Klei Aê Diê Blŭ: II Klei Yăl Dliê 35:20-26
Êlan kliăng: “Kâo phat kđi tui si kâo hmư̆; leh anăn klei kâo phat kđi jing kpă, kyuadah kâo amâo duah klei kâo pô čiăng ôh, ƀiădah tui si klei pô tiŏ hriê kâo čiăng.” (Y-Yôhan 5:30b)
Klei êmuh ksiêm mĭn: Ya bruă Y-Nêkô Mtao Êjip ngă? Si mtao Jôsia wĭt lač? Si boh tŭ mâo? Ya klei brei drei ngă êlâo kơ bi mklă djăp mta klei?
Y-Nêkô, Mtao Êjip, ba kahan nao blah Kaskêmir, hlăm ala mtao Asiri ti êgar dưr. Hlăk anăn, Asiri dôk awăt, Ƀaƀilôn dôk ktang. Ƀaƀilôn ksŭng ngă ti Kaskêmir mơ̆ng Asiri čiăng bi rai ala mtao anei. Mtao Y-Nêkô čiăng ba kahan nao ti Kaskêmir đru kơ ƀĭng hgŭm Asiri bi kdơ̆ng hŏng Ƀaƀilôn. Kdrêč êlan nao ti nah Dưr găn Yuđa, ƀiădah Mtao Jôsia ba kahan bi kgăn lăn. Mtao Y-Nêkô tiŏ nao phung dĭng ktang nao mblang hŏng Mtao Jôsia leh anăn brei thâo ñu dôk hlue ngă klei Aê Diê mtă. Tơdah bi kdơ̆ng hŏng mtao Nêkô jing bi kdơ̆ng hŏng Aê Diê, leh anăn Aê Diê srăng bi rai mtao. Ƀiădah Mtao Jôsia amâo bi kbiă lĭng kahan ôh ƀiădah lŏ bi blah hŏng Mtao Nêkô. Knhal tuč Mtao Jôsia djŏ ƀrăm leh anăn êka kjham. Hlăk arăng ba wĭt ti Yêrusalem snăn ñu djiê hlăk êjai mrâo tlâo pluh dua păn thŭn. Arăng dơr mtao bŏ hŏng klei kdrưh kơang hlăm mtao phung aê ñu, jih krĭng Yuđa hia ênguôt kơ mtao. Khua pô hưn êlâo Y-Yêrêmi, jing Khua pô hưn êlâo hlăm ênuk mtao, čih klei mmuñ čŏk hia. Dŭm pruê̆ knhal tuč kdrêč anei jing klei klah čŭn kơ Mtao Jôsia. Wăt tơdah ngă soh amâo hlue gưt klei Khua Yang čiăng leh anăn djiê, ƀiădah dlăng kluôm, arăng dlăng mtao jing pô ngă leh “bruă jăk … tui si klei arăng čih leh hlăm klei bhiăn Aê Diê” (êlan 26).
Wăt sa čô mnuih dưi dlăng jing êbat tui hlue êlan mtao Đawit, amâo weh tĭng kơ hnuă amâodah tĭng kơ điâo ôh (II Klei Yăl Dliê 34:2), bi rai jih rup yang hlăm krĭng, lŏ mkŏ mjing klei kkuh mpŭ hlăm sang yang (II Klei Yăl Dliê 35:20), ăt tuôm ngă soh amâo gưt hlue si klei Khua Yang čiăng leh anăn djiê. Djăp klei truh djŏ hŏng klei bhiăn hdruôm hră Klei Yăl Dliê čih leh, anăn jing tơdah gưt asăp Khua Yang snăn mtao mâo klei hing ang, mdrŏng sah, êđăp ênang; tơdah amâo ngă snăn, mtao srăng wiă klei truh jhat. Mtao Jôsia ngă leh hlue si klei pô čiăng “amâo wir đuĕ ôh” hlăk hmư̆ klei hưn brei răng, năng ai kyua jhŏng đei leh lu klei tŭ jing Aê Diê brei mâo leh. Năng ai, brei mtao Jôsia wah lač kơ Aê Diê êlâo kơ ba kahan nao bi blah. Năng ai, brei mtao tiŏ mnuih nao hŏng Khua pô hưn êlâo Y-Yêrêmi čiăng thâo săng klă hĭn klei Aê Diê čiăng, msĕ si êlâo dih mtao tiŏ nao leh mnuih tui duah Khua pô hưn êlâo Mniê H’Hulda.
Drei ênưih snăk ngă hlue si klei pô čiăng, boh nik tơdah mâo Aê Diê dôk mbĭt, brei mâo klei tŭ jing, jăk mơak. Brei thâo răng čiăng êbat nanao hlăm êlan Khua Yang leh anăn hlue ngă Klei Aê Diê Blŭ. Tơdah Mtao Jôsia, jing pô mâo Aê Diê yua hlăm bruă prŏng, ăt mâo klei truh msĕ snăn kyua amâo gưt asăp Ñu, snăn hlei drei jing ƀiădah drei bi mĭn pô amâo srăng ngă soh. Brei drei thâo răng tui duah klei Khua Yang čiăng êlâo kơ bi mklă ya klei, leh anăn ăt brei jih ai tiê tui hlue klei Ñu čiăng wăt tơdah ƀuh klei dleh dlan amâo djŏ hlue si klei pô čiăng.
Êlâo kơ truh kơ bruă ngă wăt tơdah điêt amâodah prŏng, drei khăng akâo wah lač hlue si klei Aê Diê čiăng mơ̆?
Wah lač: Ơ Khua Yang, akâo kơ Ih pap brei kơ kâo kyua kâo khăng ngă hlue si klei pô čiăng. Akâo kơ Khua Yang ƀuah mkra kâo, đru kâo tui duah klei ih čiăng leh anăn gưt asăp Ih čiăng amâo lĕ êbuh ngă soh ôh hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôel 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
