Klei Aê Diê Blŭ: Klei Mphŭn Dơ̆ng 22:1-14
Êlan kliăng: “Nĕ anei, klei gưt asăp jing jăk hĭn kơ klei ngă yang, leh anăn klei dôk hmư̆ jing jăk hĭn kơ prăi biăp knô.” (I Y‑Samuel 15:22b).
Klei êmuh ksiêm mĭn: Si klei Aê Diê lông dlăng Y‑Abraham? Si Y‑Abraham gưt asăp? Ya jing boh tŭ dưn mơ̆ng klei ñu gưt asăp? Si drei bi êdah ai tiê gưt asăp hlăm klei kkuh mpŭ?
Leh brei kơ Y‑Abraham anak klei ƀuăn jing Y‑Isăk, Aê Diê čiăng “lông dlăng” klei đăo ñu hŏng klei mtă brei myơr Y‑Isăk jing mnơ̆ng myơr čuh kơ Aê Diê (êlan 1-2). Mơ̆ng klei mtă anei, Aê Diê čiăng ƀuh ai tiê ñu gưt asăp khut khat. Y‑Abraham amâo mâo klei lŏ êmuh wĭt amâodah blŭ duñ ôh ƀiădah ñu đăo knang kơ Aê Diê kluôm dhuôm čuăn gưt asăp khădah Y‑Isăk jing anak mâo knŏng sa čô tui si klei ƀuăn dưn. Ñu kgŭ ưm aguah, mprăp jih jang mnơ̆ng kơ bruă myơr mnơ̆ng kkuh mpŭ kơ Aê Diê (êlan 3). Wăt tơdah ai tiê Y‑Abraham hlăk anăn dleh êdi yơh knŏng bi mĭn kơ klei kkuh mpŭ.
Klei kkuh mpŭ kơ Aê Diê hlăm ênuk Klei Bi Mguôp Hđăp bi êdah hŏng klei mkra knưl kkuh mpŭ, myơr mnơ̆ng ngă yang kơ Aê Diê. Boh blŭ “kkuh mpŭ” tal êlâo hĭn ƀuh hưn hlăm Klei Aê Diê Blŭ hlăm êlan 5 hlăk Y‑Abraham lač kơ dua čô dĭng buăl dôk guôn ñu leh anăn Y‑Isăk nao kkuh mpŭ kơ Aê Diê leh anăn diñu dua srăng lŏ wĭt. Hlăm klei blŭ phŭn, êlan anei yua boh blŭ čiăng lač kơ lu mnuih msĕ si klei mblang hlăm hdruôm hră: “Hmei srăng kkuh mpŭ leh anăn hmei lŏ hriê kơ diih”. Klei anei brei ƀuh Y‑Abraham đăo sĭt ñu leh anăn Y‑Isăk srăng lŏ wĭt, amâo djŏ knŏng hjăn ñu ôh. Y‑Abraham bi êdah klei ñu đăo khut khat kơ Aê Diê Pô thiê brei leh anăn mprăp brei leh. Wăt pô čih hră Hêbrơ ăt čih mơh: “Ñu mĭn kơ Aê Diê mâo klei myang dưi lŏ bi hdĭp phung djiê leh; čiăng lač msĕ si ñu lŏ mă wĭt Y‑Isăk mơ̆ng klei djiê.” (Hêbrơ 11:19). Y‑Abraham đăo kơ klei myang leh anăn klei Aê Diê thiê brei kyuanăn ñu khut khat đup gưt. Khădah săn asei myơr anak êkei ñu mâo knŏng sa čô jing mnơ̆ng myơr ngă yang kơ Aê Diê msĕ si klei Ñu mtă, ñu ăt đăo Aê Diê srăng lŏ bi hdĭp gơ̆, mđrăm mbĭt hŏng klei anăn ñu êbat nao hŏng klei đăo “Aê Diê pô srăng brei êđai biăp pioh kơ mnơ̆ng myơr čuh” (êlan 8). Kyuanăn, ñu amâo kĭ kơ̆ ôh gưt asăp Aê Diê mtă. Boh tŭ dưn mơ̆ng klei ñu đăo, Aê Diê mprăp brei leh sa drei biăp knô pioh kơ ñu ngă mnơ̆ng myơr čuh hrô anak êkei ñu (êlan 13).
Klei yăl dliê anei lač kơ klei Y‑Abraham khut khat gưt asăp Aê Diê. Bruă ñu ngă hưn bi sĭt klei ñu đăo knang kơ Aê Diê leh anăn hmiêt mkăp săn asei myơr klei yuôm hĭn pioh kkuh mpŭ kơ Aê Diê. Hruê anei, Aê Diê ăt čoh čuăn kơ phung anak Ñu brei thâo gưt asăp hlăm klei kkuh mpŭ mơh. Gưt asăp kơ Aê Diê bi êdah hlăm ai tiê kpĭ mjuăt pô ngă tui si klei Aê Diê mtô mơ̆ng Klei Aê Diê Blŭ. Tơdah nao Sang Aê Diê bi kƀĭn kkuh mpŭ brei hrui kƀĭn ai tiê klei mĭn pioh knŏng kơ Khua Yang, amâo lui ya mta klei mkăn bi kpăk gun ôh leh anăn hmiêt mkăp myơr ya klei jing jăk hĭn kơ Ñu.
Si ngă drei mkăp myơr kơ Khua Yang ya mta klei yuôm hĭn jing mnơ̆ng ngă yang grăp blư̆ nao kkuh mpŭ kơ Ñu mơ̆?
Wah lač: Ơ Khua Yang, akâo kơ Ih đru kâo tui hriăm mơ̆ng klei Y‑Abraham bi hmô, thâo kpĭ mjuăt pô gưt asăp Khua Yang, mkăp myơr ya klei yuôm hĭn kơ Ih jing mnơ̆ng ngă yang kkuh mpŭ bi mơak kơ Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 7:1-29
Kênh Youtube BHKTHN:
