Lukas 24:1-9
Nqe cim:
“Nws tsis nyob ntawm no; Nws twb sawv lawm …” (Lukas 24:6a).
Lus nug rau sawvdaws xav:
- Cov pojniam uas tuaj mus xyuas Yexus lub cev tom qhov ntxa lawv xav li cas?
- Cov pojniam tau ntsib timtswv los hais txog yam dab tsi?
- Cov pojniam ntawd ua li cas thaum lawv paub tus Tswv sawv los lawm?
- Peb txais tau kev txhawb zog li cas thaum lub caij ua kev nco txog Tus Tswv Sawv xyoo no?
Ib tsoom mloog txhua tus,
Vim hlub tus Tswv, hnub kaj thaum sawv ntxov cov pojniam thiaj tuaj mus tom qhov ntxa cia yuav muab roj pleev Yexus lub cev. Lawv muaj kev txhawj heev thaum tuaj mus xyuas Yexus lub qhov ntxa. Cov pojniam ntawd txhawj ntshai tsam cov tub rog Loos tsis pub lawv mus xyuas tus Tswv lub cev (Mathais 27:62-66), thiab txhawj tsis paub yuav ua cas dov tau daim lagzeb npog lub rooj ntxa tawm, vim “Daim txiagzeb ntawd loj kawg li”? (Malakaus 16:2-4). Tiamsis thaum lawv tuaj txog ntawm tus Tswv lub ntxa, lawv xav tsis thoob vim tsis pom muaj tub rog nyob ntawd zov, daim lagzeb twb dov tawm rau ib cag lawm thiab lawv mus saib hauv lub qhov ntxa ua ciav tsis pom tus Tswv lub cev lawm. Thaum ntawd, muaj ob tug timtswv los tshwm rau ntawm lawv thiab hais tias; “…Ua li cas nej tuaj nrhiav tus neeg ciaj ntawm cov neeg tuag no? Nws tsis nyob ntawm no; nws twb sawv lawm….” (nqe 5-6). Cov pojniam ntawd tsis nco tus Tswv cov lus hais tseg rau lawv ua ntej lawm, lawv thiaj tsis nco txog Yexus yog tus Tswv uas muaj sia nyob. Thaum tau timtswv qhia, lawv thiaj rov nco txog tej uas Tswv Yexus twb xub qhia rau lawv ua ntej lawm, lawv lub siab tas kev cia siab hloov ua kev zoo siab thiab rov muaj kev cia siab. Lawv rov los qhia rau cov thwjtim paub txog zaj xwm Yexus sawv lawm.
Thaum ua kevcai Nco Txog Yexus Sawv, peb rov los xyuas peb lub neej saib puas muaj yam dab tsi ua rau peb txhawj ntshai, ua rau peb poob siab tsis hais kev nrhiav noj, lossis lub neej yav tom ntej? Peb tas kev cia siab lossis tseem muaj kev cia siab thaum ntsib teebmeem hauv lub neej? Thaum lub ntiajteb no nyob muaj kev txhawj qhov txhia chaw ua rau peb tas kev cia siab, tiamsis peb tau Vajtswv Txojlus txhawb zog, vim tus Tswv sawv rov muaj sia nyob thiab Nws yuav nyob mus ibtxhis. Tswv Yexus yog peb lub chaw cia siab ib yam Vajtswv Txojlus hauv Tshwmsim 1:17b-18 hais tias: “…Koj tsis txhob ntshai! Kuv yog lub hauvpaus thiab yog lub ntsis. Kuv yog tus uas muaj sia nyob! Kuv twb tuag lawm, tiamsis koj saib, nimno kuv muaj sia nyob mus ibtxhis li. Kuv yog tus uas kav txojkev tuag thiab tubtuag teb”
Tej zaum ncua caij nyoog dhau los, peb tas kev cia siab thiab muaj kev txhawj ntshai ib yam li tej neeg ib ncig peb, timtswv lo lus qhia cov pojniam hnub thaud hais tias: “Nws tsis nyob ntawm no; Nws twb sawv lawm …” (nqe 6a) kuj yuav ua rau peb nco txog Tswv Yexus twb sawv los lawm, Nws yuav nrog peb nyob mus txog thaum lub ntiajteb no kawg (Mathais 28:20). Cia li zoo siab thiab cia siab rau Tswv Yexus kev sawv hauv qhov tuag rov qab los lawm, kom peb txhawb tau peb cov kwvtij ntseeg uas muaj kev txhawj ntshai lub zog. Thiab kuj qhia zaj uas Tswv Yexus sawv rov los muaj sia nyob pub rau tej neeg tsis tau ntseeg nyob ib ncig ntawm peb.
Thov Vajtswv,
Tus Tswv, nyuam yaus ua Koj tsaug uas Koj tau sawv rov los thiab muaj txojsia nyob mus ibtxhis. Thov pab kom nyuam yaus nco ntsoov Koj yog tus muaj sia nyob, kom nyuam yaus txais kev zoo siab thiab muaj kev cia siab ruaj khov rau Koj. Amees.
Ib tsoom mloog uas hmov thiab tshua,
Peb puas muaj kev cia siab ruaj khov hauv tus Tswv sawv rov muaj sia nyob lawm tau? Peb yuav piav kev zoo siab thiab kev cia siab qhia leejtwg?
Nyeem Vajluskub hauv peb lub xyoo: Yauj 23
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
