Mathais 26:26-29
Nqe cim:
“Rau qhov txhua zaus uas nej noj lub ncuav no thiab haus lub khob no, yog nej qhia tus Tswv txojkev tuag mus txog hnub uas tus Tswv rov qab los” (I Kauleethaus 11:26)
Lus nug xav:
– Tswv Yexus rhawv muaj Nws rooj mov zoo li cas?
– Lub ncuav thiab khob dej tus Tswv cev rau cov thwjtim muaj lub ntsiab li cas?
– Nimno, peb muaj tus cwjpwm koom tus Tswv rooj mov zoo li cas?
Tom qab uas txais lub ncuav tus Tswv cev, Yudas tawm plaws mus ces tsaus ntuj (Yauhas 13:30). Tswv Yexus thiab kaum ib tug thwjtim uas tseem nyob ua ke koom pluas mov ua Kevcai Hla Dhau. Ntawm pluas mov no, Tswv Yexus rhawv muaj rooj kevcai dawbhuv nyob hauv Vajtswv tej lus cog tseg tshiab, qhov no yog tus Tswv rooj mov. Thaum cev lub ncuav thiab khob dej rau cov thwjtim, raws li ibtxwm coj ntawm rooj Kevcai Hla Dhau, tus Tswv rhawv muaj ib lub ntsiab txawv.
Lub ncuav ntais qhia rau peb paub tias tus Tswv lub cev raug txomnyem vim peb tej kev txhaum. Tus Tswv hais rau cov thwjtim tias: “noj lub ncuav”, muaj lub ntsiab qhia tias txhua tus neeg yuav tsum lees yuav tus Tswv txojkev tuag txhiv yus tej kev txhaum (nqe 26). Thaum muab lub khob, tus Tswv hais tias yog “Kuv cov ntshav”, cov ntshav no yog Vajtswv tej lus cog tseg tshiab ntws los zam ntau leej lub txim (nqe 27-28). Vajtswv tej lus cog tseg tshiab yog coglus ntawm txoj koob hmoov pub dawb, yog yam uas Tswv Yexus yuav ua tiav saum tus ntoo khaublig. Txhua tus uas nyob hauv Vajtswv tej lus cog tseg tshiab puavleej yuav tau zam txim. Vajtswv tej lus cog tseg qub yog coglus los ntawm txoj kevcai, tibneeg yuav tsum vamkhom ntshav tsiaj thiaj tau zam txim, thiab yuav tau ua ntau zaus hauv kev ua neej. Hauv Vajtswv tej lus cog tshiab, “Nws mus hauv Chav uas Dawbhuv Kawg Nkaus tib zaug xwb; nws tsis nqa ntshav tshis thiab ntshav heev nyuj coj mus theej txhoj, tiamsis nws muab nws cov ntshav theej peb lub txhoj kom peb dim peb lub txim mus ibtxhis li” (Henplais 9:12). Tus Tswv hais tias: “nej txhua tus cia li txais mus haus” muaj lub ntsiab tias txhua tus tibneeg cia li los txais txojkev cawm dim ntawm tus Tswv dhau los ntawm Nws txojkev tuag txhiv peb.
Dhau los ntawm rooj mov tus Tswv rhawv tseg, peb pom muaj kev cia siab rau cov neeg uas nyob hauv txoj koob hmoov, yog yuav tau mus haus cov cawv txiv hmab tshiab nyob hauv Leej Txiv lub Tebchaws (nqe 29), txhais tau tias cov neeg uas nyob hauv txojkev sib raug zoo nrog tus Tswv yuav tau nrog Nws nyob ua ke thaum tus Tswv rov qab los. Nov yog kev tabpov ruaj khov rau tus uas nyob hauv Vajtswv tej lus cog tseg tshiab.
Nimno, thawj lub athiv hauv txhua lub hli thaum koom tus Tswv rooj mov, txais lub ncuav thiab khob dej, peb puas xav txog tus Tswv los yog koom kom tas kevcai? Cia li ua tus Tswv tsaug vim yog muaj Nws tuag txhiv peb, peb thiaj tau kev zam txim thiab tau txais txojsia ntev dhawv mus ibtxhis. Tus Tswv lub cev raug tsimtxom thiab Nws cov ntshav ntws los vim peb tej kev txhaum. Peb yuav tsum paub feem xyuam koom nrog cov kwvtij ntseeg. Tus Tswv twb tuag txhiv ua rau Vajtswv thiab tibneeg sib raug zoo tau, Nws kuj xav kom peb paub feem xyuam txhim kho, zam txim thiab ib tug nrog ib tug sib raug zoo. Dua li ntawd, peb txhua tus yuav tsum rau siab ntso qhia Txojmoo Zoo uas hais txog tus Tswv zaj rau lwm tus mus txog hnub uas tus Tswv rov qab los (I Kauleethaus 11:26).
Thov Vajtswv,
Vajtswv tus muaj kev hlub, ua tsaug qhov Koj yeem raug tsimtxom thiab muab ntshav los txhiv nyuam yaus. Thov Koj pab nyuam yaus paub hlub Koj, rau siab qhia tus Tswv txojkev mus txog hnub uas tus Tswv rov qab los. Nyuam yaus tuav Tswv Yexus lub npe thov, Amees.
Peb xav txog yam dabtsi thaum koom tus Tswv rooj mov?
Nyeem Vajluskub hauv peb lub xyoo: Yauj 13
Kênh Youtube BHKTHN:
