2 Xwmtxheej Vajntxwv 8:16-18
- Txhua yam uas Xalumoos ua puavleej tiav tas rau lub sijhawm no, tsis hais thaum pib ua tus Tswv lub Tuamtsev thiab tej khoom siv hauv lub Tuamtsev.
- Ces Xalumoos txawm mus rau hauv lub nroog Exi-oonkenpes thiab Elas uas nyob ntawm ntug hiavtxwv hauv tebchaws Edoos. 18 Vajntxwv Hilas tso nws cov nomtswv saib cov neeg uas txawj tsav nkoj, tsav nws cov nkoj nrog Xalumoos cov nomtswv mus rau nram tebchaws Aufiles thiab thauj tau kaum rau tas kub los rau Xalumoos.
Nqi cim:
“Yog nej mloog tus Tswv uas yog nej tus Vajtswv lus, nej yuav tau tej koob hmoov no” (2-Kevcai 28:2).
Lus nug rau sawvdaws xav:
- Vajntxwv Xalumoos muaj yam ntxwv zoo li cas thaum ua lub Tuamtsev?
- Vajntxwv Xalumoos tes haujlwm ua lag luam uas hais rau hauv ntu Vajluskub no qhia paub nws yog tus neeg zoo li cas?
- Vim li cas Xalumoos tau tej ntawd?
- Peb tabtom tau tej koob hmoov dabtsi ntawm Vajtswv?
Ntu Vajluskub no qhia peb paub lub Tuamtsev “Xalumoos ua puavleej tiav tas…” (nqi 16). Vajntxwv Xalumoos siv zog npaj txhua yam kom ua tiav lub Tuamtsev, tsis hais thaum pib ua lub Tuamtsev thiab tej khoom siv hauv lub Tuamtsev. Nws ua tib zoo npaj thaum pib ua lub plag mus txog thaum ua tiav. Lossis hais tau hais tias, vim nws mloog Vajtswv lus (1Vajntxwv 5:5), Vajntxwv Xalumoos nqis tes ua lub Tuamtsev kub siab lug tsis nres, tsis so mus txog hnub tes haujlawm ntawd tiav tas.
Ob nqi kawg hauv tshooj 8 no hais txog Vajntxwv Xalumoos lub suab npe ua lag ua luam thiab kev npluanuj (nqi 17-18). Peb suav tau hais tias, ob nqi no yog ob nqi hais txuas ntxiv txog tes haujlwm ua lub Tuamtsev (nqi 16) thiab tej koob hmoov uas Vajtswv pub rau Xalumoos, vim nws mloog lus los ntawm ua lub Tuamtsev (2 Xwmtxheej Vajntxwv 8:17-9:28). Ob nqi 17-18 no qhia rau peb paub Vajntxwv Xalumoos txojkev npluanuj thiab nws lub suab npe nrov mus rau cov tebchaws nyob ibncig.
Tej khoom uas Vajntxwv Xalumoos muaj, puavleej yog los ntawm kev ua lag luam hauv hiavtxwv los. Qhov kev ua lag luam no mus tau zoo twb yog muaj kev pab los ntawm cov neeg nyob lub xeev Faunikias, vim lawv ibtxwm nto npe txog kev ua vaj ua tsev thiab ua lag luam tom hiavtxwv (Yaxayas 23:1). Vajntxwv txawm mus txog ntua lub nroog Exi-oonkenpes thiab Elas uas nyob ntawm ntug hiavtxwv hauv tebchaws Edoos, yog ob lub tshav nres nkoj nyob sab hnubtuaj ntawm hiavtxwv liab saib tej haujlwm ua lag luam ntawd. Vajntxwv Xalumoos tsis yog qhib kev ua lag ua luam saum nqhuab xwb (2-Xwmtxheej Vajntxwv 8:4), nws tseem nrog Vajntxwv Hilas qhib kev ua lag ua luam hauv hiavtxwv thiab. Qhov no qhia paub hais tias Xalumoos txojkev npluanuj thiab nws kev ua lag ua luam dav li cas nyob rau tiam ntawd.
Thaum hais txog Vajntxwv Xalumoos txojkev vammeej, kev ua haujlwm, kev txawj ntse thiab nto suab npe…, phau ntawv 2-Xwmtxheej Vajntxwv xav qhia rau peb pom tej koob hmoov uas Xalumoos tau thaum nws mloog Vajtswv lus ua lub thiab Tuamtsev. Thaum ub, yawgkoob Anplahas mloog Vajtswv lus muab nws tus tub Ixaj fij rau Vajtswv raws li tus Tswv hais. Vajtswv coglus rau Anplahas hais tias: “Kuv yuav foom koob hmoov tawm ntawm koj cov xeebntxwv mus rau txhua haivneeg uas nyob thoob ntiajteb, vim koj mloog kuv lus” (Chivkeeb 22:18). Vajtswv yog lub hauvpaus koob hnoov (Yakaunpaus 1:17). Nws muaj peevxwm pub tau koob hmoov rau peb sab ntsujplig thiab sab nqaij tawv raws li nws siab nyiam. Qhov uas peb yuav tau txais Vajtswvtej koob hmoov yog ua neeg mloog Vajtswv lus.
Peb puas ua lub neej mloog Vajtswv lus? Koj thiab kuv qhia tawm txojkev mloog lus los ntawm yam dabtsi hauv lub neej txhua hnub?
Thov Vajtswv:
Vajtswv, thov koj zam txim rau nyuam yaus, vim nyuam yaus tsis txawj mloog koj lus thiaj tsis tau txais koj txoj koob hmoov. Thov koj pab kom nyuam yaus paub ua neeg mloog koj lus ua rau koj tau ntsejmuag. Ameeg.
Email: kawmvajluskubtxhuahnub@gmail.com
Kênh Youtube BHKTHN:
