Klei Aê Diê Blŭ: Klei Bi Hriêng 1:8-9
Êlan kliăng: “Anak kâo, dôk hmư̆ bĕ klei ama ih bi hriăm ih, leh anăn đăm hngah hĕ ôh klei amĭ ih mtô;” (Klei Bi Hriêng 1:8)
Klei êmuh ksiêm mĭn: Ya klei mtao Salômôn mtô lač kơ anak? Si ñu hưn mdah kơ klei amĭ ama mtô lač? Ya klei mñă kơ amĭ ama leh anăn phung anak mơ̆ng dua êlan Klei Bi Hriêng anei?
Êlâo kơ hriăm klei thâo săng hlăm klei hdĭp, atur klei bi hriăm yuôm hĭn jing klei mtô lač mơ̆ng amĭ ama yơh. Gŏ sang jing sang hră tal êlâo hĭn leh anăn amĭ ama jing nai mtô êlâo hĭn kơ klei hdĭp phung anak. Kyuanăn, kčưm dơ̆ng hdruôm hră Klei Bi Hriêng, mtao thâo mĭn hĭn mtô mtă leh msĕ snei: “Anak kâo, dôk hmư̆ bĕ klei ama ih bi hriăm ih, leh anăn đăm hngah hĕ ôh klei amĭ ih mtô;” (êlan 8).
Aê Diê mkŏ mjing gŏ sang jing anôk tal êlâo hĭn bi mjing klei hdĭp klei đăo. Jih jang klei amĭ ama mtô lač amâo djŏ knŏng jing klei tuôm găn leh hlăm klei hdĭp, ƀiădah wăt jing ngăn drăp klei hdĭp myang tơdah mdơ̆ng ti dlông atur Klei Aê Diê Blŭ. Kyuanăn, klei mtao Salômôn kñăm êlâo hĭn mâo djŏ ôh jing “ngă bĕ” ƀiădah “dôk hmư̆ bĕ”. Mđing dôk hmư̆ amâo djŏ knŏng hmư̆ hŏng ƀăng knga ôh, ƀiădah hŏng knuih ai tiê luă gŭ. Anak mđing hmư̆ klei mtô lač, huĭ mpŭ kơ Aê Diê srăng dưi tlaih mơ̆ng klei soh čhuai amĭ ama tuôm găn leh. Mtao Salômôn bi msĕ klei mtô lač anăn hŏng “kwang mnga siam kơ boh kŏ ih” leh anăn“klei băk siam ti kkuê ih” (êlan 9), sa pŏk rup kơ klei siam, knuih kơhưm leh anăn klei răng mgang. Klei mtô lač tui hlue êlan Khua Yang amâo jing knông ktrŏ ôh, ƀiădah jing klei bi msiam kơ phung anak leh anăn kơ klei hdĭp.
Êlan 8 brei ƀuh, Khua Yang jao bruă klam bi hriăm klei hdĭp myang kơ ama wăt kơ amĭ. Ama mâo klei iêô mthưr atăt gai phung anak hŏng klei thâo mĭn leh anăn kpă ênô; amĭ mtô bi hriăm klei khăp, klei gĭr leh anăn knhuah dôk hdĭp ênuah ênô. Tơdah amĭ ama êbat mbĭt hŏng Khua Yang, klei digơ̆ bi hriăm jing yuôm bhăn êdimi, kyuadah phung anak amâo knŏng hmư̆ klei mtô lač ƀiădah wăt dlăng ƀuh klei đăo hdĭp grăp hruê. Mta klei phung anak hdơr sui amâo djŏ klei mtô mblang dlông dlĭn ôh, ƀiădah hŏng rup diñu dlăng ênưih ƀuh: amĭ ama khăng dlăng Klei Aê Diê Blŭ, wah lač, thâo akâo klei pap mñai tơdah ngă soh, thâo bi pap brei, leh anăn dưm Khua Yang jing phŭn kơ gŏ sang. Klei amĭ ama dôk hdĭp msĕ snăn yơh, đru kơ jih klei mtô lač jing klei thâo mĭn hdĭp leh anăn sĭt êdi.
Bi hŏng amĭ ama, klei mtô lač brei kbiă hriê mơ̆ng klei khăp. Klei mkra mjuăt kƀah klei khăp srăng jing klei kpĭ ktư̆; ƀiădah tơdah klei khăp kƀah klei mkra mjuăt phung anak srăng dlăng hơăi mang. Tơdah klei sĭt nik nao hrăm mbĭt hŏng klei khăp, klei mtô lač srăng jing klei răng mgang, amâo djŏ klei ksiêm ôh. Bi hŏng phung anak, anei jing klei iêô mthưr brei thâo mpŭ kơ mnơ̆ng brei mơ̆ng Khua Yang, anăn jing klei mtô lač huĭ mpŭ mơ̆ng amĭ ama. Hlăm sa lăn ala bŏ hŏng asăp blŭ mklăk mdê êlan, snăn yơh klei mtô lač tui hlue êlan Khua Yang jing mnơ̆ng yua pioh atăt gai đru kơ klei hdĭp phung anak dưi dôk kjăp, wăt tơdah diñu prŏng khue leh dưn, leh anăn srăng jing mnơ̆ng brei yuôm bhăn nao hrăm mbĭt hŏng phung anak ktuê jih klei hdĭp diñu.
Jing amĭ ama, ya klei drei dôk mtô lač kơ phung anak drei? Jing phung anak, si knuih drei wĭt lač hŏng klei amĭ ama mtô lač?
Wah lač: Ơ Khua Yang, bi mni kơ Ih brei leh kơ kâo klei mtô lač hlăm gŏ sang. Akâo Khua Yang đru kâo thâo mđing hmư̆, hdĭp tui hlue êlan Khua Yang, leh anăn jing phung amĭ ama brei ngăn dưn klei đăo kơ phung anak čô hruê êdei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sakari 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
