung riêng gah pô, klei dĭng buăl lač hŏng phung mniê đưm adih “Gơ̆ amâo dôk tinei ôh, gơ̆ kbiă lŏ hdĭp leh…” (êlan 6a) ăt jing klei bi mdih phung drei kơ klei Khua Yang kbiă lŏ hdĭp, Ñu ăt hdĭp hŏng phung drei leh anăn Ñu hŏng drei êla truh hruê knhal tuč (Y-Mathiơ 28:20). Brei klei myang Klei kbiă lŏ hdĭp Khua Yang ba kơ drei jăk mơak leh anăn klei čang hmăng čiăng kơ drei dưi mđĭ ai phung ayŏng amai adei mkăn hlăm klei đăo dôk hlăm klei rŭng răng leh anăn amâo êđăp ênang. Bi kah mbha klei čang hmăng hlăm Khua Yang Kbiă Lŏ Hdĭp kơ phung riêng gah pô ka đăo ôh kơ Khua Yang.
Drei mâo klei thâo kơ klei čang hmăng hlăm Khua Yang Kbiă lŏ hdĭp leh mơ̆ ka? Drei srăng hưn kơ klei mơak leh anăn klei čang hmăng anei kơ hlei pô hlăm yan Khua Yang Kbiă lŏ hdĭp?
Wah lač: Ơ Khua Yang, kâo bi mni lač jăk kơ Ih kyua Ih hdĭp leh anăn hdĭp lă lar. Akâo kơ Ih đru kâo hdơr Khua Yang jing Pô Hdĭp čiăng kâo thâo nanao klei mơak leh anăn klei čang hmăng sĭt dôk hlăm Khua Yang.
Dlăng Klei Aê Diê Blŭ hlăm tlâo thŭn: Y-Yôp 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
