Klei Aê Diê Blŭ: Klei Bi Hriêng 1:1-9
Êlan kliăng: “Klei huĭ mpŭ kơ Yêhôwa jing klei kčưm kơ klei thâo mĭn, leh anăn klei thâo kral Pô Doh Jăk jing klei thâo săng.” (Klei Bi Hriêng 9:10).
Klei êmuh ksiêm mĭn: Si Klei Aê Diê Blŭ mtô kơ klei thâo mĭn? Kơ hlei pô Aê Diê pioh brei klei thâo mĭn? Ya ngă klei huĭ mpŭ kơ Khua Yang jing klei kčưm kơ klei thâo săng leh anăn klei thâo mĭn? Ya jing klei mdê ti krah klei thâo mĭn lăn ala hŏng klei thâo mĭn hlăm Khua Yang? Ya bruă brei phung đăo ngă čiăng dưi mă tŭ klei thâo mĭn mơ̆ng Khua Yang brei?
Klei thâo mĭn jing klei mbruă thâo mă yua klei knhâo kơ klei hdĭp. Sitôhmô sa čô aê êa drao mă yua klei knhâo hlăm klei mdrao gŭn pioh mdrao klei ruă duam; khua tŭk knă mă yua klei knhâo kơ mnơ̆ng ƀơ̆ng huă pioh tŭk knă mnơ̆ng ƀơ̆ng jăk; mnuih ngă lŏ hma mă yua klei knhâo bruă lŏ hma pioh buh pla čiăng kơ mnơ̆ng pla dưi mboh lu. Hlăm Hdruôm Hră Klei Aê Diê Blŭ, Aê Diê brei klei thâo mĭn kơ Y-Yôsep pioh đru mtao Êjip bruă gai gĭt ala čar (Klei Mphŭn Dơ̆ng 41:38-39). Khua Yang ăt lač mơh kơ sa čô mbruă hlăm bruă mă anăn ñu Y-Bêsalel snei:“ Kâo bi bŏ ñu leh hŏng Mngăt Myang Aê Diê, hŏng klei knhâo, klei thâo săng, klei thâo mĭn, leh anăn klei mbruă hlăm jih jang bruă ngă….” (Klei Kbiă 31:1-11). Y-Bêsalel leh anăn pô đru ñu jing Y-Ôhôliap mâo klei Aê Diê brei kơ diñu klei thâo mĭn, klei knhâo mbruă hlăm klei mčeh mkra mnơ̆ng pioh yua hlăm Sang Yang. Kyuanăn klei thâo mĭn amâo djŏ knŏng pioh hjăn kơ hlei êpul ôh, ƀiădah jing klei brei kơ jih jang êpul mnuih.
Hdruôm hră Klei Aê Diê Blŭ hưn klă snei, klei huĭ mpŭ kơ Khua Yang jing klei kčưm kơ klei thâo săng (êlan 7), leh anăn jing klei kčưm kơ klei thâo mĭn (Klei Bi Hriêng 9:10), kyuadah Aê Diê, Pô Hrih Mjing jing phŭn kơ jih jang klei thâo săng, jih jang klei thâo mĭn (Klei Bi Hriêng 2:6). “Huĭ mpŭ” mblang jing klei mpŭ mni leh anăn gưt ngă klei Khua Yang čiăng, klă klơ̆ng jing klei hriăm leh anăn hlue ngă tui si klei Khua Yang mtô. Snăn klei thâo mĭn tui si klei Khua Yang čiăng mâo hlăm anăn wăt knhuah kpă msĕ si “čiăng ngă klei kpă, klei djŏ, leh anăn klei ênuah” (êlan 3b). Mnuih lăn ala yua klei thâo mĭn čiăng dưi mâo klei kñăm čiăng kơ diñu pô dê, wăt tơdah klei anăn ba klei jhat truh kơ pô mkăn dưn. Ƀiădah bi phung huĭ mpŭ kơ Aê Diê amâo djŏ knŏng gưt klei bhiăn ƀuôn sang ƀiădah wăt klei bhiăn knhuah kpă ênô mơ̆ng Khua Yang, mbĭt anăn mđing uêñ klei tŭ dưn kơ pô mkăn mơh. Khua Yang Yêsu jing Pô “Jih jang hjiê klei thâo mĭn leh anăn klei thâo săng mdăp leh hlăm Ñu. ” (Kôlôs 2:3) mtô lač leh kơ phung ƀuôn sang Aê Diê “Snăn brei diih thâo răng msĕ si ala leh anăn ênang msĕ si mgăm” (Y-Mathiơ10:16b). Anăn jing klei mdê ti krah klei thâo mĭn ti lăn ala hŏng klei thâo mĭn hlăm Khua Yang.
Mtao Salômôn brei thâo: “phung mluk bi êmut kơ klei thâo mĭn leh anăn klei bi hriăm” (êlan 7b). Knŏng hlei pô kƀah klei thâo săng yơh amâo tŭ ôh klei bi hriăm klei thâo mĭn leh anăn dlăng hơăi mang kơ klei Khua Yang mtô lač. Diñu hưn ktưn pia kơ diñu pô jing mnuih thâo mĭn, thâo lu, amâo guôn lŏ hriăm thiăm mơ̆ng pô mkăn ôh. Phung đăo thâo kral phŭn akŏ klei thâo mĭn jing Aê Diê kyuanăn jih ai tiê hriăm Klei Aê Diê Blŭ amâo mdei ôh hŏng ai tiê huĭ mpŭ kơ Khua Yang čiăng dưi mă tŭ klei thâo mĭn Khua Yang brei.
Si ngă drei kpĭ mjuăt pô hlăm klei hriăm Klei Aê Diê Blŭ leh mơ̆ amâodah ka?
Wah lač: Ơ Khua Yang, bi mni kơ Khua Yang kơ klei thâo mĭn Khua Yang brei. Brei kâo đăm mdei ôh hriăm Klei Ih Blŭ leh anăn thâo mă yua klei pap Khua Yang brei hŏng klei thâo mĭn pioh mguôp mbĭt đru mdơ̆ng Phung Sang Aê Diê Ih. .
Dlăng Klei Aê Diê Blŭ hlăm tlâo thŭn: Y-Yôp 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
