Mathais 22:34-40
Nqe cim:
“Yexus teb hais tias: Hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog.” (Mathais 22:37)
Lus nug xav:
– Tus xibhwb qhia kevcai nug Tswv Yexus lo lus nug dabtsi?
– Tswv Yexus lo lus teb qhia dabtsi txog Vajtswv txojkev ncaj ncees thiab txojkev hlub?
– Peb yuav ua neej ncaj ncees dhau ntawm kev sib hlub li cas?
Thaum Tswv Yexus raug nug hais tias nqe kevcai twg yog nqe tseemceeb tshaj plaws, Nws tsis piav tawm tej kevcai, tiamsis Nws hais sau zog txog Vajtswv lub siabnyiam dhau ntawm ob nqe uas tseemceeb tshajplaws: “Hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog,” thiab “Hlub koj tej kwvtij zejzog ib yam li koj hlub koj lub cev” (nqe 37, 39). Tswv Yexus hais meej hais tias: “Mauxes txoj Kevcai thiab cov cev Vajtswv lus tej lus qhia puavleej nyob tagnrho hauv ob nqe no.” Tswv Yexus qhia pom hais tias txojkev ncaj ncees tseeb tsis cais tawm ntawm txojkev hlub, tiamsis qhia tshwm dhau ntawm kev hlub Vajtswv thiab kev hlub lwm tus.
Raws li coob leej, kev ua neej ncaj ncees yog rau siab ua raws txhua txoj kevcai kev ntseeg, tiamsis Tswv Yexus qhia tias qhov tseemceeb yog yam nyob hauv lub siab. Kev hlub Vajtswv kawg siab kawg ntsws, kawg plab kawg plawv thiab kawg yus lub dag lub zog txhais hais tias txojkev ncaj ncees pib ntawm kev muab tag nrho lub neej fij rau Vajtswv. Qhov ntawd tsis yog tsuas ua tej haujlwm zoo xwb, tiamsis yog hlub Vajtswv kom tsimnyog. Thaum txojkev hlub Vajtswv kav peb lub siab lawm, ces kev mloog lus yuav tsis yog ib lub nra hnyav, tiamsis yuav yog kev zoo siab ua raws li Nws siab nyiam.
Txuas ntxiv, Tswv Yexus txuas kev hlub Vajtswv nrog kev hlub lwm tus. Nqe tim ob “kuj ib yam nkaus” li nqe xubthawj, rau qhov nws pib ntawm nqe xubthawj los. Peb tsis muaj cuabkav hais tias peb hlub Vajtswv tiag, es ho tsis quavntsej cov neeg uas tau Vajtswv tsim raws li Nws tus yamntxwv. Txojkev ncaj ncees uas haum Vajtswv siab qhia tshwm dhau ntawm kev hlub tshua, kev zam txim, kev ua siab ncaj thiab kev txo hwjchim. Peb tej kev sib raug zoo nrog lwm tus yog qhov chaw sim peb txojkev ntseeg. Peb tej lus hais, kev zam txim, kev pabcuam thiab kev ua siab ntev qhia tias peb txojkev hlub Vajtswv puas yog tiag.
Peb yuav ntsuas peb txojkev ncaj ncees los ntawm tej haujlwm sab ntsujplig xws li kev pehawm Vajtswv, kev kawm Vajluskub, kev thov Vajtswv thiab kev ua haujlwm rau tus Tswv… Tiamsis Vajtswv hu kom peb tshuaj xyuas saib tej haujlwm ntawd puas tawm hauv txojkev hlub Vajtswv tuaj. Vajtswv saib qhov tseemceeb yog peb lub siab thiab peb lub homphiaj. Txojkev hlub tsis zais kev txhaum lossis tsis khauj sim nrog kev txhaum, tiamsis nrhiav yam zoo tshajplaws raws li Vajtswv lub siab nyiam. Tswv Yexus lub neej yog tus qauv zoo kawg nkaus ntawm kev ua neej ncaj ncees dhau ntawm kev hlub. Nws hlub thiab mloog Leej Txiv lus kawg siab kawg ntsws, thiab Nws kuj hlub tibneeg txaus nkaus. Kev hlub Vajtswv kawg siab kawg ntsws thiab hlub lwm tus tiag tiag yog ib txojkev kawm thiab xyaum mus tas sim neej, uas yuav hloov txhua feem hauv tus ntseeg lub neej.
Thov Vajtswv,
Tus Tswv, thov Koj pab kom nyuam yaus khaws ob nqe kevcai tseemceeb no rau hauv lub siab, kom nyuam yaus ua tau ib lub neej ncaj ncees dhau ntawm txojkev hlub kawg siab kawg ntsws rau Koj thiab rau lwm tus. Nyuam yaus tuav Tswv Yexus Khetos lub npe thov, Amees.
Peb ntsuas peb lub neej ncaj ncees thiab kev sib hlub los ntawm yam dabtsi?
Nyeem Vajluskub hauv peb lub xyoos: Malakaus 11
Kênh Youtube BHKTHN:
