II Xwmtxheej 35:20-26
Nqe cim:
“Kuv yeej txiav txim ncaj ncees, rau qhov kuv tsis ua raws li kuv lub siab nyiam, tiamsis kuv tsuas ua raws li tus uas txib kuv los lub siab nyiam xwb.” (Yauhas 5:30b)
Lus nug xav:
– Vajntxwv Nekaus uas kav lub tebchaws Iziv tau ua dabtsi?
– Vajntxwv Yauxiyas ua li cas? Thaum kawg zoo li cas?
– Peb yuav tsum ua dabtsi ua ntej yuav txiav txim siab ua txhua yam?
Nekaus, uas yog vajntxwv kav tebchaws Iziv coj tubrog tuaj tua rog rau ntawm Kakhemis uas nyob ntawm ntug Dej Efalates, ntawd yog tebchaws Axilias cheebtsam av. Thaum ntawd, Axilias tabtom qaug zog, Npanpiloos tabtom muaj zog tuaj. Npanpiloos tua Kakhemis kom rhuav tshem tau tebchaws Axilias. Vajntxwv Nekaus xav coj tub rog mus rau Kakhemis mus pab tebchaws Axilias tawmtsam Npanpiloos. Txojkev mus rau sab qaum teb yuav tsum hla Yudas tebchaws, tiamsis Vajntxwv Yauxiyas coj tub rog tuaj tav kev. Vajntxwv Nekaus txib neeg tuaj hais rau Vajntxwv Yauxiyas thiab qhia hais tias nws tabtom ua raws li Vajtswv lub siab nyiam. Yog tawmtsam Vajntxwv Nekaus ces yog tawmtsam Vajtswv, thiab Nws yuav rhuav tshem vajntxwv. Tiamsis Vajntxwv Yauxiyas tsis kam thim tub rog, hloov khaub ncaws mus tawmtsam Vajntxwv Nekaus. Thaum kawg, Vajntxwv Yauxiyas raug xib xub thiab raug mob hnyav. Thaum coj los txog Yeluxalees ces vajntxwv tas sim neej thaum muaj hnub nyoog peb caug cuaj xyoo xwb. Luag muab vajntxwv faus rau qhov chaw muaj koob meej hauv nws cov yawg koob tej qhov ntxa; tag nrho tebchaws Yudas quaj ntsuag rau vajntxwv. Yelemis, yog tus Cevlus nyob rau vajntxwv tiam, sau zaj nkauj quaj ntsuag. Cov kab lus kawg hauv tshooj no yog lus xaus txog Vajntxwv Yauxiyas. Txawm tias muaj qhov yuam kev tsis mloog raws Vajtswv lub siab nyiam thiab raug tuag, tiamsis saib mus rau qhov dav, vajntxwv tau suav hais tias yog tus “muab siab npuab tus TSWV, ua raws li txoj Kevcai” (nqe 26).
Txawm yog ib tug neeg uas tau suav hais tias taug Vajntxwv Daviv txojkev, tsis tig mus rau sab xis lossis sab laug (II Xwmtxheej 34:2), rhuav tshem tej mlom hauv tebchaws, txhim kho kev teev tiam hauv Vajtswv lub Tuam Tsev (II Xwmtxheej 35:20), los kuj tseem muaj lub sijhawm ua txhaum tsis ua raws li Vajtswv lub siab nyiam thiab raug tuag. Txhua yam tshwm sim raws nraim li txojcai hauv Phau Xwmtxheej twb qhia, yog tias mloog Vajtswv lus ces vajntxwv tau koob meej, vam meej, kaj siab lug; yog tsis mloog, vajntxwv yuav tau txais teebmeem. Vajntxwv Yauxiyas tau ua raws li lub siab nyiam, tsis kam thim thaum hnov lus ceebtoom, tej zaum tomqab uas tau tus Tswv pub ua tau ntau yam vammeej ua rau nws ntseeg siab rau nws tus kheej heev. Qhov tseeb, Vajntxwv Yauxiyas yuav tsum nrhiav Vajtswv lub siab nyiam ua ntej coj tub rog mus ntaus rog. Tsimnyog, vajntxwv yuav tsum txib neeg mus ntsib tus Cevlus Yelemis kom paub meej txog Vajtswv lub siab nyiam, zoo li yav dhau los vajntxwv twb txib neeg mus ntsib tus pojniam Cevlus uas yog Hulidas.
Peb los yeej yooj yim ua raws li peb lub siab nyiam, tshwj xeeb yog thaum tau Vajtswv nrog nraim, pub kev vam meej, koob hmoov. Yuavtsum ceevfaj kom niaj hnub taug Vajtswv txojkev thiab ua raws li Nws Txojlus. Yog Vajntxwv Yauxiyas, yog tus Vajtswv siv ua tej haujlwm loj, tseem muaj qhov xaus zoo li ntawd vim tsis mloog Vajtswv lus, ces peb yog leejtwg uas yuav xav tias peb tsis paub qaug. Yuav tsum ceevfaj nrhiav Vajtswv lub siab nyiam ua ntej txiav txim siab ua txhua yam, thiab yuav tsum txiav txim siab ua raws li Nws lub siab nyiam txawm tias nyuaj lossis tsis haum yus siab.
Thov Vajtswv,
Tus Tswv, thov zam txim rau nyuam yaus vim nyuam yaus pheej ua raws tus kheej lub siab nyiam. Thov Koj qhuab ntuas nyuam yaus, pub rau nyuam yaus niaj hnub nrhiav thiab ua raws Koj lub siab nyiam kom tsis qaug hauv lub neej. Nyuam yaus tuav Yexus Khetos lub npe thov, Amees.
Ua ntej peb yuav ua ib yam dabtsi txawm me lossis loj, peb puas pheej nrhiav Vajtswv lub siab nyiam?
Nyeem Vajluskub hauv peb lub xyoos: Yau-ees 1
Kênh Youtube BHKTHN:
