Khiavdim 29:1-9
Nqe cim:
“Cia li hu koj tus tijlaug Aloos thiab nws cov tub: Nadas, Anpihus, Ele-axas thiab Ithamas tuaj. Muab lawv cais tawm hauv cov Yixalayees, thiab muab lawv tsa ua cov povthawj ua Kuv tes haujlwm” (Khiavdim 28:1).
Lus nug rau sawvdaws xav:
- Tus Tswv qhia kom Mauxes yuav tsum npaj li cas rau rooj kevcai tsa cov povthawj ua haujlwm?
- Ua kevcai ntxuav, muab tsoos tsho rau Aloos hnav, pleev roj rau Aloos thiab nws cov tub, yuavtsum ua li cas?
- Vajtswv tus yamntxwv twg qhia tshwm hauv rooj kevcai no?
- Yam uas peb kawm tau hauv zaj no yog dab tsi?
Tom qab uas twb tshajtawm cov neeg muaj npe los ua Povthawj (Khiavdim 28:1) thiab lub Tsevntaub twb ua tiav lawm, tus Tswv samhwm kom Mauxes npaj yuav ua kevcai tsa meejmom povthawj rau Aloos thiab nws cov tub tabmeeg Vajtswv hauv lub Tsevntaub, muab lawv cais tawm tshwjxeeb los ua Vajtswv tes haujlwm. Cov khoom fij siv los ua rooj kevcai yog ib tug menyuam heev nyuj thiab ob tug laug yaj tsis muaj ib qho phem li, muab cov tseem hmoov nplej tsis xyaw keeb zuaj ua ib cov ncuav, muab tagnrho tej ntawd ntim tuaj fij rau Vajtswv (nqe 2-3). Vim tus Tswv yog tus uas dawbhuv thiab zoo kawg nkaus, yog li ntawd tej khoom uas muab fij rau tus Tswv kuj yuav tsum yog yam zoo kawg nkaus uas tau xaiv los, yuavtsum yog tej tsiaj txhu uas tsis muaj ib qho phem thiab tej tseem hmoov nplej tsis xyaw keeb zoo kawg nkaus uas lawv muaj. Niajhnub nimno, peb tej khoom fij thiab kev fij yog qhia tshwm txog peb lub siab uas hwm tus Tswv, tsis yog peb muab tsiaj lossis tej tseem hmoov nplej lawm, tiamsis yog muab peb lub cev ua khoom fij pub rau Vajtswv kom dawbhuv thiab haum Vajtswv siab (Loos 12:1). Peb txhua tus puas tau muab yam zoo tshaj plaws los fij rau tus Tswv lawm tau?
Thaum npaj txhij lawm, Mauxes coj Aloos thiab nws cov tub mus rau tom lub qhovrooj mus hauv lub Tsevntaub, muab dej los ua kevcai ntxuav lawv (nqe 4). Qhov uas ua kevcai ntxuav no yog lub cim qhia txog kev tu lub neej dawbhuv ua ntej mus ntsib Vajtswv tus uas dawbhuv. Aloos thiab nws cov tub ua tsis tau kevcai ntxuav rau lawv tus kheej, yuav tsum yog Mauxes tus uas raug txib, sawvcev ntawm Vajtswv ua tes haujlwm ntxuav lawv. Thiab Mauxes yog tus uas muab tsoos tsho rau cov Povthawj hnav, txij li cov ris luv mus txog lub tsho uas hnav npog lub tsho efaus, lub efaus, daim ntaub npog hauvsiab, txojsiv sia, kausmom, daim phiaj kub dawbhuv… Thaum kawg thiaj yog muab roj txhawb meejthawj hliv ywg Aloos lawv, tsa lawv ua Povthawj, qhov ntawd pivtxog lub hwjchim thiab txoj koob hmoov uas tus Tswv pub rau lawv.
Nimno, cov ntseeg Tswv Yexus tau tus Tswv xaiv los ua cov Povthawj ua Nws tes haujlwm (I.Petus 2:9), peb tau Tswv Yexus cov ntshav ntxuav kom dawbhuv, tau pub muaj cai thiab pub tpeevxwm los lawv sawv ntawm Nws xubntiag thiab ua Nws tes haujlwm. Txhua yam uas hais los ntawd tsis muaj ib yam twg uas peb xwbtim ua tau, tsuas yog los ntawm tus Tswv txoj koobhmoov pub dawb rau peb xwb. Yog cov Povthawj uas ua tus Tswv tes haujlwm lawm, peb yuav tsum rau siab ntso thiab ncaj ncees ua tus Tswv haujlwm mus txog hnub kawg.
Peb tau muab dab tsi los fij rau tus Tswv kom zoo Nws siab lawm?
Thov Vajtswv:
Vajtswv Vaj Peb Leeg, nyuam yaus thov ua Vaj Leej Txiv tsaug vim Koj tau xaiv nyuam yaus los ua Koj cov menyuam nyob hauv Koj lub tebchaws ci ntsa iab. Ua Tswv Yexus tsaug vim Koj tau los tuag saum ntoo khaublig, Koj cov ntshav tau ntws los ntxuav nyuam yaus tej kev txhaum. Ua Vaj Ntsujplig tsaug vim Koj qhuab ntuas, pub tswvyim thiab nrog nyuam yaus nyob. Nyuam yaus yuav niaj hnub ua Vajtswv Koj tsaug thiab coglus yuav pehawm Koj mus txog hnub kawg. Amees.
Nyeem Vajluskub hauv peb lub xyoo: II.Xwmtxheej Vajntxwv 4:1-5:1
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
