Hơriso 138:1-8
“Inh hơri bơnê kơ Ih hăm đĭ jơhngơ̆m. Hơri bơnê kơ Ih ‘bơ̆t anăp lu yang.” (Hơriso 138:1)
Nơ̆r jet tơchĕng pơwao:
– Pơtao Đawĭt pơm tơ’bôh jơhngơ̆m bơnê kơ Kră Yang thoi yơ?
– Sư mơn đêl đei tơdrong kiơ lăm chăl arih kiơ̆ Kră Yang?
– Sư pơtrŭt lu bơ̆n hơri ư-ang kơ Kră Yang thoi yơ?
Hơri So 138 jơ̆ nơ̆r pơma pơpôi pơtôm ‘lơ̆ng dêh lăm jơhngơ̆m ‘bĕnh blai tơdrong bơnê đơ̆ng Pơtao Đawit, minh ‘nu bơngai băt mơn kơdih akâu sư gô mơ̆ng kơ Kră Yang. Pơih blung a tơ’bôh kơ sư gô bơnê kơ Kră Yang hăm đĭ jơhngơ̆m băt bơ Nê đơ̆ng sư, păng pơtrŭt hơri ư-ang kơ Kră Yang ‘Bok Kei-Dei hăm đĭ jơhngơ̆m ‘bơ̆t anăp lu yang (tr.1). Sư gơh đei tơdrong kơkuh kơ Kră Yang tơ Hnam ‘lơ̆ng tơpăt Kră Yang ‘Bok Kei-Dei (tr.2), pơm tơ’bôh tơdrong sư pơkăm pơkă hăm Kră Yang hơdrol hloh lăm tôm tơdorong.
Pơtao Đawit đei lơ wơ̆t mơn đêl đei thim jơhngơ̆m pran păng Kră Yang đei tơl tơwih đơ̆ng nơ̆r sư krao khan (tr.3). Yua thoi noh, sư ling-lang băt bơnê kơ Kră Yang păng lui gơnang kơ Sư rai hloh. Lăm đĭ chăl arih pơtao Đawĭt, lu teh đak ayăt đei wang dăr dêh char Isơrael (II Samuel 8:1-10). Mă khan lei ră, sư lui kơ minh năr ayơ noh, lu pơtao lăm teh đak gô băt kơ Kră Yang jơ̆ Tơ’ngla tih hloh păng trŏ kơ lu su kư̆m kơkuh (Êsai 45:23); Hơriso 22:27). Sư hơpơi răp gô ding truh năr noh, kơplah jơhngơ̆m ‘mêm mơnat păng tơdrong ‘lơ̆ng đơ̆ng Kră Yang gô đei hơri bơnê jơ̆p kơ dêh char (tr.4-6).
Nơ̆r Đawit hơri bơnê tơ’blŏk kơ lu bơ̆n ‘blŏk kơ Kră Yang đei kơnhăm ăn kơ rim ‘nu bơngai. Lu bơ̆n oei arih lăm teh đak uh kơ sĭ khan chă pơlăp đĕch ôh mă-lei ‘noh jơ̆ đơ̆ng Kră Yang ăn. Sư đei pơjing lu bơ̆n hăm tơdrong mơsêh krưp păng hlĭch chrơp wă kơnhăm hơđăl nhen kơrim ‘nu bơngai kơchăng wă kơ băt tơdrong kơnhăm Kră Yang lăm chăl arih lu bơ̆n păng đĭ jơhngơ̆m chu yom wă pơm keh tơdrong kơnhăm noh kiơ̆ kơ Kră Yang chông anhăk.
Hơriso 138 ‘noh jơ̆ kơthơ pơtao Đawĭt chih tơpă đơ̆ng lăm jơhngơ̆m na pơm tơ’bôh tơdrong bơnê, iŏk đon ala păng gô mơ̆ng kơ Kră Yang. Sư hơri bơnê kơ tơdrong ‘mêm kơjăp Kră Yang, dôm tơdrong jang tih tin Sư. Sư kư̆m hơri bơnê kơ Kră Yang ling-lang oei hơdai mă khan dôm tơdrong gleh hơnat truh lăm chăl arih sư kư̆m hăm tơdrong mơsêh Kră Yang wei-lăng sư. Đơ̆ng noh, sư pơtrŭt lu bơ̆n athei năm jê̆ Kră Yang hăm jơhngơ̆m iŏk đon ala, đon lui mă kơjăp păng đĭ jơhngơ̆m bơnê, ư-ang kơ Kră Yang, jơ̆ Tơ’ngla dŏng pơklaih lu bơ̆n.
Ơ Kră Yang, inh bơnê kơ Ih gah jơhngơ̆m ‘mêm mơnat, tơdrong Ih pơm ‘lơ̆ng lăm chăl arih inh. Apinh tơgŭm inh băt bơnê kơ Ih, đĭ jơhngơ̆m hơri ư-ang, băt bơnê kơ Ih lăm chăl arih inh. Yua anăn Kră Yang Yêsu Krist, Amen.
Lu bơ̆n hăm đĭ jơhngơ̆m bơnê kơ Kră Yang lăm tơdrong hiôk chơt dah đei tơdrong pơmat tat lăm chăl arih bơ̆n ưh?
Đŏk Sơ̆p Hla ar ‘Bok Kei-Dei lăm pêng sơnăm: Jêrêmi 26
Kênh Youtube BHKTHN:
