Klei Aê Diê Blŭ: Klei Kbiă 29:1-9
Êlan kliăng: “Brei ayŏng ih Y‑Arôn hriê kơ ih mbĭt hŏng phung anak êkei ñu mơ̆ng ti krah phung ƀuôn sang Israel, čiăng pioh diñu kơ bruă Kâo jing phung khua ngă yang: Y‑Arôn leh anăn phung anak êkei ñu Y‑Nadap, Y‑Abihu, Y‑Êlêasar, leh anăn Y‑Ithamar” (Klei Kbiă 28:1).
Klei êmuh ksiêm mĭn: Ya mnơ̆ng Aê Diê mtă kơ Y‑Môis mprăp ngă hdră jing khua ngă yang? Si klei bhiăn bi doh, hơô ao ngă yang leh anăn trôč êa ƀâo mngưi kơ Y‑Arôn leh anăn phung anak êkei ñu? Ya knuih Aê Diê bi êdah klă mngač hlăm klei bhiăn anei? Ya klei drei ngă leh hriăm klei hriăm anei?
Leh răk djăp anăn phung dưi ruah ngă khua ngă yang (Klei kbiă 28:1) leh anăn Sang yang mdơ̆ng leh leh, Aê Diê mtrŭn asăp kơ Y‑Môis mprăp kơ hdră jing khua ngă yang kơ Y‑Arôn leh anăn phung anak êkei ñu hlăm sang čhiăm klei bi kƀĭn, pioh hjăn diñu jing doh čiăng mă bruă kơ Aê Diê. Mnơ̆ng ngă yang mâo sa drei êmô knô dam leh anăn dua drei biăp knô amâo mâo anôk jhat ôh, yua kpŭng amâo mâo kpei kpit dŭm mta ƀêñ ba myơr kơ Aê Diê (êlan 2-3). Kyua Aê Diê jing doh jăk leh anăn kluôm ênŭm kyua anăn mnơ̆ng myơr kơ Ñu ăt brei kluôm ênŭm mơh, dưi ruah bi klă, dŭm drei mnơ̆ng jăk hĭn hŏng mta kpŭng ƀhĭ jăk hĭn diñu mâo. Hruê anei, mnơ̆ng mâo leh anăn klei drei myơr bi êdah klei mpŭ kơ Aê Diê, anăn amâo djŏ jing mnơ̆ng myơr amâodah kpŭng ƀhĭ ôh ƀiădah jing asei mlei drei jing mnơ̆ng myơr hdĭp leh anăn doh bi mơak Aê Diê (Rôm 12:1). Grăp čô drei myơr leh kơ Aê Diê ya mnơ̆ng jăk hĭn leh mơ̆ ka?
Leh anăn Y‑Môis ba Y‑Arôn leh anăn phung anak êkei ñu nao ti anăp ƀăng bhă sang čhiăm klei bi kƀĭn leh anăn bi mnei diñu hŏng êa (êlan 4). Klei bi mnei tinei jing bi hmô kơ klei bi doh êlâo kơ nao ti anăp Aê Diê doh jăk. Y‑Arôn leh anăn phung anak ñu amâo čŏng bi mnei pô ôh ƀiădah Y‑Môis jing pô Aê Diê tiŏ nao ngă klei bi doh. Y‑Môis ăt jing pô hơô brei čhiăm ao kơ phung khua ngă yang, mơ̆ng ao hlăm lam truh kơ ao jhung êphôt, mnal đah da, hyuă hdrăng kơiêng êphôt mñam hŏng klei mbruă, mđua mu ti boh kŏ ñu…Knhal tuč jing mă êa ƀâo mngưi pioh trôč ti boh kŏ ñu, bi hmô kơ klei ktang leh anăn klei pap Aê Diê brei kơ diñu.
Aê Diê ruah Phung đăo kơ Krist hruê anei čiăng jing khua ngă yang sang mtao (I Y‑Pêtrôs 2:9), drei mâo êrah Khua Yang Yêsu Krist bi doh, mjing guh kơang leh anăn brei klei dưi čiăng dưi dôk ti anăp Khua Yang Yêsu leh anăn mă bruă kơ Ñu. Jih jang klei anăn amâo mâo ôh hlei pô hlăm phung drei čŏng pô dưi ngă ƀiădah knŏng kyua klei pap Aê Diê brei kơ drei. Jing Khua ngă yang sang mtao, brei drei jih ai tiê leh anăn sĭt suôr mă bruă kơ Aê Diê êla truh knhal tuč.
Ya klei drei myơr kơ Aê Diê čiăng bi mơak kơ Ñu?
Wah lač: Ơ Aê Diê Tlâo Yang, kâo bi mni lač jăk kơ Aê Diê Ama ruah leh kâo dưi jing phung ƀuôn sang hlăm ƀuôn guh kơang Ih. Kâo bi mni lač jăk kơ Khua Yang Yêsu săn leh asei ti kyâo bi kal, tuh êrah čiăng lăm brei klei soh kâo. Kâo bi mni lač jăk kơ Yang Mngăt Jăk bŏ hŏng klei myang dôk mbĭt bi hriăm, brei klei ktang leh anăn mđua kơ kâo klei guh kơang. Kâo hdơr knga bi mni kơ Aê Diê leh anăn ƀuăn srăng mă bruă sĭt suôr ti anăp Ih truh hruê knhal tuč.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 4:1 – 5:1
Kênh Youtube BHKTHN:
