Klei Mmuñ Hđăp 27:1-14
Klei Aê Diê Blŭ: Klei Mmuñ Hđăp 27:1-14
Êlan kliăng: “Kâo đăo kâo srăng ƀuh klei jăk Yêhôwa ti lăn ala phung hdĭp!” (Klei Mmuñ Hđăp 27:13)
Klei êmuh ksiêm mĭn: Hŏng Mtao Y-Đawit, hlei Pô jing Yêhôwa? Ya mta klei ñu hmăng hmưi? Ya ngă? Ya mta klei mtrŭt Mtao Y-Đawit dưi dôk kjăp ti anăp klei truh dleh dlan leh anăn phung roh dôk ksŭng ngă? Thâo kral kơ Aê Diê jing klei jăk, si klei ktang ba truh kơ drei?
Dleh snăk čiăng dưi thâo klă ti klei truh sĭt êmĭt kơ klei hdĭp, mtrŭt Mtao Y-Đawit čih Klei Mmuñ Hđăp 27, sa hlăm đơ Klei Mmuñ Hđăp ba klei bi juh prŏng hĭn kơ phung anak Aê Diê găn lu ênuk. Klei Mmuñ Hđăp anei mâo dua kdrêč klă klơ̆ng: năm êlan tal êlâo, jing klei pô čih hră hưn bi êdah klei ñu đăo kơ Aê Diê, leh anăn dơ̆ng mơ̆ng êlan 7 jing klei wah lač mơ̆ng mngăt ñu, myơr kơ Pô ñu khăp leh anăn đăo knang.
Ti krah klei hdĭp bŏ hŏng klei dleh dlan leh anăn phung roh kwang dar snăn Yêhôwa yơh jing klei mngač, kđông mgang, leh anăn jing klei bi mtlaih kơ Mtao Y-Đawit (êlan 1). Kyuanăn yơh, mta klei ñu hmăng hmưi hĭn “jing klei dôk hlăm sang Yêhôwa jih jang hruê kâo dôk hdĭp, čiăng dlăng klei siam Yêhôwa” (êlan 4). Mtao Y-Đawit amâo mâo knang kơ phung kahan, klei thâo mĭn, amâodah phung dôk sĭt suôr hŏng ñu ôh, ƀiădah ñu knang kơ klei jăk Yêhôwa. Msĕ si Mtao Y-Đawit mơh, drei jing phung mâo klei jăk mơak tơdah dưi thâo kral leh kkuh mpŭ kơ Aê Diê Klei Jăk. Klei jăk Aê Diê bi êdah hŏng bruă jăk Ñu hrih mjing, hŏng hdră bi mtlaih mnuih yuôm bhăn, leh anăn hŏng klei Ñu sĭt suôr hŏng drei grăp hruê.
Klei sĭt suôr Aê Diê brei Mtao Y-Đawit dưi dôk đăo kjăp hlăm klei hdĭp. Hŏng ñu, êngao kơ Aê Diê, amâo mâo ôh pô năng kơ ñu đăo knang kluôm dhuôm, kyuadah “Wăt tơdah amĭ ama kâo lui kâo, Yêhôwa srăng jum kâo” (êlan 10). Klei jăk Aê Diê yơh jing anôk Mtao Y-Đawit đăo knang kluôm jih klei hdĭp ñu, krơ̆ng ñu amâo êdu ai ôh (êlan 13). Anei ăt jing klei ba brei kơ drei klei êđăp ênang hlăm djăp mta klei truh, wăt tơdah jih jang mnuih wir rŏng hŏng drei, wăt klei hdĭp drei mâo lu klei ngă soh, klei jăk Aê Diê ăt kăn lui drei mơh leh anăn klei khăp klei pap Ñu ăt pioh brei kơ drei nanao.
Drei dôk găn đơ thŭn mlan klei ruă tưp dleh dlan, leh anăn amâo dưi thâo ôh ya mta klei srăng truh, ƀiădah drei thâo sĭt nik Aê Diê drei kkuh mpŭ jing jăk êdimima, Ñu kăp mđing hmư̆ nanao klei drei kwưh akâo, amâo tuôm lui drei ôh, leh anăn ăt jing klei mngač mtrang, kđông mgang, leh anăn klei bi mtlaih kơ drei. Dôk kjăp bĕ hlăm klei đăo kơ Aê Diê klei jăk, leh anăn hơêč hmưi bi mni kơ klei sĭt suôr Ñu nanao, msĕ si klei Mtao Y-Đawit klah čŭn hlăm Klei Mmuñ Hđăp 27:14 “Čang guôn bĕ kơ Yêhôwa; brei ih jing ktang leh anăn jhŏng; Sĭt yơh, dôk guôn bĕ kơ Yêhôwa”. Drei wah lač mđrăm mbĭt,
Si ngă drei thâo kral Aê Diê Klei Jăk mơ̆, čiăng dôk kjăp hlăm klei đăo kơ Ñu leh anăn êbat mbĭt hŏng Ñu grăp hruê?
Ơ Khua Yang, bi mni kơ Khua Yang kyua klei jăk Ih. Akâo kơ Ih brei kơ kâo mâo ai tiê msĕ si Mtao Y-Đawit, čiăng kơ amâo mâo ôh sa mta mnơ̆ng hlăm klei hdĭp anei dưi bi luč hĕ ai tiê êpa mhao čiăng kkuh mpŭ kơ Khua Yang, dlăng kơ Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 13:1-14:21
Kênh Youtube BHKTHN:
