II Timautes 1:1-2
Nqe cim:
“Kuv yog Paulus tus uas yog Yexus Khetos ib tug timthawj raws li Vajtswv lub siab nyiam; Vajtswv txib kuv mus qhia Txojmoo Zoo uas Vajtswv tau coglus tseg hais tias tus uas nrog Yexus Khetos sib raug zoo yuav tau txojsia. Timautes, tus tub uas kuv hlub” (II Timautes 1:1-2a)
Lus nug xav:
– Qhib thawj tsab ntawv, Timthawj Paulus hais li cas txog nws tus kheej, txog tus Tswv thiab txog Timautes?
– Tus neeg ua Vajtswv haujlwm cheemtsum muaj cov yamntxwv twg?
– Peb yuav tsum ua dabtsi kom txhim tsa tau cov neeg uas tus Tswv muab tso peb tsob hwb?
Nov yog zaum tim ob uas Timthawj Paulus sau tsab ntawv tshwjxeeb xa mus rau tus xibhwb hluas Timautes. Paulus sau raws li kev sau ntawv nyob rau tiam thaud, yog li cov lus hais nug xov moo qhib thawj tsab ntawv no muaj ntau yam zoo thooj li cov lus nug xov moo hauv thawj tsab ntawv thiab. Tagnrho ob tsab ntawv no puavleej hais txog Paulus yog “Yexus Khetos ib tug timthawj”, puavleej sau “xa mus rau Timautes”, thiab puavleej sau koom ib lo lus hais noj qab nyob zoo. Txawm li ntawd los, muaj qee yam sib txawv tseemceeb peb pom li no.
Tim ib, hauv thawj tsab ntawv, Timthawj Paulus hais tias nws ua timthawj yog “raws li Vajtswv uas yog peb tus Cawmseej”, hauv tsab ntawv tim ob, Paulus hais tias nws ua timthawj yog “raws li Vajtswv lub siab nyiam” thiab “tej lus cog tseg uas muaj txojsia hauv Yexus Khetos” (nqe 1). Ua timthawj, ua tus ua Vajtswv haujlwm “raws li”, yog xav hais txog lub siab mloog lus raws li tus Tswv uas xaiv thiab tsa yus. Thaum hais tias “raws li lub siab” thiab “tej lus cog tseg” qhia paub yam uas tus neeg ua Vajtswv haujlwm xav tau kuj yog yam uas tus Tswv xav tau, tsis yog Paulus lub siab nyiam. Tagnrho kev mloog tus Tswv lus thiab lub siab xav ua rau tus Tswv txaus siab yog cov yamntxwv cheemtsum muaj nyob hauv tus neeg ua haujlwm.
Tim ob, hauv tsab ntawv I Timautes, Timthawj Paulus muab Timautes hu ua “koj yog kuv tus tub ntseeg”, hauv tsab ntawv ob Paulus muab Timtautes hu ua “tus tub uas kuv hlub” (nqe 2). Lub siab no qhia paub qhov kev sib raug zoo ntawm Paulus thiab tus tub hluas Timautes, tus tub uas Paulus tabtom tsob hwb thiab ib tug txhawb ib tug txojkev ntseeg, tej lus txhawb zog, qhia, cem tsimnyog tau txais thiab saib muaj nqis hauv txojkev txhim tsa kev ntseeg los ntawm kev sib raug zoo tseeb thiab kev hlub, nws tsis yog samhwm, yuam lossis hais kom muaj.
Txojkev nrog tus Tswv mus, tus ntseeg tsis yog ntseeg tus Tswv ces txaus, tiamsis yuav tau loj hlob tsis tseg tsis tu los ntawm qhov kawm Vajtswv Txojlus thiab nrog tus Tswv sib raug zoo. Peb txhua tus kuj cheemtsum muaj ib tug neeg tsob hwb sab ntsujplig, thiab tus Tswv kuj xav siv peb ua tus neeg tsob hwb ib tug lossis ntau tus hauv Pawg Ntseeg sab ntsujplig lossis tsevneeg, kom tagnrho txhua tus ua ke loj hlob hauv tus Tswv. Peb cheemtsum ua tas siab, hlub tiag tiag, ib leeg koom nrog ib leeg thiaj raws tus Tswv siab nyiam.
Thov Vajtswv,
Vajtswv, ua tsaug qhov Koj ua rau nyuam yaus loj hlob los ntawm cov ntseeg ua ntej kev tsob hwb sab ntsujplig. Thov pab kom nyuam yaus muaj txaus peevxwm thiab kev hlub pab lwm tus sab ntsujplig tas zog. Nyuam yaus tuav Tswv Yexus Khetos lub npe thov, Amees.
Peb tabtom tsob hwb rau cov neeg twg thiab lub siab tsob hwb zoo li cas?
Nyeem Vajluskub hauv peb lub xyoo: Exethaws 1
Kênh Youtube BHKTHN:
