Luka 2:21-24
“Mă-lei truh boih năr ‘Bok Kei-Dei pơkă, Sư wơh Kon Sư jur tơ ala teh âu. Kon bơngai bơ̆n tơpŭ kơ Sư, thoi noh na Sư kiơ̆ tôm tơdrong juăt kon bơngai. Sư wă kơ gơh huai iŏk đĭ đăng bơngai bơ̆n mă kiơ̆ tơdrong juăt kon bơngai, na bơ̆n jing kon Kră Yang ‘Bok Kei-Dei.” (Galati 4:4-5)
Nơ̆r jet tơchĕng pơwao:
– Đơ̆ng rŏng kơ đe tơpŭ kơ Kră Yang, bre Yôsep păng Mari đei pơm lu tơdrong juăt ayơ kiơ̆ kơ lăm tơdrong juăt lu sư?
– Yua kơ đơ̆ng kiơ na bơ̆n gơh klaih păng jing kon Kră Yang?
Mari ưh kơ kơhioh ‘noh minh tơdrong hlĭch chrơp dêh ưh kơ lơ tŏ sĕt đei ‘bơm truh kơ tơdrong tơchĕng bre sư kơplah chang gô năr et sa kơ bre sư, mă khan lei ră bre sư chu kiơ̆ nơ̆r Kră Yang, arih hơdai truh năr Mari rơneh. Rơneh kơ Yêsu bơih, bre sư pơm kiơ̆ tơdrong juăt Môis. Blŭng a noh kăt tơdra păng chă anăn lăm năr mă tơhngam (trong 21; Lêwi 12:3). Kră Yang Yêsu bơih Yang mă ‘bar lăm ‘Bok Kei-Dei jur jing kon bơngai Yang ưh kơ đei yoch ôh. Mălei sư chu kăt tơdra akar kiơ̆ kơ tơdrong juăt, kư̆m nhen thoi sư pơm ‘Batem mơ̆n, wă “jang keh tôm tơdrong ‘Bok Kei-Dei wă” (Mathiơ 3:15). Na bre sư krao anăn kon sư Yêsu “krao anăn kiơ̆ kơ Linh jang ‘lơ̆ng khan.”
Pơtrơp dơ̆ng tơdrong jang pơyơ̆r kon nge kơ ‘Bok Kei-Dei (trong 22-24). Đơ̆ng rŏng kơ dôm năr ‘lơ̆ng rơgoh kiơ̆ tơdrong juăt Môis (Lêwi 12:1-7). Bre Yôsep păng Mari anhăk ba Yêsu năm tơ pơlei Jêrusalem wă pơyơ̆r kơ ‘Bok Kei-Dei. ‘Nâu bơih tơdrong ‘Bok Kei-Dei pơkă đơ̆ng rŏng kơ Kră Yang phak kon drŏnglo Êyiptơ păng ‘măn lê̆ lu kon drŏnglo bơngai Isơrael kơ Kră Yang đơ̆ng kon bơngai truh tơ sem dơrong (Jô̆ bơngai 3:13).
‘Blŏk hơdơ̆r kơ năr Kră Yang Yêsu jur jing kon bơngai sơnăm ‘nâu, lu bơ̆n bơnê kơ Kră Yang yua kơ chăl arih Kră Yang Yêsu đơ̆ng năr Sư jing kon bơngai truh tơ Sư bơ̆jang. Kră Yang lăp đon dôm tơdrong hăm tơdrong arih chu kiơ̆ tôm tơdrong juăt ‘noh. Kơplah bơ̆n đŏk puăn Sơ̆p Hla bơar Tơdrong ‘Nao ‘Lơ̆ng, lu bơ̆n ‘bôh lơ wơ̆t Yêsu khă găn tơdrong juăt păng bơngai Pharisi, mălei hăm tơdrong juăt ‘Bok Kei-Dei lăm sơ̆p hla bơar ‘Bok Kei-Dei, minh Sư đĕch Yang mă pơm keh tơdrong juăt kiơ̆ thoi nơ̆r Sư đei khan: “Iĕm ‘nĕ tơchĕng ‘bôh Inh truh tơ âu khan Inh wă pơrăm đĭ dôm tơdrong juăt Môis dah tơdrong lu ‘bok pơtruh nơ̆r ‘Bok Kei-Dei sơ̆. Ưh ôh, Inh truh tơ âu kang wă jang mă tôm mă ‘blep tôm tơdrong lu sư bơtho khan sơ̆.” (Mathiơ 5:17).
Kon bơngai yoch ưh kơ đei minh ‘nu bu gơh kĕ kiơ̆ tơdrong juăt, lăp minh Kră Yang Yêsu đĕch arih kiơ̆ tôm tơdrong juăt thoi noh na Sư pŭ iŏk dŏng lu bơ̆n mă arih ưh kơ chu kiơ̆ tơdrong juăt, mưh bơ̆n đei đon lui kơ Yêsu thoi nơ̆r Sư đei khan: “Mă-lei truh boih năr ‘Bok Kei-Dei pơkă, Sư wơh Kon Sư jur tơ ala teh âu. Kon bơngai bơ̆n tơpŭ kơ Sư, thoi noh na Sư kiơ̆ tôm tơdrong juăt kon bơngai. 5 Sư wă kơ gơh huai iŏk đĭ đăng bơngai bơ̆n mă kiơ̆ tơdrong juăt kon bơngai, na bơ̆n jing kon Kră Yang ‘Bok Kei-Dei.” (Galati 4:4-5). Athei pơyơ̆r nơ̆r bơnê kơ Kră Yang, Tơ’ngla mă jur tơ ala teh, chu lôch tang ăn kơ lu bơ̆n, pơm keh tơdrong juăt ‘Bok Kei-Dei wă pơklaih bơ̆n.
Ơ Kră Yang Yêsu, inh bơnê kơ Ih yua kơ Ih achăng lê̆ anih ‘lơ̆ng rŏ kơpal plĕnh na jur tơ ala teh jing kon bơngai, pơm keh tơdrong juăt ‘Bok Kei-Dei wă dŏng pơklaih inh păng ăn kơ inh jing kon Ih. Apinh Ih tơgŭm ih awih awăn păng ră roi tơdrong ‘nao ‘lơ̆ng Ih ‘nâu kơ lơ bơngai. Krao khan yua anăn Kră Yang Yêsu Krist, Amen.
Lu bơ̆n pơkă kơ Kră Yang tơdrong kiơ lăm năr ‘blŏk kơ Kră Yang jur jing bơngai bơih ‘nâu?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong jang 13
Kênh Youtube BHKTHN:
