Mathais 9:32-34
Nqe cim:
“Cov neeg savceg yuav sawv dhia cus plaws seevcev, thiab cov neeg hais tsis tau lus yuav qw zoo siab. Dejcag yuav ntws mus rau hauv tiaj suabpuam”(Yaxayas 35:6).
Lus nug rau sawvdaws xav:
- Tus neeg uas lawv coj tuaj cuag Yexus yog ib tug neeg zoo licas?
- Tswv Yexus ua dabtsi rau tus txivneej ntawd?
- Tej neeg uas nyob puag ncig tus txivneej ntawd lawv ua licas?
- Peb tabtom ua neej zoo li pab neeg twg?
Ib tsoom cov mloog txhua tus,
Tom qab uas Tswv Yexus kho ob tug txivneej digmuag zoo (nqe 28-31), Yexus thiab Nws cov thwjtim nyuam qhuav tawm hauv tsev mus ces muaj neeg coj ib tug txivneej raug dab thiab hais tsis tau lus tuaj cuag Yexus. Peb paub zoo cov neeg hais tsis tau lus tej kev nyuaj siab txomnyem, vim lawm pom thiab kov tau tiamsis hais tsis tau lawv kev xav rau lwm tus paub. Tus txivneej hais tsis tau lus no tshwjxeeb dua vim yog raug dab, txhais tau hais tias tus txivneej no raug dab Ntxwgnyoog lub hwjchim ua rau hais tsis tau lus. Thaum ib tug neeg raug dab kav ces tus neeg ntawd lub cev thiab lub siab txomnyem kawg nkaus li. Tswv Yexus pom tus txivneej ntawd txojkev txomnyem tas kev cia siab, Tswv Yexus thiaj ntiab dab thiab pub rau tus txivneej ntawd muaj kev ywjpheej.
Lo lus “Thaum Yexus ntiab dab tawm lawm, tamsim ntawd tus txivneej ntawd txawm hais tau lus” hauv nqe 33 qhia pom txog txojkev ywjpheej zoo kawg nkaus uas Tswv Yexus pub rau tus txivneej ntawd, nimno nws hnov lus, hais tau lus, tsis raug dab Ntxwgnyoog kav thiab khi lawm. Tswv Yexus tsis yog coj txojkev ywjpheej los rau sab nqaij tawv xwb tiamsis Nws coj txojkev ywjpheej rau sab ntsujplig thiab. Thaum Yexus kho ib tus neeg, tus ntawd muaj sijhawm los paub tus Tswv dhau los ntawm tej txujci tseemceeb uas Yexus ua pub nws.
Tom qab uas tus Tswv ntiab dab tawm lawm thiab kho tus txivneej raug dab hais tsis tau lus zoo lawm, peb pom muaj ob tug cwjpwm ntawm ob pab neeg nyob ib ncig ntawd: Pab tim ib, yog cov neeg uas coj tus txivneej hais tsis tau lus tuaj cuag Yexus; lawv xav tsis thoob thiab lees paub hais tias tsis tau pom dua li no nyob hauv lub tebchaws Yixalayees li, vim muaj 400 xyoo dhau los tus Tswv nyob ntsiag to tsis los hais lus rau Nws haivneeg, tsis muaj ib tug cev Vajtswv lus, tsis muaj ib zaj yogtoog qhia tshwm, tsis muaj ib yam txujci tseemceeb nyob qhov twg. Zaum no lawv pom hais tias Yexus yog tus uas los ntawm Vajtswv los, Nws thiaj ua tau tej txujci tseemceeb ntawd xwb. Pab tim ob, yog cov neeg Falixais, lawv muaj lub siab tsis ntseeg thiab thuam tus Tswv hais tias; Ntxwgnyoog uas yog dab tus thawj pub hwjchim rau Yexus, Nws thiaj ntiab tau dab tawm, qhov uas lawv hais li ntawd yog lawv tsis lees hais tias Tswv Yexus yog Vajtswv.
Nyob rau lub neej nimno, muaj ntau leej tseem tabtom raug yam ub yam no khi lawv ruaj heev, peb puas hmov tshua txog lawv, coj lawv los cuag Yexus? Txawm yog nyob puag ncig peb muaj ntau leej tawmtsam, tsis ntseeg thiab thuam tus Tswv, tiamsis thaum peb hlub tshua txog lawv thiab coj lawv los ntseeg Yexus ces lawv yuav tau txais tej uas tus Tswv ua pub rau lawv.
Thov Vajtswv,
Tus Tswv, thov Koj pab kom nyuam yaus paub hlub tshua txog cov neeg uas tab tom raug kev txomnyem, tas kev siab thiab coj lawv los cuag Koj, thov Koj rub nyuam yaus tawm hauv txojkev ua xyem xyav thiab tsis ntseeg, nyuam yaus thiaj tsis ua txhaum rau Koj. Amees.
Ib tsoom cov mloog uas hmov thiab tshua,
Peb puas rau siab ua tes haujlwm coj lwm tus los cuag tus Tswv?
Nyeem Vajluskub hauv peb lub xyoo: Nehemis 8:13-9:18
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
