Yelemis 31:3-6
Nqe cim:
“Kuv zoo siab thaum lawv yaum kuv hais tias: Peb cia li mus rau hauv tus Tswv lub tsev” (Ntawv Nkauj 122:1).
Lus nug rau sawvdaws xav:
- Haiv neeg Yixalayees zoo siab rau yam dab tsi?
- Qhov uas hais tias, cov neeg cog txiv hmab yuav tau noj lawv tej txiv hmab xav hais txog dab tsi?
- Cov “Fajxwm” hauv nqe 6, lawv tes haujlwm yog li cas ntawm kev pehawm Vajtswv?
- Yuav ua cas thiaj tau Vajtswv hloov dua tshaib kom zoo siab hauv kev pehawm Vajtswv?
Vajtswv hais rau Nws haiv neeg hais tias, thaum Vajtswv rov hloov lawv dua tshiab, ces lawv yuav muaj kev zoo siab. Tim ib, lawv zoo siab vim rov tau Vajtswv foom koob hmoov, los ntawm rov tau cog txiv hmab thiab tau sau tej txiv hmab yus cog (nqe 5). Tim ob yog, lawv rov tau mus pehawm Vajtswv, tseg ncua lub suab quaj suab seev uas ntshaw tau mus pehawm Vajtswv hauv lub nroog Yeluxalees, xaus ncua sijhawm muab tej nruas npuaj dai tseg tsis tau npuaj zoo siab mus pehawm hauv yav tas los (Ntawv Nkauj 137:1-4). Thiab thaum tau Vajtswv hloov dua tshiab, cov “fajxwm” rov los ua lawv tes haujlwm ntawm hu cov Yixalayees txhua tus nco txog tej rooj kevcai tshwjxeeb kom lawv tau rov mus hauv lub nroog Yeluxalees pehawm Vajtswv.
Tibneeg ntiajteb xav hais tias, cog txiv hmab ces tau sau tej txiv hmab uas yus cog, ntawd tsis muaj dab tsi yuav nyuaj, tiamsis qhov tseeb mas thaum yus cog txiv hmab yeej muaj tej yam tshwm tuaj raug uas yus tav tsis tau. Ntawm Vajtswv haiv neeg, lawv saib qhov uas tau cog thiab tau sau yog los ntawm Vajtswv foom koob hmoov pub. Hnub thaud, Vajtswv haiv neeg Yixalayees yuav los rau hauv lub tebchaws coglus tseg, Vajtswv hais rau lawv hais tias, yog lawv tsis ua raws li Vajtswv tej kevcai qhia, ces lawv yuav raug foom tsis zoo uas yog: ua tsev tiamsis tsis tau nyob, cog txiv hmab tiamsis tsis tau sau tej txiv uas yus cog… (II-Kevcai 28:15-37). Vajtswv cog lus cogtseg hauv phau Yelemis ua rau peb pom hais tias, Vajtswv txav deb Nws haiv neeg lawm, tiamsis nimno lawv ho tau rov los txais Vajtswv foom koob hmoov. Qhov ntawd yog kev zoo siab loj rau Vajtswv haiv neeg txhua tus, tsis yog hais txog lub ntsiab ntawm cog thiab sau qoob loo xwb. Ncua sijhawm uas Vajtswv haiv neeg tseem nyob ntawm raug Vajtswv foom tsis zoo, cov “fajxwm” saum lawv lub chaw tsom faj tsuas muaj kev ceebtoom rau sawvdaws txog kev txhawj ntshai vim tsis paub tub rog yuav tuaj tua lawv lub sijhawm twg. Tiamsis zaum no “cov fajxwm” qab siab, lawv tsuas ua tes haujlwm uas hu cov Yixalayees sawvdaws mus pehawm Vajtswv lawm xwb.
Thaum lub neej tseem nyob nrog kev txhaum, ces peb yeej tsis muaj kev zoo siab ntawm kev pehawm Vajtswv thiab tsis tau txais lub neej kaj siab uas tus Tswv pub. Cia li thov Vajtswv pab hloov kom peb muaj lub neej tshiab uas dawbhuv kom peb txhua tus thiaj muaj kev zoo siab tiag tiag mus pehawm Vajtswv.
Peb puas zoo siab thaum Vajtswv hloov peb lub neej tshiab thiab zoo siab pehawm Vajtswv?
Thov Vajtswv,
Tus Tswv uas yog Vajtswv! Koj tau hloov Koj haiv neeg txhua tiam lub neej dua tshiab, lawv tau los txais yam zoo thiab kev zoo siab pehawm Koj. Thov pab nyuam yaus nco ntsoov zoo siab thaum tau pehawm Koj. Amees.
Nyeem Vajluskub hauv peb lub xyoo: II.Xwmtxheej Vajntxwv 26:11-28:8
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
