Klei Aê Diê Blŭ: Klei Mphŭn Dơ̆ng 10:1-4, 6-7, 21, 32
Êlan kliăng: “Anăn yơh jing phung găp djuê phung anak êkei Y-Nôê tui si ênuk diñu, hlăm čar diñu. Mơ̆ng diñu yơh phung găp djuê bra hiu dôk hlăm lăn ala leh êa lip” (Klei Mphŭn Dơ̆ng 10:32)
Klei êmuh ksiêm mĭn: Hlăm hră čih anăn phung găp djuê anei, ya ngă knŏng kơ Y-Nimrôt mâo klei yăl dliê čêč hĭn kơ anăn phung mkăn? Ya klei hriăm drei mâo mơ̆ng klei anei leh anăn mơ̆ng hră čih anăn phung găp djuê mnuih hlăm lăn ala kbiă mơ̆ng Y-Nôê?
Brei drei pioh mmông dlăng jih Klei Mphŭn Dơ̆ng kdrêč 10, jing kdrêč čih kơ anăn phung anak čô Y-Nôê. Mâo jih jang 70 anăn čih tinei, leh anăn mơ̆ng digơ̆ mâo jih jang găp djuê mnuih hlăm lăn ala. Ti krah lu anăn msĕ snăn ƀiădah knŏng kơ Y-Nimrôt yơh mâo klei čih yăl dliê čêč (êlan 8-12). Ñu yơh “jing sa čô jhŏng ktang tal êlâo ti lăn ala” (êlan 8). Ñu mdơ̆ng lu ƀuôn ala mtao, hlăm anăn mâo ƀuôn Ƀaƀel (jing ƀuôn Ƀaƀilôn). Ñu mdơ̆ng ƀuôn prŏng Niniwơ jing sa boh ƀuôn mâo klei hing ang leh anăn đĭ yar, êdei anăp jing ƀuôn phŭn kơ ƀuôn ala mtao Asiri. Kơ êdei, Asiri leh anăn Ƀaƀilôn jing dua boh ƀuôn ala mtao prŏng leh anăn ktang bi kdơ̆ng hŏng phung ƀuôn sang Aê Diê ruah leh anăn ngă lu klei măk ƀai. Mơ̆ng klei yăl dliê čêč kơ Y-Nimrôt, sa čô bi ala kơ sa găp djuê mâo klei knhâo ƀiădah bŏ hŏng klei mgao mơh, trăn Klei Aê Diê Blŭ anei čih yăl dliê kơ anôk mdê phung mnuih êdei kơ klei êa lip. Tinăn mâo sa phung găp djuê knhâo mbruă ƀiădah amâo mâo huĭ mpŭ kơ Aê Diê ôh.
Mơ̆ng Y-Ađam leh anăn H-Êwơ, drei ƀuh mâo dua phung găp djuê. Sa nah jing găp djuê mpŭ kơ Aê Diê, pô bi ala jing Y-Aƀel, kơ anăp jing Y-Set. Sa nah mkăn jing găp djuê amâo mpŭ kơ Aê Diê ôh, pô bi ala jing Y-Kain. Mĭndah klei yăl dliê kơ dua găp djuê anei tuč ruê̆ leh mbĭt hŏng klei êa lip. Ƀiădah hơăi! Ăt dôk nanao. Y-Nimrôt jing čô Y-Čam, pô amâo mpŭ ôh kơ ama ñu Y-Nôê. Jih jang găp djuê mnuih hlăm lăn ala anei kbiă mơ̆ng Y-Nôê sơăi, ƀiădah hlăm anăn mâo găp djuê mpŭ kơ Aê Diê, mâo mơh găp djuê bi kdơ̆ng hŏng Aê Diê.
Amâo djŏ knŏng hjăn anăn Y-Nimrôt ôh mâo klei mdê hĭn. Êlan 21 čih yăl dliê kơ sa čô anak êkei Y-Nôê mkăn jing Y-Sem. Anôk jăk snăk jing Klei Aê Diê Blŭ čih anăn gơ̆ djŏ hŏng sa găp djuê: “Y-Sem, pô jing aê phŭn kơ jih jang phung anak Y-Êber”. Arăng iêô kơ phung Hêbrơ tui si anăn Y-Êber anei, leh anăn Y-Abraham, aê phŭn kơ phung găp djuê Hêbrơ, jing anak čô Y-Êber yơh. Snăn yơh, hlăm kdrêč čih anăn phung găp djuê anei mtam, drei ƀuh klei jing klei soh mnuih, leh anăn ƀuh wăt klei sĭt suôr leh anăn klei pap Aê Diê mơh. Mơ̆ng phung anak čô Y-Sem, Aê Diê ruah Y-Abraham čiăng mjing sa phung găp djuê pioh kơ Ñu pô. Mơ̆ng phung găp djuê anei mơh, Yang Krist trŭn hriê leh ti lăn ala, ngă hdră bi mtlaih kơ jih jang mnuih. Sĭt nik, grăp anăn čih leh hlăm hră anăn găp djuê jing sa kdrêč hlăm hlăm klei yăl dliê prŏng mơ̆ng Aê Diê.
Si ngă drei ƀuh mơ̆ hdră yuôm bhăn Aê Diê pioh leh kơ jih jang găp djuê mnuih, hlăm anăn mâo wăt drei mơh?
Wah lač: Ơ Khua Yang, kâo bi mni kơ Ih kyuadah Ih jing Aê Diê kơ jih jang găp djuê mnuih. Wăt tơdah mnuih bi kdơ̆ng hŏng Ih, ƀiădah hdră klei bi mtlaih Ih mkra leh mơ̆ng êlâo. Đru kâo thâo đru hlăm hdră prŏng anăn hŏng klei hưn klei Ih bi mtlaih kơ jih jang mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Nêhêmi 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
