Klei Aê Diê Blŭ: Klei Bi Hriêng 3:31-32
Êlan kliăng: “Đăm tluh jing msĕ si mnuih jhŏng ƀai ôh, leh anăn đăm tui hlue êlan ñu ôh” (Klei Bi Hriêng 3:31)
Klei êmuh ksiêm mĭn: Hlăm djăp mta klei truh, Mtao Salômôn mtô anak ñu kơ ya mta klei? Ya ngă ñu mtô klei anăn? Ya klei – klei hriăm hruê anei bi hriăm drei kơ klei bi kdơ̆ng hŏng mnuih mkăn?
Phung đăo kơ Krist sĭt čiăng snăk mkŏ mjing sa phung ƀuôn sang mâo sa klei đăo bi mguôp jing sa, bi khăp, leh anăn hdĭp hŏng klei êđăp ênang. Ƀiădah boh sĭt gơ̆, amâo mâo ôh sa êpul phung đăo amâo mâo klei bi mneh msao, klei čiăng lač jing, si ngă drei srăng bi tlă anăp leh anăn mgaih mkra hĕ klei amâo thâo bi djŏ anăn. Sa hlăm lu klei jhat, mâo lu mnuih srăng lĕ jing klei čiăng lŏ rŭ ênua, mă klei jhat bi wĭt kơ klei jhat tơdah mâo mnuih mkăn ngă kơ pô. Mtao Salômôn, sa čô tuôm găn leh, thâo săng klă kơ klei anăn kyuanăn ñu mtô anak ñu brei đuĕ kbưi mơ̆ng klei măk ƀai hlăm djăp mta klei truh: “Đăm tluh jing msĕ si mnuih jhŏng ƀai ôh”, boh blŭ “tluh” lŏ mblang jing bi keh nač leh anăn hưp ham. Mâo mnuih tluh čiăng snăk jing msĕ si “mnuih jhŏng ƀai” kyuadah ƀuh boh tŭ dưn phung anăn dưi mâo kbiă mơ̆ng klei jhŏng ƀai diñu ngă leh, leh anăn tăp năng kyua ƀuh amâo mâo klei tŭ dưn ôh phung ngă tui si Klei Aê Diê Blŭ.
Êlâo tinăn, êlan 30 mtă đăm bi tăng hŏng arăng amâo mâo klei ôh “tơdah arăng amâo tuôm ngă jhat kơ ih ôh.” Ƀiădah bi tơdah diñu ngă jhat kơ pô, Khua ƀĭng kna Y-Pôl mtă: “Kâo wah lač čiăng kơ klei diih khăp dưi bi lar lu hĭn, mbĭt hŏng klei thâo săng leh anăn jih klei thâo ksiêm” (Philip 1:9). Klei mtă brei ƀuh klei khăp mâo dua nah: Klei khăp ƀrư̆ hruê ƀrư̆ “dưi bi lar lu hĭn”, čiăng lač klei khăp amâo mâo knhal ôh; leh anăn klei khăp bi êdah “mbĭt hŏng klei thâo săng leh anăn jih klei thâo ksiêm”, čiăng lač klei khăp mâo knhal. Mơ̆ng anăn, drei săng mâo hlăm đa đa klei phung huĭ mpŭ kơ Khua Yang ăt srăng lŏ bi kdơ̆ng wĭt mơh hŏng klei “mnuih jhŏng ƀai” ngă leh. Ƀiădah lĕ wăt tơdah lŏ bi kdơ̆ng wĭt, kăn dưi yua lei klei jhŏng ƀai msĕ si diñu ngă leh, “đăm tui hlue êlan ñu ôh” (êlan 31).
Hruê anei, drei dôk hdĭp hlăm ênuk phung ktang jing phung dưi, kyuanăn, čiăng dưi, bi mâo hĕ klei ktang, ktang wăt hlăm klei măk ƀai, ƀiădah klei măk ƀai amâo tuôm jing êlan hdră pioh mkŏ mjing sa phung ƀuôn sang jăk ôh. Phung anak ƀuôn sang Khua Yang amâo dưi tui ôh êlan mnuih ƀai kyuadah “Yêhôwa bi êmut kheh kơ mnuih wê”. “Mnuih wê” ăt jing mnuih “jhŏng ƀai” mơh, leh anăn Aê Diê bi êmut kheh kơ diñu. Drei khăng hmư̆ arăng lač: Aê Diê bi êmut kơ klei soh ƀiădah Ñu khăp kơ mnuih soh. Ƀiădah lĕ, brei drei răng mơh kơ klei mĭn anei kyuadah tơdah sa čô ăt bi khăng ai tiê leh anăn hdĭp nanao hlăm klei soh snăn Aê Diê srăng “bi êmut kheh” kơ diñu. Khua ƀĭng kna Y-Pôl lač, “Kyuadah klei Aê Diê ngêñ bi êdah leh mơ̆ng adiê bi kdơ̆ng hŏng jih klei amâo mpŭ kơ Aê Diê leh anăn kơ klei wê mnuih ngă, hŏng klei wê anăn diñu kơ̆ng ghă klei sĭt nik” (Rôm 1:18). Mnuih tui hlue êlan soh jhat ƀai amâo dưi ngă “jiăng” hŏng Aê Diê ôh, kăn srăng dưi bi mguôp hŏng Ñu rei. (Klei Mmuñ Hđăp 24:3-4).
Si drei khăng lŏ wĭt ngă hŏng mnuih “jhŏng ƀai”?
Wah lač: Ơ Khua Yang, kiă kriê ai tiê leh anăn klei mĭn kâo hlăm Klei Ih Blŭ čiăng kâo dưi êbat nanao hlăm klei kpă ênô, amâo mă klei jhat bi wĭt kơ klei jhat ôh, ƀiădah hlăm jih jang klei brei kâo bi êdah nanao knuih sa čô mnuih jing anak Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 39
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
