Klei Aê Diê Blŭ: II Klei Yăl Dliê 8:16-18.
Êlan kliăng: “Jih jang klei jăk jĭn anei srăng truh kơ diih leh anăn jing dŏ diih tơdah diih gưt asăp Yêhôwa Aê Diê diih” (Klei Mtô Mñă Klei Bhiăn 28:2).
Klei êmuh ksiêm mĭn: Si ai tiê Mtao Y‑Salômôn mkŏ mjing leh Sang Yêhôwa? Ya klei drei ƀuh kơ Mtao Y‑Salômôn mơ̆ng bruă ñu mnia blei dưi lač tinei? Ya ngă mâo dŭm klei anei? Ya klei drei ƀuh Aê Diê hơêč hmưi kơ pô?
Trăn Klei Aê Diê Blŭ anei brei ƀuh “Snăn sang Yêhôwa leh leh…” (êlan 16b). Bruă bi leh rŭ mdơ̆ng Sang Yang mguôp hŏng klei Mtao Y‑Salômôn gĭr ktưn hlăm bruă mprăp mơ̆ng mnơ̆ng dhơ̆ng rŭ mdơ̆ng truh kơ dŭm klei čiăng mkăn. Klei mprăp anei dưi hluê ngă jăk mơ̆ng hruê mdơ̆ng tur sang êla truh kơ bi leh. Lač mkăn, kyua klei gưt asăp Aê Diê (I Bruă Mtao 5:5), Mtao Y‑Salômôn mphŭn rŭ mdơ̆ng Sang Yang hŏng ai tiê gĭr amâo mdei leh bruă rŭ mdơ̆ng dưi bi leh.
Dua êlan knhal tuič hlăm kdrêč 8 lač kơ bruă mnia blei leh anăn klei mdrŏng sah ăt msĕ mơh klei hing ang mơ̆ng Mtao Y‑Salômôn (êlan 17-18). Dưi lač anei jing dua klei yăl dliê lŏ čuê mguôp hŏng bruă bi leh rŭ mdơ̆ng Sang Yêhôwa (êlan 16) hŏng bruă Mtao Y‑Salômôn dưi mâo klei hơêč hmưi prŏng prĭn mơ̆ng Aê Diê brei kơ klei ñu gưt asăp hlăm bruă rŭ mdơ̆ng Sang Yang (II Klei Yăl Dliê 8:17 – 9:28). Dua êlan 17-18 anei jing klei mngač tal êlâo brei drei ƀuh klei mdrŏng sah leh anăn kơhưm mơ̆ng Mtao Y‑Salômôn hŏng dŭm čar riêng gah.
Lu ngăn drăp Mtao Y‑Salômôn dưi mâo jing kyua bruă mnia blei hlăm êlan êa ksĭ. Bruă mnia blei anei mâo klei đru ai mơ̆ng mnuih Phênisi, hlăk hing ang kơ bruă rŭ mdơ̆ng hŏng bruă nao hlăm êa ksĭ (Y‑Êsai 23:1). Mtao pô nao ti Êsiôn Ghêƀe leh anăn Êlôs ti hang ksĭ hlăm čar Êđôm, jing dua kdrŭn ksĭ prŏng ti nah Ngŏ Êa ksĭ Hrah, čiăng ksiêm dlăng bruă mnia blei mnơ̆ng hlăm êa ksĭ tinăn. Mtao Y‑Salômôn amâo djŏ knŏng păn dŭm ktuê êlan phŭn hlăm bruă mnia blei hlăm lăn hang ôh (II Klei Yăl Dliê 8:4) ƀiădah ñu hŏng Mtao Y‑Huram lŏ mnia blei hlăm êlan êa ksĭ, brei ƀuh klei mdrŏng sah ăt msĕ mơh bruă mnia blei prŏng mơ̆ng Mtao Y‑Salômôn ênuk anăn.
Leh lač kơ klei mdrŏng sah, tŭ dưn, thâo mĭn, hing ang…. êdah kdlưn mơ̆ng Mtao Y‑Salômôn, hdruôm hră II Klei Yăl Dliê čiăng kơ phung drei ƀuh klei hơêč hmưi ñu dưi mâo leh gưt asăp Aê Diê čiăng rŭ mdơ̆ng Sang Yang. Đưm dih, Y‑Abraham gưt asăp Aê Diê myơr anak êkei sa čô ñu jing Y‑Isăk anăn Aê Diê ƀuăn leh hŏng ñu: “Jih jang phung găp djuê hlăm lăn ala srăng mâo klei jăk jĭn kyua phung anak čô ih, kyuadah ih gưt leh asăp kâo.” (Klei Mphŭn Dơ̆ng 22:18). Aê Diê jing phŭn mơ̆ng klei hơêč hmưi (Y‑Yakơ 1:17). Ñu dưi brei kơ drei djăp klei hơêč hmưi wăt mngăt leh anăn hlăm asei mlei tui si klei Aê Diê čiăng, leh anăn sa hlăm dŭm bruă ngă čiăng dưi mâo klei Aê Diê hơêč hmưi jing hdĭp gưt asăp.
Drei klă sĭt hdĭp gưt asăp leh mơ̆ ka? Hlăm ya bruă diih bi êdah klei pô gưt asăp hlăm klei hdĭp grăp hruê?
Wah lač: Ơ Khua Yang, akâo kơ Ih pap brei klei kâo amâo gưt asăp ngă kơ kâo amâo dưi mâo klei Ih hơêč hmưi. Akâo kơ Ih brei kâo hdĭp gưt asăp Aê Diê čiăng hdĭp bi mơak kơ Ih nanao.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 25
Kênh Youtube BHKTHN:
