Klei Aê Diê Blŭ: II Y‑Samuel 11:2-5
Êlan kliăng: “Ƀiădah grăp čô mnuih mâo klei mplư tơdah klei ñu pô tluh hrip leh anăn mdluh ñu. ” (Y‑Yakơ 1:14).
Klei êmuh ksiêm mĭn: Si klei mplư ktŭng hrip mtao Y‑Đawit? Si boh ñu mă tŭ mơ̆ng klei anăn? Si brei phung đăo ngă čiăng krơ̆ng mkhư̆ hĕ klei tluh čiăng?
Klei Aê Diê Blŭ čih hưn klă sĭt klei mtao Y‑Đawit ngă klei soh knhông hŏng H’Batsêba. Hlăk êjai phung khua kahan leh anăn phung kahan nao kơ kdrăn blah, bi mtao Y‑Đawit dôk ti sang leh anăn pĭt yang hruê tơl truh tlam kơh kgŭ mơ̆ng jhưng pĭt. Leh anăn êjai dôk êbat ti dlông čuôr sang mtao, mơ̆ng čuôr ñu tăm ƀuh hĕ sa čô mniê siam dôk mnei (êlan 2). Năng djŏ, mtao wir ƀŏ ñu ti anôk mkăn, đăm dlăng ôh čiăng weh đuĕ hĕ mơ̆ng klei mplư anei. Tinei lĕ, mtao amâo djŏ knŏng dlăng čiăng nik ôh, ƀaih lŏ tiŏ brei arăng nao êmuh čiăng thâo kơ mniê anăn (êlan 3). Tơdah arăng hưn kơ mtao, mniê anăn mâo ung leh, djŏ gơ̆ mtao mjưh mơ̆ng anăn yơh. Ƀiădah hơăi, mtao phưi lui brei klei tluh ktŭng hrip ñu, tơl tiŏ nao arăng mă ba H’Batsêba kơ sang mtao hriê đih pĭt hŏng ñu, čiăng bi hrăp klei ñu tluh čiăng (êlan 4).
Klei yăl dliê amâo mjưh tăp năn ôh. Leh kbiă mơ̆ng sang mtao wĭt kơ sang pô, H’Batsêba ba tian (êlan 5). Hlăk anăn, mtao Y‑Đawit duah êlan čiăng mdăp klei soh ñu, jih tal anei kơ tal mkăn, leh anăn ti knhal tuč atăt ñu truh kơ klei soh bi mdjiê Y‑Uri, jing ung H’Batsêba (êlan 6‑24). Mtao Y‑Đawit ngă klei soh knhông wăt klei soh bi mdjiê mnuih êjai anăn ñu jing mtao Israel, thâo săng klă Klei Bhiăn Y‑Môis. Sĭt nik ñu mă tŭ yơh boh mơ̆ng bruă ñu ngă, hlăk Aê Diê amâo brei ôh anak mơ̆ng klei soh anăn dưi hdĭp (II Y‑Samuel 12:15‑18). Jing klei ênguôt êdi yơh kơ sa čô mtao mâo klei thâo knhâo, mâo klei dưi leh anăn thâo huĭ mpŭ kơ Aê Diê, ƀiădah phưi lui hĕ bhiâo rit klei awăt êdu ai tiê, amâo dưi kiă kriê asei pô, amâo dưi krơ̆ng mkhư̆ klei tluh čiăng, lui klei tluh ktŭng hrip mdluh ñu atăt kơ klei ngă soh.
Ktuê jih hƀuê ênuk, drei hmư̆ lu klei yăl dliê kơ phung jhŏng ktang, kơ phung mtao, kơ phung khua kiă kriê mâo klei thâo knhâo hing ang, tơl wăt kơ phung dĭng buăl leh anăn phung anak Aê Diê, ăt tuôm lĕ mơh hlăm mnêč kđông klei tluh čiăng. Klei mplư truh grăp hruê hlăm klei hdĭp drei, leh anăn yang jhat dăng kđông mnêč mgêč êdi, tơl drei amâo thâo kral ôh. Knŏng sa mnĭt mmông amâo yŏng mđing uêñ, amâo dôk djŏ hnơ̆ng, kƀah kriê răng kơ asei pô, drei srăng ênưih pưih lĕ mtam. Y‑Yakơ mtô mtă: “Snăn đup gưt bĕ kơ Aê Diê. Bi kdơ̆ng bĕ hŏng yang jhat, leh anăn ñu srăng đuĕ kbưi mơ̆ng diih.” (Y‑Yakơ 4:7). Êlan kliăng čiăng dưi bi kdơ̆ng hŏng yang jhat leh anăn weh đuĕ kbưi mơ̆ng klei mplư, brei drei “đup gưt bĕ kơ Aê Diê”, čiăng lač, brei Yang Mngăt Jăk kiă kriê kluôm leh anăn jing khua kơ ai tiê drei. Hlăk klei tluh kgŭ đĭ, hrip mdluh drei, brei drei knang mtam kơ Yang Mngăt Jăk đru drei, mĭn mtam kơ boh srăng mă tŭ huĭ hyưt mơ̆ng klei soh, čiăng weh đuĕ kbưi mơ̆ng ñu. Phung đăo brei hriăm thâo krơ̆ng mkhư̆ klei tluh čiăng, hŏng klei mđăo mjuăt asei pô hŏng knuih dôk djŏ hnơ̆ng mơ̆ng Yang Mngăt Jăk. Êran đuĕ bĕ mơ̆ng klei mplư msĕ si Y‑Yôsep, đăm phưi lui klei tluh ktŭng hrip drei tơl mdluh pô truh kơ klei ngă soh msĕ si mtao Y-Đawit ôh.
Si ngă, Ih khăng dluh lĕ amâodah dưi hĭn hŏng klei tluh mplư?
Wah lač: Ơ Yang Mngăt Jăk Aê Diê, akâo Ih đru kâo thâo krơ̆ng mkhư̆ klei tluh, čiăng kơ đăm kâo lĕ hlăm klei mplư leh anăn ngă soh hŏng Ih ôh. Akâo Ih đru kâo hriăm mjuăt knuih dôk djŏ hnơ̆ng hlăm klei hdĭp grăp hruê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 24:1-25:13
Kênh Youtube BHKTHN:
