Pajlug 1:8-9
Nqe cim zaj kawm:
“Metub, cia li ua tib zoo mloog tej lus uas koj niam thiab koj txiv qhuab qhia koj.” (Pajlug 1:8)
Lus nug xav:
– Vajntxwv Xalumoos qhuab ntuas cov menyuam txog yam dabtsi?
– Nws piav txog tej lus qhuab ntuas ntawm niamtxiv li cas?
– Ob nqes Pajlug no ceebtoom niamtxiv thiab menyuam txog yam dabtsi?
Ua ntej peb kawm txog tej kev txawj ntse hauv lub neej, lub hauvpaus tseemceeb tshaj plaws ntawm txojkev cob qhia ua neej yog niamtxiv kev qhuab ntuas. Tsevneeg yog thawj lub tsev kawm ntawv, thiab niamtxiv yog thawj tug xibhwb hauv menyuam lub neej. Yog li ntawd, thaum pib phau Pajlug, tus vajntxwv uas txawj ntse tshaj plaws tau ntuas hais tias: “Metub, cia li ua tib zoo mloog tej lus uas koj niam thiab koj txiv qhuab qhia koj” (nqe 8).
Vajtswv tsim tsa tsevneeg ua thawj qhov chaw uas pib txojkev ntseeg. Tej lus qhuab ntuas ntawm niamtxiv tsis yog tej kev paub hauv lub neej xwb, tiamsis kuj dhau los ua ib yam qub txeeg qub teg sab ntsujplig thaum tsim tsa rau saum Vajtswv Txojlus. Yog li ntawd, yam uas Vajntxwv Xalumoos xub hais txog tsis yog “yuav tsum ua dabtsi,” tiamsis yog “cia li ua tib zoo mloog”. Ua tib zoo mloog tsis yog tsuas hnov lus ntawm lub pob ntseg xwb, tiamsis yog tus cwjpwm txo hwjchim hauv lub siab. Tus menyuam uas paub mloog lus qhuab ntuas thiab paub ntshai tus Tswv yuav zam tau ntau yam kev ua yuam kev uas niamtxiv twb tau ntsib dhau los lawm. Vajntxwv Xalumoos muab tej lus qhuab qhia ntawd piv rau “lub mom paj ntoos zoo nkauj saum koj taubhau thiab yog tej saw nyiaj ntawm koj caj dab” (nqe 9 HMOWSV), yog daim duab qhia txog kev zoo nkauj, meej mom thiab kev tiv thaiv. Tej lus qhuab ntuas raws li tus Tswv txojkev yeej tsis yog ib lub nra hnyav, tiamsis yog yam uas ua kom menyuam thiab lawv lub neej zoo nkauj.
Nqe 8 qhia hais tias Vajtswv muab lub luag haujlwm qhuab qhia sab ntsujplig rau leej txiv thiab leej niam huv tibsi. Leej txiv tau nqua hu kom coj qhia menyuam los ntawm kev txawj ntse thiab kev ncajncees; leej niam qhia kev hlub tshua, kev ua siab ntev thiab kev ua zoo rau menyuam. Thaum niamtxiv ua ke nrog tus Tswv mus, lawv tej lus qhuab ntuas thiaj muaj nqis heev, vim menyuam tsis yog tsuas hnov tej lus qhia xwb, tiamsis kuj pom txojkev ntseeg uas muaj sia nyob hauv niamtxiv lub neej txhua hnub. Yam menyuam nco tau ntev tsis yog tej lus qhuab qhia ntev ntev xwb, tiamsis yog tej yam yooj yim heev uas lawv pom txhua hnub, xws li: niamtxiv niaj hnub nyeem Vajluskub, thov Vajtswv, paub thov txim thaum ua txhaum, ib leeg zam txim rau ib leeg, thiab cia tus Tswv nyob nruab nrab ntawm lub tsevneeg. Niamtxiv lub neej zoo li no thiaj ua rau tej lus qhuab ntuas dhau los ua kev txawj ntse uas muaj sia thiab siv tau tiag hauv lub neej.
Hais txog niamtxiv, kev qhuab qhia yuav tsum pib ntawm txojkev hlub. Kev qhuab qhia uas tsis muaj kev hlub yuav yooj yim dhau los ua kev nyuaj siab rau menyuam; tiamsis kev hlub uas tsis muaj kev qhuab qhia kuj yuav ua rau menyuam saib tsis taus. Thaum qhov tseeb nrog txojkev hlub mus ua ke, tej lus qhuab ntuas yuav dhau los ua kev tiv thaiv, tsis yog kev tswjhwm. Hais txog menyuam, qhov no yog ib lo lus caw kom lawv paub saib taus yam khoom plig uas Vajtswv pub, uas yog tej lus qhuab ntuas ntawm niamtxiv paub ntshai tus Tswv. Hauv ib lub ntiajteb uas muaj ntau lub suab thiab ntau yam kev xav sib txawv, tej lus qhuab qhia raws li tus Tswv txojkev zoo ib yam li rab koob hlau taw kev, pab kom menyuam lub neej nyob ruaj khov txawm lawv twb loj hlob lawm, thiab yuav yog ib yam khoom plig uas muaj nqis heev nrog lawv mus tas lawv lub neej.
Thov Vajtswv,
Tus Tswv, ua Koj tsaug uas Koj pub tej lus qhuab ntuas rau nyuam yaus hauv tsevneeg. Thov pab kom nyuam yaus paub mloog lus, ua neej raws li Koj txojkev, thiab dhau los ua cov niamtxiv uas khaws tau tej qub txeeg qub teg sab kev ntseeg rau tiam tom ntej. Nyuam yaus tuav Tswv Yexus Khetos lub npe thov, Amees.
Yog niamtxiv, peb tabtom qhuab qhia peb tej menyuam txog yam dabtsi? Yog menyuam, peb muaj tus cwjpwm li cas rau tej lus qhuab ntuas ntawm niamtxiv?
Nyeem Vajluskub hauv peb lub xyoos: Xakhaliyas 11
Kênh Youtube BHKTHN:
