Klei Aê Diê Blŭ: Klei Bi Êdah 14:13
Êlan kliăng: “Kyuadah ênoh mưn kyua klei soh jing klei djiê, ƀiădah klei Aê Diê brei hơăi mang jing klei hdĭp hlŏng lar hlăm Krist Yêsu Khua Yang drei” (Rôm 6:23)
Klei êmuh ksiêm mĭn: Si ngă djiê hlăm Khua Yang jing mâo klei jăk mơak? Si Khua Yang bi êdah klei kpă ênô leh anăn klei khăp Ñu? Ya klei bi hmăi kơ drei mơ̆ng klei ƀuăn anei?
Tơdah giăm truh ênuk knhal tuč leh anăn hruê Khua Yang Yêsu lŏ hriê giăm leh, drei srăng dôk ti anăp klei sĭt nik năng huĭ êdi jing klei Aê Diê phat kđi. Jih jang mnuih srăng dôk ti anăp klei Khua Yang phat kđi kpă, hlei pô amâo đăo kơ Khua Yang Yêsu, dôk hdĭp hlăm klei soh srăng tŭ klei djiê hlăm kđeh wăt hlăm mngăt, jing klei bi ktlah hlŏng lar hŏng Khua Yang (Rôm 6:23). Ƀiădah lĕ, drei ƀuh klei bi juh snei Aê Diê jing jăk leh anăn bŏ hŏng klei khăp čiăng brei klei khăp êbeh dlai leh anăn klei kpă ênô Khua Yang kơ jih jang hlei pô đăo kơ Ñu. Phung anak ƀuôn sang Aê Diê jing ăt djiê asei mlei kđeh msĕ mơh, ƀiădah Klei Aê Diê Blŭ ƀuăn, djiê hlăm Khua Yang jing klei jăk mơak, kyuadah amâo lŏ tŭ klei dleh dlan suăi knap ôh, ƀiădah dưi dưn klei jăk mơak nanao hlŏng lar mbĭt hŏng Khua Yang khăp hơiêng.
Anak mnuih jih jang srăng djiê sơăi, leh anăn jih jang srăng dôk ti anăp Khua Yang sơăi, “Leh anăn čuăn leh kơ mnuih srăng djiê sa blư̆, leh klei anăn tŭ klei phat kđi” (Hêbrơ 9:27). Klei mtăp mđơr Aê Diê kbiă hriê mơ̆ng knuih jăk klă leh anăn kpă ênô Ñu. Ñu jing Pô amâo phưi lui ôh klei soh amâodah brei hĕ phung jhat ƀai dưi tlaih mơ̆ng klei bi kmhal. Hlăm Klei Bi Êdah 14:13, Khua ƀĭng kna Y-Yôhan čih snei, ñu hmư̆ mâo asăp blŭ mơ̆ng adiê, jing ênai klei ktang myang kbiă hriê mơ̆ng Khua Yang, brei ñu čih jih čiăng bi hdơr kơ bruă yuôm bhăn. Mđrĭng hŏng klei kpă ênô Khua Yang, drei ƀuh hưn kơ klei khăp, klei čang hmăng leh anăn klei jăk mơak kơ hlei pô djiê hlăm Khua Yang. “Jăk mơak yơh phung djiê hlăm Khua Yang!” Êjai klei kpă ênô Khua Yang čoh čuăn klei soh tŭ klei bi kmhal, klei khăp Khua Yang mtrŭt Ñu mprăp brei êlan bi mtlaih leh anăn lŏ bi mrâo. Wăt êjai dôk mprăp mkra ngă bruă klei phat kđi, Aê Diê ăt mâo klei pap pioh brei kơ phung đăo kơ Ñu.
Phung djiê hlăm Khua Yang mâo klei jăk mơak kyuadah diñu amâo srăng tŭ ôh klei bi kmhal hlăm hruê knhal tuč, ƀiădah dưi dôk mdei tlaih mơ̆ng klei dleh suăi. Khua Yang srăng sut êa ală digơ̆, amâo lŏ adôk klei ruă duam, klei čŏk hia amâodah klei djiê ôh (Klei Bi Êdah 21:4). Kdlưn hĭn mơh, jih jang phung anak ƀuôn sang Aê Diê srăng dôk ti anăp jhưng mtao Yang Krist, amâo djŏ tŭ klei phat kđi ôh (Rôm 8:1), ƀiădah srăng mă tŭ klei mưn tui si hnơ̆ng bruă digơ̆ ngă leh êjai adôk hlăm kđeh asei mlei (Klei Bi Êdah 22:12).
Klei phat kđi knhal tuč mñă kơ drei klei ktrŏ kjham mơ̆ng klei soh čiăng brei ñĕ đuĕ bi kbưi; klei jăk mơak kơ phung djiê hlăm Khua Yang đru drei djă pioh kjăp klei đăo leh anăn dôk hdĭp doh jăk tơl truh hruê knhal tuč, čiăng dưi dôk ti anăp jhưng mtao Aê Diê kpă ênô bŏ hŏng klei khăp, mă tŭ klei mưn tui si klei Ñu ƀuăn leh.
Si ngă drei mprăp dôk ti anăp klei Aê Diê phat kđi hrue anei mơ̆?
Wah lač: Ơ Ama Pô doh jăk hĭn leh anăn bŏ hŏng klei jăk, lač jăk kơ Ama bi mtlaih leh kâo leh anăn brei klei jăk mơak kơ kâo mơ̆ng êjai kâo ăt dôk ti lăn ala anei leh anăn wăt hlăm ênuk hlŏng lar. Brei kâo dôk sĭt suôr tui hlue Khua Yang tơl truh knhal tuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Nêhêmi 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
