Klei Aê Diê Blŭ: Klei Bi Hriêng 29:26
Êlan kliăng: “Lu mnuih tui duah klei pap mơ̆ng khua kiă kriê, ƀiădah mơ̆ng Yêhôwa yơh mnuih srăng mă tŭ klei djŏ” (Klei Bi Hriêng 29:26)
Klei êmuh ksiêm mĭn: Ya rup Mtao Salômôn yua čiăng bi êdah klă kơ phung mnuih mâo klei dưi? Si arăng srăng knang kơ phung mâo klei dưi anei? Si drei ngă čiăng drei mâo klei bi knar hŏng phung mâo klei dưi ti lăn ala?
Hlăm ênuk mphŭn dô, mtao yơh jing pô mâo klei dưi prŏng hĭn, kyuanăn mâo lu mnuih tui duah klei pap mơ̆ng mtao. Jăk snăk tơdah thâo “klei pap mơ̆ng mtao” lŏ mblang jing “bô̆ mta mtao”! Ƀô̆ mta bi êdah kơ ai tiê, kơ klei bi kčŭt leh anăn knuih sa čô mnuih, kyuanăn arăng srăng dlăng si ƀô̆ mta mtao bi êdah leh anăn kơh srăng ruah klei blŭ leh anăn klei ngă. Snăn yơh, êlan klei bi hriêng anei lač kơ klei lu mnuih tui duah čiăng mă ai mtao leh anăn tui duah “klei pap” mơ̆ng mtao.
Tơdah Klei Bi Hriêng 29:25 lač kơ klei huĭ jing kđông ƀêč snăn êlan 26 lač djŏ kơ klei khŏ tơdah knang kơ mnuih kluôm dhuôm, wăt tơdah pô anăn jing sa čô mtao dưn mơh. Hdơr bĕ, Klei Aê Diê Blŭ mtă brei drei gưt kơ phung khua kiă kriê (Rôm 13:1-9). Ƀiădah êlan klei bi hriêng anei mtă brei răng kơ klei soh bi klăk hŏng klei anăn, anăn jing drei čuăn jao jih kơ sa čô khua kiă kriê klei drei čiăng kơ klei djŏ ƀiădah wơr bĭt hĕ knŏng Aê Diê yơh dưi brei klei djŏ truh sĭt nik. Amâodah lač snei, đăm drei wơr bĭt ôh phung khua kiă kriê ăt jing mnuih soh, mâo knhal, ăt mâo klei tluh leh anăn tŭ klei bi dleh (Bruă Phung Khua Ƀĭng Kna 24:25-27), amâo klei amâo djŏ (I Kôrantô 2:6,8), jing phung mnuih thâo djiê mơh (Klei Mmuñ Hđăp 146:3-4). Diñu jing phung amâo klă ênŭm ôh, leh anăn brei drei răng čiăng kơ drei amâo knang leh anăn čang hmăng kơ diñu hĭn kơ Aê Diê ôh (Klei Mmuñ Hđăp 146:3-7).
Knŏng hlăm Aê Diê yơh mâo klei kpă ênô kluôm ênŭm kyuadah Ñu jing Pô ƀuh ai tiê mnuih leh anăn jing Pô thâo mĭn kluôm ênŭm. Năng ai drei amâo ƀuh ôh klei Aê Diê phat kđi kpă hlăm klei hdĭp anei, ƀiădah sĭt nik Aê Diê srăng ngă klei anăn hlăm hruê phat kđi knhal tuč (Rôm 2:5-6; II Kôrantô 5:10). Klei anăn ăt čiăng lač đăm drei luč klei čang hmăng ôh tơdah ƀuh phung khua kiă kriê drei mâo anôk kƀah, mâo klei soh. Brei drei weh đuĕ kơ klei blŭ jhat leh anăn mưč kơ phung khua kiă kriê, amâodah kơ klei ngă ngai ti anăp klei jhat leh anăn klei soh.
Amâodah lač snei, tơdah drei čiăng knang leh anăn čang hmăng knŏng kơ Aê Diê yơh jing Pô dưi brei klei hơĭt leh anăn êđăp ênang kơ lăn ala leh anăn kơ Phung Sang Aê Diê, brei drei weh đuĕ mơ̆ng klei kkuh mpŭ amâodah đing bŏ hŏng klei phĭ kơ phung khua kiă kriê, kyuadah diñu ăt jing knŏng mnuih mơh. Jih dua klei ngă anei amâo djŏ knŏng bi rŭng klei hdĭp phung đăo ôh, ƀiădah wăt bi čhŏ Anăn Aê Diê, Pô kdlưn êgao hĭn kơ jih jang klei dưi mnuih mơh.
Kơ hlei pô drei dôk đăo?
Wah lač: Ơ Khua Yang, brei kâo dlăng kơ Ih nanao leh anăn knang kjăp kơ klei kpă ênô Aê Diê wăt tơdah kâo tuôm hŏng klei wê hlăm klei hdĭp anei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 79-80
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
