Chivkeeb 22:1-14
Nqe cim:
“Mloog tus Tswv lus zoo dua qhov uas muab tej yaj zoo nkauj tua fij rau nws.” (I.Xamuyees 15:22b).
Lus nug rau sawvdaws xav:
- Vajtswv sim Anplahas siab licas?
- Anplahas mloog lus licas?
- Koobhmoov ntawm nws kev mloog lus yog tau dabtsi?
- Peb ua qhia tshwm kev mloog Vajtswv lus licas nyob hauv kev pehawm Nws?
Thaum Vajtswv pub rau Anplahas muaj tus tub Ixaj li tau coglus tseg lawd, Vajtswv xav “sim” Anplahas txojkev ntseeg los ntawm qhov uas hais kom nws coj nws tus tub Ixaj mus tua hlawv fij rau Vajtswv (nqe 1-2). Dhau ntawm kev sim siab no, Vajtswv xav pom Anplahas kev mloog Vajtswv lus tuag nthi. Anplahas tsis nug lossis tsis yws dabtsi hlo li tiamsis nws cia siab tagnrho rau tus Tswv, txiav txim siab ua raws tus Tswv tej lus hais txawm hais tias Ixaj yog nws tib leej tub li tau coglus tseg lawm. Anplahas sawv ntxov, npaj txhua yam coj mus fij rau tus Tswv (nqe 3). Txawm hais tias thaum ntawd tej zaug Anplahas tsis tshua tus siab rau kev pehawm pes tsawg.
Kev pehawm Vajtswv nyob tiam Vajluskub Qub qhia tshwm los ntawm qhov uas teeb ib lub thaj cia hlawv khoom fij pub rau Vajtswv. Lo lus “pehawm” thawj zaug tshwm muaj hauv phau Vajluskub yog nyob rau hauv nqe 5 thaum Anplahas hais rau nws ob tug tubtxib nyob tos nws thiab nws tus tub Ixaj mus pehawm tus Tswv, nkawd mam rov qab los. Qhov no qhia pom hais tias Anplahas yeej ntseeg hais tias nws thiab Ixaj yuav rov los, tsis yog tsuas muaj nws los xwb. Anplahas tau qhia tshwm nws txojkev ntseeg ruaj khov rau Vajtswv txojkev muab pub thiab txojkev npaj tseg. Tus sau phau Henplais kuj sau hais tias: “Anplahas cia siab hais tias txawm yog Ixaj tuag lawm los Vajtswv yuav tsa Ixaj sawv hauv qhov tuag rov qab los. Qhov uas Vajtswv cheem tsis pub Anplahas tua Ixaj, qhov ntawd piv ib yam li Ixaj sawv hauv qhov tuag rov qab los ntag.” (Henplais 11:19). Anplahas cia siab rau Vajtswv lub hwjchim thiab Vajtswv kev npaj tseg, yog li ntawd nws thiaj ua raws li Vajtswv hais tuag nthi. Txawm yog yuav muab nws tus tub uas nws hlub los hlawv fij rau tus Tswv, los nws yeej ntseeg hais tias tus Tswv yuav tsa Ixaj sawv hauv qhov tuag rov los, thiab nws kuj mus raws kev ntseeg hais tias “Vajtswv yuav muab ib tug menyuam yaj” ua khoom fij rau nkawd (nqe 8). Vim li ntawd, Anplahas thiaj ua raws Vajtswv tej lus hais tsis ua xyemxyav hlo li. Thaum kawg txoj koobhmoov uas Anplahas tau txais ntawm nws txojkev ntseeg yog Vajtswv tau npaj ib tug laug yaj rau nws tua hlawv ua khoom fij rau Vajtswv hloov nws tus tub chaw (nqe 13).
Zaj no qhia tshwm txog Anplahas txojkev mloog Vajtswv lus tuag nthi. Tej haujlwm uas Anplahas tau ua yog timkhawv rau nws txojkev cia siab rau tus Tswv thiab zoo siab fij yam uas tseemceeb tshajplaws los mus pehawm tus Tswv. Niaj hnub nimno, tus Tswv kuj xav kom Nws haivneeg yuavtsum mloog lus nyob hauv kev pehawm. Kev mloog tus Tswv lus ua qhia tshwm los ntawm kev ua raws li tus Tswv tej lus nyob hauv Phau Vajluskub. Thaum tuaj hauv Tuamtsev pehawm tus Tswv ces yuavtsum tus lub siab tig los cuag tus Tswv, tsis cia lwm yam rub yus lub siab, thiab npaj siab fij yam zoo tshajplaws pub rau Nws.
Peb puas npaj siab fij yam uas zoo tshajplaws pub rau tus Tswv txhua zaus uas peb mus pehawm Nws?
Thov Vajtswv:
Tus Tswv, thov pab nyuam yaus kawm tau Anplahas tus qauv, kom nyuam yaus mloog thiab ua raws Koj tej lus, zoo siab fij yam zoo tshajplaws ua yam khoom fij uas haum Koj siab pub rau Koj. Amees.
Nyeem Vajluskub hauv peb lub xyoo: I.Xwmtxheej Vajntxwv 7:1-29
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
