Galati 6:1
“Ơ ‘nhŏng oh, dah iĕm ‘bôh lu ‘nhŏng oh bơ̆n bơngai lui pơm tơdrong yoch, na lu iĕm mă lui kơjăp, iĕm athei tơgŭm sư pơm mă ‘lơ̆ng hŏ. Iĕm tơgŭm sư, iĕm kư̆m athei ‘mêm mơnat kơ sư mơ̆n, ‘nĕ hil kơ sư păng iĕm athei kơchăng akâu iĕm kơdih mơ̆n, hli kơ yang Satan kư̆m wă pơhlŭ pơlung iĕm.” (Galati 6:1)
Nơ̆r jet tơchĕng pơwao:
– Bơngai “mă lui kơjăp” kăl kơ pơ’lơ̆ng gah tơdrong kiơ kơplah tơ’bưh hăm tơdrong yoch bơngai nai?
– Băt hơđăl tơdrong ‘nâu jơhngơ̆m bơ̆n thoi yơ kơplah tơgŭm bơngai ưh kơ pơrơ̆ng pơm yoch?
Lăm Galati 6:1 roi tơbăt tŏ sĕt sư 6 tơdrong ‘lơ̆ng Plei Yang Bơhngol ‘Lơ̆ng ‘noh ‘mêm mơnat, hơđơ̆ng, kĕ chơ̆n (gah kĕ gơ̆t) gơh tơgŭm, iơ̆m dim, iŏk đon ala lăm tơdrong arih bơngai lui kơplah tơ’bưh hăm tơdrong glăi lu ‘nhŏng mai oh bơ̆n. Dah ưh kơ đei Yang Bơhngol ‘Lơ̆ng bơ̆jang kơplah wă pơm kơdranh păng wơ̆ pran dôm tơdrong ‘lơ̆ng gah bơhngol nâu lei na ưh kơ đei bu gơh kĕ pơm kiơ̆ tơdrong bơtho lăm nơ̆r ‘Bok Kei-Dei tơ kơpal.
Nơ̆r “hơmet tơgŭm” noh nơ̆r đơ̆ng lu bơngai mă chă hơlen pơnhen gah tơdrong pơ̆n hơmet dah mă hơmet lu kơting tơgơ̆ lăm bơngai jĭ nơ̆r ‘nâu pơma kơ tơdrong hơmet ming păng pơklaih. ‘Nâu bơih tơdrong jang Yang Bơhngol ‘Lơ̆ng lăm tơdrong jang tơplih minh ‘nu bơngai lui đơ̆ng bơngai lui nai tơgŭm. Bơngai lui ưh kơ gơh “tơgŭm” bơngai mă pơm yoch hăm tơdrong mă ưh kơ băt mơnat, mălei athei đei tơdrong ‘mêm wă kơ mơn băt tơdrong jĭ sơ’ngon păng tơdrong bơngai ‘noh gô iŏk đơ̆ng sư pơm tơdrong yoch, păng tơdrong ‘mêm wă kơ băt tơdrong tơ’bưh băl lăm tôm tơdrong lăm akâu ‘Bok Krist. ‘Nguaih kơ noh, kư̆m athei đei jơhngơ̆m ‘maih tơgŭm bơngai mă ưh kơ pơrơ̆ng pơm yoch gơh hiôk hơiă hăm Kră Yang păng oei lăm tơdrong ‘mêm mơnat lăm Khul Bơngai Lui. Wă kơ jang tơgŭm ‘nâu. Bơngai lui kăl kơ đei iŏk đon ala, iơ̆m dim, kĕ chơ̆n gơh hơgei, na đơ̆ng tơdrong ‘noh bơih gơh ba bơngai pơm yoch năm tơ ‘Bok Kei-Dei păng nơ̆r Sư, tơgŭm lu sư băt tơdrong ‘lơ̆ng rơgoh hăm tơdrong mơnat Kră Yang wă tơ jur akâu păng tơbral.
‘Bok Pôl tơ’blŏk kơ bơngai lui kăl kơ đei Yang Bơhngol ‘Lơ̆ng mălei kư̆m athei kơchăng wei akâu kơdih “hli kơ yang satan kư̆m wă pơhlŭ pơlung iĕm”. Dah bơ̆n ưh kơchăng pơ’lơ̆ng wei akâu kơdih lăm Yang Bơhngol ‘Lơ̆ng păng nơ̆r Kră Yang lei phŏ sư kư̆m đei pơm yoch thoi noh mơ̆n. Băt tơdrong ‘nâu ba kơ bơ̆n đei tơdrong iŏk đon ala ‘bơ̆t anăp Kră Yang păng ‘bơ̆t anăp ‘nhŏng mai oh mă ‘blŏk ‘bơ̆t bơ̆n jang tơdrong jang “hơmet tơgŭm” tơdrong glăi bơngai nai. Kăl kơ ‘blŏk bơ̆n đei tơdrong pơhlŭ ‘bônh dêh jing pơang gah bơhngol, lăng bơ̆n kơdih ‘lơ̆ng hloh bơngai pơm yoch. Thoi bơngai pharisi krao khan: “Na ‘bok bơngai Pharisi ei dơ̆ng dơ’nhơ̆ng ngoi tơ plĕnh krao khan lăm to khan: ‘Ơ ‘Bok Kei-Dei, inh bơnê kơ Ih yua kơ inh ưh kơ sĭ bơngai thoi đe nai ôh. Inh ưh kơ sĭ bơngai ưh kơ tơpăt, chă pơgơ̆m sa đe ôh. Inh ưh kơ ngôi kư̆ kă ôh. Inh kư̆m ưh kơ sĭ thoi lĕ bơngai chă iŏk jên thuê̆ ‘noh ôh.” Luka 18:11). Bơngai thoi noh, tơplih kơ tơdrong ‘brơ̆k mơnat hăm bơngai mă ưh kơ pơrơ̆ng pơm yoch na hiĕk achơ̆ kơplah ‘bôh bơngai noh pơm tơdrong yoch. Tơplih kơ tơdrong ơh sơ’ngon gah tơdrong yoch na chơt hiôk khan kơdih hloh kơ bơngai nai minh kơnao. Phŏ phŏ bơ̆n ưh kơ đei wă pơrơ̆ng thoi noh ră, mălei tơdrong ‘bônh dêh ding mah ưh kơ băt kơ yoch, păng tơdrong pơang, khan bơ̆n kơdih hơgei pran hloh tơdrong mă bơ̆n tơchĕng gah tơdrong noh.
Ơ Kră Yang, apinh Ih ăn kơ inh minh jơhngơ̆m ‘mêm mơnat kơplah tơ’bưh hăm lu ‘nhŏng oh pơ̆k huŏng, păng kư̆m ăn kơ inh đei jơhngơ̆m iŏk đon ala wă gơnang kơ Ih. Krao khan yua anăn Kră Yang Yêsu Krist, Amen.
Bơ̆n hlôi bơih păng oei tơ’bưh hăm tơdrong yoch bơngai nai thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: Mika 2
Kênh Youtube BHKTHN:
