Klei Aê Diê Blŭ: Klei Mmuñ Hđăp 138:1-8
Êlan kliăng: “Kâo bi mni kơ Ih hŏng jih ai tiê; kâo mmuñ bi mni kơ Ih ti anăp phung yang.” (Klei Mmuñ Hđăp 138:1)
Klei êmuh ksiêm mĭn: Si mtao Y-Đawit bi êdah ai tiê hdơr knga kơ Khua Yang? Ya klei ñu bi knal leh hlăm klei hdĭp ñu tui hlue Khua Yang? Si ñu bi mđĭ ai drei mpŭ mni kơ Khua Yang?
Klei Mmuñ Hđăp 138 jing klei Mtao Y-Đawit klah čŭn siam êdimi kơ ai tiê bŏ dlai klei bi mni, sa čô mnuih thâo kral klei hdĭp ñu jing dŏ Khua Yang kluôm dhuôm. Kčưm dơ̆ng hŏng klei blŭ hưn ñu srăng bi mni kơ Khua Yang hŏng jih ai tiê ñu, leh anăn hơ̆k mơak mmuñ bi mni kơ Aê Diê ti anăp phung yang (êlan 1). Ñu buôn kkuh phă sang yang doh jăk Aê Diê (êlan 2), bi êdah klei ñu ƀuăn rơ̆ng hŏng Khua Yang ti dlông hĭn kơ jih jang klei mkăn.
Mtao Y-Đawit lu blư̆ leh bi knal klei Khua Yang thiăm klei ktang kơ ñu leh anăn wĭt lač kơ klei ñu kwưh akâo (êlan 3). Kyuanăn, ñu hdơr knga kơ Khua Yang leh anăn đăo knang kơ Khua Yang hĭn êjai. Ktuê jih klei hdĭp Mtao Y-Đawit, phung čar roh tuôm wang jŭm dar lăn čar Israel leh (II Y-Samuel 8:1-10). Ƀiădah lĕ, ñu đăo srăng mâo sa hruê jih jang phung mtao ti lăn ala srăng thâo kral Khua Yang jing Pô ti dlông hĭn leh anăn năng kơ diñu kkuh mpŭ (Y-Êsai 45:23; Klei Mmuñ Hđăp 22:27). Ñu čang guôn hruê anăn srăng truh, hlăk anăn tar ƀar lăn ala srăng mmuñ bi mni kơ klei khăp klei pap leh anăn klei jăk Khua Yang (êlan 4-6).
Klei mmuñ bi mni mơ̆ng Mtao Y-Đawit amâo djŏ jing klei kkuh mpŭ hŏng kdŏng mang ôh, ƀiădah kna ti dlông klei ñu pô găn leh, thâo kral leh. Ñu hdơr knga nanao kơ klei jăk prŏng prĭn Khua Yang, leh anăn klei sĭt nik kjăp rơ̆ng Khua Yang Pô. Ksiêm mĭn kơ knuih jăk siam Khua Yang, kčŭt ai tiê Mtao Y-Đawit čiăng snăk mmuñ bi mni kơ Khua Yang. Ñu ăt lŏ bi êdah ai tiê đăo knang kơ klei Khua Yang răng mgang nanao (êlan 7). Ñu đăo sĭt Khua Yang dôk mbĭt hŏng ñu nanao kăp đru ñu dưi găn jih klei dleh dlan hlăm klei hdĭp. Ñu wah lač akâo kơ Khua Yang bi leh bruă Khua Yang dơ̆ng leh hlăm ñu, leh anăn yua klei hdĭp ñu jing mnơ̆ng yua pioh ngă bi leh klei čiăng jăk Khua Yang (êlan 8).
Klei Mtao Y-Đawit wah lač mñă kơ drei snei, Khua Yang mâo hdră kñăm kơ grăp čô mnuih. Drei mâo ƀô̆ mta ti lăn ala amâo djŏ jing klei mâo hjăn ôh ƀiădah jing klei dưi mơ̆ng Khua Yang brei. Ñu hrih mjing leh drei hŏng klei năng huĭ leh anăn yuôm bhăn êdimima hŏng hdră kñăm mdê mdê kơ grăp čô mnuih (Klei Mmuñ Hđăp 139:14). Brei drei djăl pral thâo kral hdră kñăm Khua Yang pioh kơ klei hdĭp drei leh anăn mprăp ai tiê kăp đup gưt čiăng dưi bi leh hdră kñăm anăn tui si Khua Yang atăt gai.
Klei Mmuñ Hđăp 138 ăt jing sa klei duê Mtao Y-Đawit čih mkra čiăng bi êdah ai tiê sĭt kpă klei ñu hdơr knga, luă gŭ leh anăn jing dŏ Khua Yang. ñu mmuñ bi mni kơ klei khăp Khua Yang amâo mâo mlih, kơ jih bruă prŏng prĭn Ñu. Ñu ăt bi mni mơh kơ Khua Yang dôk mbĭt nanao hŏng ñu hlăm jih jang klei truh kơ klei hdĭp ñu, wăt klei Khua Yang kiă kriê răng mgang ñu hŏng klei myang. Hŏng klei anăn, pô čih bi mđĭ ai drei brei nao giăm Khua Yang hŏng klei luă gŭ, hŏng klei đăo amâo mâo mgei leh anăn hŏng jih ai tiê bi mni, mpŭ mni Khua Yang jing Pô Bi Mtlaih drei.
Si ngă drei jih ai tiê bi mni kơ Khua Yang hlăm jih jang klei truh kơ klei hdĭp drei mơ̆?
Wah lač: Ơ Khua Yang, bi mni Khua Yang kyua klei khăp klei pap, klei jăk Khua Yang kơ klei hdĭp kâo. Akâo Khua Yang đru kâo thâo hdơr knga kơ Khua Yang, hŏng jih ai tiê mmuñ bi mni kơ Khua Yang ktuê jih klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
