Klei Aê Diê Blŭ: Y-Mathiơ 26:26-29
Êlan kliăng: “Kyuadah grăp blư̆ diih ƀơ̆ng kpŭng anei leh anăn mnăm atŏ anei, diih hưn klei Khua Yang djiê tơl Ñu lŏ hriê” (I Kôrantô 11:26)
Klei êmuh ksiêm mĭn: Si ngă Khua Yang Yêsu mkŏ mjing leh klei ƀơ̆ng mnăm sĭt suôr? Kpŭng leh anăn atŏ Khua Yang brei kơ phung ƀĭng kna Ñu čiăng lač kơ ya klei? Hruê anei, hŏng si ai tiê drei ƀơ̆ng mnăm sĭt suôr.
Leh mă klŏ kpŭng Khua Yang brei, Y-Yuđas kbiă đuĕ mtam hlăk mmăt mlam leh (Y-Yôhan 13:30). Khua Yang leh anăn pluh sa čô phung ƀĭng kna ăt adôk ƀơ̆ng huă Knăm Klei Găn. Hlăm klei ƀơ̆ng huă anei, Khua Yang mkŏ jing leh sa knăm ƀơ̆ng huă mrâo hlăm klei bi mguôp mrâo, anăn jing Klei Ƀơ̆ng Mnăm Sĭt Suôr. Tơdah brei kpŭng leh anăn atŏ kơ phung ƀĭng kna tui si klei bhiăn ƀơ̆ng Knăm Klei Găn, Khua Yang mkŏ mjing leh sa klei ƀơ̆ng mnăm hŏng klei mblang mdê snăk:
Kpŭng kjoh leh bi hdơr kơ asei mlei Khua Yang mčah rai leh kyua klei soh drei. Khua Yang lač kơ phung ƀĭng kna: “Mă ƀơ̆ng bĕ” čiăng lač brei grăp čô mă tŭ klei Khua Yang djiê kyua klei soh ñu pô (êlan 26). Tơdah Khua Yang brei atŏ, Ñu lač “anei jing êrah Kâo”, Êrah kơ klei bi mguôp tuh kyua lu mnuih čiăng pap brei klei soh diñu” (êlan 27-28). Klei bi mguôp mrâo jing klei mguôp mơ̆ng klei pap, jing klei Khua Yang Yêsu dơ̆ng bi leh ti dlông kyâo bi kal. Jih jang mnuih hlei pô dôk hlăm klei bi mguôp anei srăng mâo klei pap brei kơ klei soh. Hŏng klei bi mguôp hđăp jing klei mguôp mơ̆ng klei bhiăn, anak mnuih srăng mâo klei pap brei kơ klei soh kyua êrah mnơ̆ng ngă yang hdĭp, leh anăn klei ngă yang anăn srăng ngă nanao lu blư̆ hlăm klei hdĭp pô anăn. Hlăm klei bi mguôp mrâo: “Ñu mŭt leh sa blư̆ dŭm anăn hlăm Adŭ Doh Jăk Hĭn, amâo djă ba êrah bê leh anăn êrah êđai êmô ôh, ƀiădah êrah Ñu pô, Ñu mă tŭ kơ drei klei bi tui hlŏng lar” (Hêbrơ 9:12). Khua Yang lač: “Brei jih jang diih mnăm bĕ” čiăng lač brei jih jang mnuih hriê mă tŭ bĕ klei bi mtlaih mơ̆ng Khua Yang găn hŏng klei Ñu djiê hrô brei klei soh drei.
Hŏng Klei Ƀơ̆ng Mnăm Sĭt Suôr Khua Yang mkŏ mjing leh, drei ƀuh mơh klei čang hmăng kơ jih jang mnuih dôk hlăm klei pap, anăn jing – srăng dưi mnăm êa boh kriăk ƀâo mrâo mbĭt hŏng Khua Yang hlăm ƀuôn ala mtao Ama Ñu (êlan 29), čiăng lač hlei pô mâo klei bi mguôp hŏng Khua Yang srăng dưi dôk mbĭt hŏng Ñu hlăm hruê Ñu lŏ hriê. Anei jing klei rơ̆ng kjăp sĭt kơ jih jang hlei pô dôk hlăm klei bi mguôp mrâo.
Hruê anei, grăp blư̆ Ƀơ̆ng Mnăm Sĭt Suôr hlăm hruê kjuh kŏ mlan, tơdah mă tŭ kpŭng leh anăn atŏ, kơ ya klei drei mĭn amâodah drei knŏng ƀơ̆ng mnăm tui si klei bhiăn klei đăo đuč? Bi mni bĕ kơ Khua Yang kyua klei Ñu djiê hrô brei klei soh drei, kyuanăn drei dưi mâo klei pap brei kơ klei soh leh anăn dưi mâo klei hdĭp hlŏng lar. Asei mlei Khua Yang mčah rai leh anăn êrah Ñu tuh leh kyua klei soh jih jang mnuih leh anăn kyua klei soh drei pô. Brei drei mâo hĕ klei bi mguôp hŏng phung ayŏng amai adei hlăm klei đăo. Khua Yang Yêsu djiê leh čiăng bi grăng mnuih hŏng Aê Diê. Msĕ mơh Ñu čiăng kơ drei thâo bi mđĭ klei đăo, bi pap brei klei soh leh anăn thâo bi grăng hdơ̆ng drei. Êngao kơnăn, brei drei hur har hưn Klei Mrâo Mrang Jăk Khua Yang Yêsu tơl Ñu lŏ hriê (I Kôrantô 11:26).
Kơ ya klei drei dôk mĭn grăp blư̆ Ƀơ̆ng Mnăm Sĭt Suôr?
Wah lač: Ơ Khua Yang khăp, lač jăk kơ Ih kyuadah Ih tŭ leh klei knap mñai leh anăn tuh leh êrah čiăng bi tui klei soh kâo. Đru kâo khăp kơ Khua Yang hĭn, hur har hưn klei Ih djiê tơl Ih lŏ hriê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm thâo thŭn: Y-Yôp 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
