II Hơ’mon 35:20-26
“Tơdrong Inh sek tơlang Inh sek tơlang mă tơpăt kiơ̆ thoi Sư,kơlih kơ Inh ưh kơ wă kiơ̆ thoi Inh kơdih, Inh athei pơm trŏ thoi ‘Bă Inh mă wơh Inh wă.” (Yôhan 5:30b)
Nơ̆r jet tơchĕng pơwao:
– Nêkô pơtao đe Êyiptơ noh sư pơm kiơ?
– Jơhngơ̆m pơtao Jôsia thoi yơ? Lĕch sư tơdrong kiơ?
– Lu bơ̆n kăl kơ pơm kiơ adrol kơ jang pơm tôm tơdrong?
Nêkô pơtao đe Êyiptơ chông khul linh sư năm blah Pơlei Karchêmis cheng đak krong Ơphrat. Jơ ‘noh khul Asiri pă kĕ bơih, Babilôn oei pran kơtang. Thoi noh Babilôn tŏk blah Karchêmis đơ̆ng Asiri wă pơrăm dêh ‘nâu. Pơtao Nêkô ‘maih chông khul linh sư năm tơ Karchêmis wă dŏng khul sư Asiri na blah plơ̆ Babilôn. Lu sư năm đơ̆ng gah yă nơ̆m brih trong dêh Juđa, mă-lei pơtao Jôsia chông linh găn trong. Pơtao Nêkô wơh bơngai năm khan kơ pơtao Jôsia păng tơbăt athei sư pơm kiơ̆ kơ Kră Yang wă. Dah pơm plơ̆ pơtao Nêkô noh kư̆m dang pơm plơ̆ Kră Yang mơ̆n na Kră Yang gô pơrăm lê̆ pơtao. Mă-lei pơtao Jôsia ưh kơ wă kơdŭn tơ rŏng,na kang rai hơmet tah hơbăn ao linh hmă wă kơ lu ayăt ưh kơ kơnăl kơ sư pơtao na năm tơ anăp tơblah hăm Nêkô. Đơ̆ng noh, đei linh gŭt hră prah ‘bơm hĭ pơtao Jôsia,na sư jĭ trăp dêh. Na đe tung ba sư brŏk tơ Jêrusalem,na sư lôch hloi tơ noh kơplah sư lăp pêng jĭt tơsĭn sơnăm đĕch. Đe ‘bŭ sư hơdai hăm bơsat lu ‘bok sư, đĭ bơngai Juđa grong nhơ̆m hmoi kơ sư. Jêrêmi bơngai pơtruh nơ̆r ‘Bok Kei-Dei kơplah chăl pơtao ei sơ̆, sư pơm‘bai hơri nhơ̆m hmoi kơ pơtao Jôsia.
Nơ̆r tuch luch lăm hla bơar II Hơ’mon chăl 35 ‘nâu, noh nơ̆r pơtôch roi gah tơdrong arih pơtao Jôsia. Mă khan sư đei pơm glăi ưh kơ chu kiơ̆ nơ̆r Kră Yang wă na lôch, lei ră mă-lei tơpă sư, sư minh ‘nu bơngai jang pơm lơ tơdrong ‘lơ̆ng…. kiơ̆ kơ đei chih răk lăm Sơ̆p hla bơar Khôi juăt Kră Yang. (trong 26).
Mă khan bơ̆n lăng pơtao Jôsia âu minh ‘nu bơngai yak kiơ̆ trong ‘bok Đawit ưh kơ weh gah ‘ma dah gah ‘ngieo (II Hơ’mon 34:2)
Sư teh pơchah đĭ lu rup yang lăm pơlei păng hơmet hnam Kră Yang (II Hơ’mon 35:20),sư kư̆m pơ̆k puh‘bơm lăm tơdrong glăi ưh kơ pơm kiơ̆ kơ Kră wă, na đei tơdrong lôch.Dôm tơdrong hiôk ‘lơ̆ng đei kơ sư trŏ thoi Hla bơar hơ’mon đei chih, noh kơplah sư chu kiơ̆ Kră Yang, tơdrong arih sư hiôk jơnap, đe pơ-ư bơnê, hiôk hơđơ̆ng. Kơplah sư arih tơplơ̆ kơ nơ̆r Kră Yang, sư đei pŭ iŏk tơdrong răm.Pơtao Jôsia hlôi pơm kiơ̆ kơdih “ưh kơ ŭn tơ rŏng”, kư̆ kơ blŭng hloi tơ anăp kơplah đe roi tơbăt kơ sư nơ̆r Kră Yang noh. Rŏ lăng sư oei ngeh kơ thoi hơdrol hơdrol ki dôm sư tơblah noh Kră Yang ăn jei sư, Mă trŏ sư, pơtao Jôsia, hơdrol kơ wă chông linh năm tơblah noh sư krao chă Kră Yang ‘mơ̆i, wơh bơngai năm jet Jêrêmi bơngai mă khan lê̆ adrol noh ‘mơ̆i wă kơ băt hơđăl kơ tơdrong Kră Yang wă, thoi hơdrol sơ̆ sư wơh bơngai năm roi kơ yă Hunda bơngai khan lê̆ hơdrol noh.
Lu bơ̆n kư̆m ngăl ‘bônh kơ pơm kiơ̆ kơdih, mă loi sư, kơplah Kră Yang oei hơdai, ăn tơdrong pŭn hiôk rơnŭk rơnua, athei mă pơ’lơ̆ng wă kơ yak kiơ̆ trong Kră Yang, pơm kiơ̆ dôm nơ̆r Sư. ’Nhŏ kơ pơtao Jôsia noh bơngai Kră Yang yua bơih ră mă-lei oei đei tơdrong truh thoi noh yua kơ ‘bơ̆t jơ sư ưh kơ chu kơ nơ̆r Kră Yang, lei bĭ lu bơ̆n ‘nâu bu na tơchĕng khan bơ̆n ‘lơ̆ng ling-lang huay kơ pơm yoch hloi bơih. Athei mă pơ’lơ̆ng hơdrol kơ wă pơm kiơ jang kiơ păng athei hơdrin pơm kiơ̆ kơ Kră Yang wă mă khan bơ̆n ‘bôh anat pat dah mă ưh kơ thoi jơhngơ̆m đon bơ̆n wă.
Ơ Kră Yang, apinh mơnat kơ inh yua kơ inh ngăl pơm kiơ̆ kơdih wă. Apinh Ih bơtho tơ’bôh, hơtŭt jơhngơ̆m inh wă kơ inh ling-lang ‘blŏk krao chă Ih păng chu kiơ̆ Ih, wă kơ inh arih lăm teh đak âu huay kơ puh pơ̆k pơm yoch hăm Ih.Inh krao khan yua anăn Kră Yang Yêsu Krist, Amen!
Hơdrol kơ wă jang pơm tơdrong tih dah iĕ, bơ̆n hăm krao chă Kră Yang, păng hăm kiơ̆ kơ Sư wă ưh?
Đŏk Sơ̆p Hla bơar ‘Bok Kei-Dei lăm pêng sơnăm: Jôel 1
Kênh Youtube BHKTHN:
