Chivkeeb 13:1-13
Nqe cim zaj kawm:
“Anplas nyob rau sab tebchaws Kana-as, thiab Lauj mus nyob hauv tej nroog uas nyob raws hav thiab mus tsa tsevntaub nyob ze lub nroog Xaudoos. Cov neeg Xaudoos ua phem ua qias thiab ua txhaum tawmtsam tus TSWV loj kawg li.” (Chivkeeb 13:12-13)
Lus nug xav:
– Lauj xaiv thaj av raws li kev xaiv twg?
– Txojkev xaiv ntawd qhia tias Lauj yog neeg zoo li cas?
– Peb kawm tau yam dabtsi los ntawm txojkev xaiv ntawd?
Tomqab uas nrog txiv hlob Anplas mus ua ke tau ntau lub xyoo thiab tau Anplas hlub tshua, nimno Lauj thiab Anplas yuav tsum sib faib nyias thaj av nyob kom zoo rau nkawd ob leeg. Anplas kuj xub tseg yam zoo rau nws tus xeebntxwv, cia Lauj xaiv thaj av uas nws xav tau ua ntej. Tsimnyog thaum hnov Anplas hais, Lauj kuj yuav tsum xub xav txog nws tus txiv hlob ua ntej. Tiamsis, Lauj tsis ua li ntawd, nws xaiv thaj av uas nws xav hais tias yuav muaj txiajntsig tshaj rau nws tus kheej. Lauj xaiv lub tiaj nrag ntawm tus dej Yauladees sab hnub tuaj, vim “Lauj tig saib ibncig ntawd thiab pom tagnrho lub Hav Yauladees mus thoob plaws rau ntawm Xau-as, mas muaj dej txhawv txhua qhov, ib yam li tus TSWV lub Vaj lossis zoo ib yam li lub tebchaws Iziv ntag. (Lub sijhawm ntawd yog ua ntej tus TSWV hlawv lub nroog Xaudoos thiab lub nroog Kaumaulas)” (nqe 10). Tseeb tiag, raws li sab kev khwv noj, qhov no yog kev xaiv zoo tshajplaws, vim thaj chaw no zoo nkauj heev, zoo ib yam li tus Tswv lub vaj Edees lossis zoo ib yam li lub tebchaws Iziv ntag. Tiamsis, Lauj txojkev xaiv tsuas saib mus rau kev zoo ua noj ua haus xwb, tsis quav ntsej txog sab ntsujplig thiab kev coj ncaj ncees ntawm cov neeg uas nyob thaj chaw ntawd. Lauj txav mus nyob hauv Xaudoos, thiab Vajluskub hais meej hais tias: “Cov neeg Xaudoos ua phem ua qias thiab ua txhaum tawmtsam tus TSWV loj kawg li” (nqe 13).
Lauj txojkev xaiv qhia tias nws yog ib tug neeg uas xub nrhiav qhov zoo ntawm sab qhov muag pom. Nws txojkev ua neej tsuas raws li qhov muag pom xwb, tsis yog raws li txojkev ntseeg. Nws kuj tsis quav ntsej tias tus Tswv puas txaus siab rau nws txojkev txiav txim siab ntawd. Tej zaum Lauj xav tias kev tsiv mus nyob Xaudoos yeej tsis yog kev txhaum, tsuav yog nws tsevneeg tseem ceev tau lawv tus kheej kom tsis txhob ua raws li cov neeg hauv lub nroog tej kev txhaum xwb. Tiamsis nws tsis paub tias kev xaiv mus nyob Xaudoos txhais hais tias nws kam mus nyob ua ke nrog cov neeg ua txhaum. Qhov uas Lauj xav tias yog koob hmoov ntawd, raws li Vajluskub txojcai ho tsis yog, vim Vajtswv Txojlus hais tias: “Cov neeg uas tau koob hmoov yog cov uas tsis ua raws li cov neeg siab phem tej lus haub ntxias, thiab tsis xyaum ua raws li cov neeg txhaum ua lossis tsis nrog cov neeg uas tsis hwm Vajtswv koom ua ib lub siab.” (Ntawv Nkauj 1:1).
Niaj hnub nimno, muaj coob leej tseem txiav txim siab zoo ib yam li Lauj. Tej txiajntsig sab nqaij tawv ces lawv ua tib zoo xam, tiamsis tej txiajntsig sab ntsujplig ho tsis saib hlob. Peb kuj muaj ntau zaus txiav txim siab raws li qhov muag pom, tiamsis tsis nco qab tias tej kev txiav txim ntawd yuav cuamtshuam peb tus kheej thiab peb tej menyuam xeebntxwv txojkev loj hlob sab ntsujplig li cas. Thov kom tus Tswv pab peb niaj hnub vamkhom Nws thiab ua tib zoo txiav txim siab rau txhua yam kev xaiv hauv peb lub neej txhua hnub.
Thov Vajtswv,
Tus Tswv, nyuam yaus pom tias nyuam yaus tseem tsis tau zoo txaus, thov Koj zam txim thiab pab kom nyuam yaus totaub tias qhov uas tau nyob hauv Koj thiab ua lub neej haum Koj siab yog koob hmoov loj tshajplaws uas nyuam yaus yuav tsum nrhiav. Thov kom qhov ntawd yog lub hauvpaus rau txhua yam kev txiav txim hauv nyuam yaus lub neej. Nyuam yaus tuav Tswv Yexus Khetos lub npe thov, Amees.
Peb pheej txiav txim siab raws tej txiajntsig sab ntsujplig lossis tej txiajntsig sab nqaij tawv?
Nyeem Vajluskub hauv peb lub xyoos: Malakis 3-4
Kênh Youtube BHKTHN:
