Klei Aê Diê Blŭ: Y-Luk 2:21-24
Êlan kliăng: “Ƀiădah tơdah hruê bi kčah truh leh, Aê Diê tiŏ hriê Anak Ñu, brei sa čô mniê kkiêng, čiăng kơ Ñu dôk hdĭp ti gŭ klei bhiăn čiăng bi tui phung dôk ti gŭ klei bhiăn, čiăng kơ drei dưi mă tŭ klei brei jing anak rông ba” (Galati 4:4-5)
Klei êmuh ksiêm mĭn: Leh kkiêng kơ Khua Yang Yêsu, ya klei Y-Yôsep H’Mari ngă leh hlue si klei bhiăn kčah? Mơ̆ng ya klei drei mâo klei bi mtlaih leh anăn dưi jing anak Aê Diê?
Klei H’Mari ba tian bŏ hŏng klei myang ƀiă lu hmăi kơ klei mĭn diñu hlăk êjai dôk guôn hruê bi kuôl, khădah snăn diñu gưt asăp Aê Diê, bi mguôp mbĭt tơl truh hruê kkiêng. Leh kkiêng kơ Khua Yang Yêsu, diñu ngă leh klei bhiăn hlue si klei bhiăn Y-Môis kčah leh. Êlâo hĭn jing klei khăt klĭt leh anăn bi anăn hlăm hruê tal spăn (êlan 21; Bruă Lêwi 12:3). Khua Yang Yêsu jing Aê Diê Pô Tal Dua kkiêng jing mnuih, jing Pô amâo mâo klei soh ôh, ƀiădah Ñu ăt tŭ klei khăt klĭt hlue si klei bhiăn, mta phŭn ăt msĕ si hlăk Ñu tŭ klei ƀaptem, jing čiăng “djŏ kơ drei bi sĭt jih jang klei Aê Diê čiăng” (Y-Mathiơ 3:15). Diñu ăt bi anăn anak jing Yêsu “jing anăn dĭng buăl jăk bi anăn brei”.
Leh anăn jing bruă myơr anak điêt kơ Aê Diê (êlan 22-24). Leh klei bi doh jih hruê đih pui hlue si klei bhiăn Y-Môis (Bruă Lêwi 12:1-7), Y-Yôsep H’Mari ba Khua Yang Yêsu kơ ƀuôn Yêrusalem čiăng myơr kơ Aê Diê. Anei jing klei bhiăn Aê Diê leh Ñu bi kmhal phung anak tal êlâo phung Êjip leh anăn pioh hjăn kơ Aê Diê jih jang tal êlâo hlăm phung Israel wăt mnuih leh anăn hlô mnơ̆ng (Klei Yap 3:13).
Klei bi hdơr Hruê kkiêng Khua Yang Yêsu thŭn anei, drei bi mni kơ Aê Diê kyua klei hdĭp Khua Yang Yêsu mơ̆ng leh kkiêng jing mnuih tơl truh kơ dŭm thŭn mă bruă, Ñu bi leh ya klei bhiăn Aê Diê kčah hŏng knuih hdĭp gưt kluôm ênŭm kơ klei bhiăn anăn. Tơdah dlăng pă hdruôm hră Klei mrâo Mrang Jăk, drei ƀuh lu blư̆ Khua Yang Yêsu bi kdơ̆ng hŏng klei bhiăn mtô mơ̆ng ƀăng êgei phung khua čih hră leh anăn Phung Pharisi, ƀiădah hŏng klei bhiăn Aê Diê hlăm Klei Aê Diê Blŭ, Ñu jing Pô sa anăn bi leh msĕ si Klei Aê Diê Blŭ čih leh: “Đăm mĭn ôh kâo hriê bi rai klei bhiăn leh anăn klei phung khua pô hưn êlâo čih. Kâo hriê amâo djŏ čiăng bi rai ôh, ƀiădah čiăng bi sĭt” (Y-Mathiơ 5:17).
Anak mnuih soh jhat amâo mâo sa čô dưi ngă bi leh kluôm klei bhiăn ôh. Knŏng hjăn Khua Yang Yêsu hdĭp hlăm klei djă pioh klei bhiăn kluôm ênŭm kyua anăn Ñu dưi bi tui jih jang drei jing phung ti gŭ klei bhiăn ƀiădah amâo djă pioh, tơdah drei dưm klei đăo hlăm Khua Yang Yêsu msĕ si Klei Aê Diê Blŭ brei thâo: “Ƀiădah tơdah hruê bi kčah truh leh, Aê Diê tiŏ hriê Anak Ñu, brei sa čô mniê kkiêng, čiăng kơ Ñu dôk hdĭp ti gŭ klei bhiăn čiăng bi tui phung dôk ti gŭ klei bhiăn, čiăng kơ drei dưi mă tŭ klei brei jing anak rông ba” (Galati 4:4-5). Brei myơr klei bi mni kơ Aê Diê, Pô hriê leh, tŭ klei djiê hrô kơ drei, bi leh kluôm ênŭm klei bhiăn Aê Diê čiăng kơ drei mâo klei bi mtlaih.
Ya klei drei ƀuăn hŏng Khua Yang hlăm yan bi hdơr hruê Khua Yang hriê ti lăn ala mrâo êgao?
Wah lač: Ơ Khua Yang Yêsu, Bi mni kơ Khua Yang lui leh jhưng mtao adiê hriê ti lăn ala jing mnuih, bi leh kluôm ênŭm klei bhiăn Aê Diê čiăng brei klei bi tui leh anăn brei kâo dưi jing anak Ih. Akâo kơ Ih đru kâo hdĭp mă bruă leh anăn hiu hưn klei mơak anei kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
