Tshwmsim 14:13
Nqe cim:
“Rau qhov nqi zog ntawm txojkev txhaum yog kev tuag, tiamsis txoj koob hmoov uas Vajtswv pub dawb yog txojsia ntev dhawv mus ibtxhis uas los ntawm Yexus Khetos tus uas yog peb tus Tswv los.” (Loos 6:23)
Lus nug xav:
– Vim li cas cov tuag hauv tus Tswv thiaj yog cov tau koob hmoov?
– Vajtswv qhia tshwm Nws txojkev ncaj ncees thiab txojkev hlub li cas?
– Vajtswv tej lus cogtseg no muaj qabhau dabtsi rau koj?
Thaum ze zuj zus hnub ntiajteb kawg thiab hnub Tswv Yexus rov qab los, peb yuav ntsib tej yam tseeb uas txaus ntshai txog Vajtswv txojkev txiav txim. Txhua tus yuav tsum nyob tabmeeg Vajtswv txojkev txiav txim ncaj ncees. Cov uas tsis ntseeg thiab tsis txais yuav Tswv Yexus Khetos, tseem ua neej nyob hauv kev txhaum, yuav raug kev tuag sab cev nqaij daim tawv thiab sab ntsujplig huv tibsi, yog qhov uas raug cais ntawm Vajtswv mus ibtxhis (Loos 6:23). Tiamsis peb nrhiav pom ib txojkev nplig siab hais tias Vajtswv tus uas muaj kev hlub thiab kev khuvleej yuav pub Nws txojkev hlub thiab txojkev ncaj ncees rau txhua tus uas tso siab rau Nws. Vajtswv haivneeg kuj yuav ntsib kev tuag sab cev nqaij daim tawv thiab, tiamsis Vajtswv Txojlus cogtseg hais tias cov tuag hauv tus Tswv yog cov tau koob hmoov, vim lawv yuav tsis raug kev txomnyem thiab kev khwv ntxiv lawm, tiamsis yuav tau txais koob hmoov mus ibtxhis nrog tus Tswv uas hlub lawv.
Txhua tus tibneeg yuav tsum tuag, thiab txhua tus yuav tsum mus sawv ntawm Vajtswv xubntiag, raws li Vajluskub hais tias: “Txhua tus neeg puavleej yuav tuag ib zaug thiab tom qab ntawd Vajtswv yuav txiav txim rau lawv” (Henplais 9:27). Vajtswv txojkev ncaj ncees pib ntawm Nws tus yamntxwv uas zoo tag nrho thiab Nws kev ua ncaj. Nws yog tus tsis lam cia li zam rau kev txhaum thiab tsis cia cov neeg phem khiav dim kev raug txim. Nyob hauv Tshwmsim 14:13, Timthawj Yauhas hais tias nws hnov ib lub suab hais saum ntuj los. Lub suab ntawd muaj hwjchim thiab yog los ntawm Vajtswv, kom nws sau cia tej lus tseemceeb ntawd. Ua ke nrog Vajtswv txojkev ncaj ncees, peb pom ib txoj xov uas muaj kev hlub, kev cia siab thiab koob hmoov rau cov uas tuag hauv tus Tswv. “Cov uas tuag rau hauv tus Tswv kuj nyob kaj siab lug!” Thaum Vajtswv txojkev ncaj ncees thov kom kev txhaum raug txim, Vajtswv txojkev hlub ho qhib ib txojkev cawmdim thiab rov kho tibneeg nrog Nws sib raug zoo. Txawm yog thaum Vajtswv npaj txhij yuav txiav txim, los Nws tseem muaj kev hlub tshua rau cov uas tso siab rau Nws.
Cov tuag hauv tus Tswv yog cov tau koob hmoov vim lawv tsis raug kev rau txim hnub kawg, tiamsis lawv tau so ntawm tej kev khwv thiab kev txomnyem. Vajtswv yuav so lawv tej kua muag, yuav tsis muaj kev mob kev nkeeg, kev quaj ntsuag lossis kev tuag ntxiv lawm (Tshwmsim 21:4). Tsis tas li ntawd xwb, Vajtswv cov menyuam kuj yuav sawv ntawm Tswv Yexus Khetos lub rooj txiav txim, tsis yog kom raug txim (Loos 8:1), tiamsis kom tau txais nqi zog raws li tes haujlwm uas lawv tau ua thaum lawv tseem muaj sia nyob (Tshwmsim 22:12).
Kev txiav txim thaum kawg ceebtoom peb txog kev txhaum qhov txaus ntshai kom peb txav deb ntawm kev txhaum; koob hmoov rau cov tuag hauv tus Tswv txhawb kom peb tuav rawv txojkev ntseeg thiab ua neej dawb huv mus txog hnub kawg, kom peb sawv thaum sawv tabmeeg Vajtswv uas ncaj ncees thiab muaj kev hlub lub zwmtxwv, thiab tau txais yam khoom plig uas Nws tau coglus tseg.
Thov Vajtswv,
Leej Txiv tus dawb huv thiab muaj kev hlub tshua! Ua Koj tsaug uas Koj tau cawm nyuam yaus thiab pub koob hmoov rau nyuam yaus tsis yog hauv lub neej no xwb, tiamsis tseem nyob mus ibtxhis thiab. Thov Koj pab kom nyuam yaus ua siab ncaj raws Koj qab mus txog hnub kawg. Nyuam yaus tuav Tswv Yexus Khetos lub npe thov, Amees.
Peb puas npaj txhij sawv tabmeeg ntawm Vajtswv txojkev txiav txim kiag hnub no?
Nyeem Vajluskub hauv peb lub xyoos: Nehemis 1
Kênh Youtube BHKTHN:
