Klei Aê Diê Blŭ: Klei Bi Hriêng 25:6-7; Rôm 12:3-8
Êlan kliăng: “Kyuadah hŏng klei pap Aê Diê brei leh kơ kâo, kâo mtrŭt grăp čô hlăm phung diih đăm mĭn kơ ñu pô êgao hnơ̆ng djŏ kơ ñu ôh, ƀiădah brei grăp čô mĭn bi djŏ tui si hnơ̆ng klei đăo Aê Diê brei leh kơ ñu. ” (Rôm 12:3)
Klei êmuh ksiêm mĭn: Ya ngă anak đăm ruăt dôk ôh hlăm anôk phung hing ang? Ya klei tŭ dưn klei luă gŭ brei kơ anak? Si drei yua klei luă gŭ hlăm klei mă bruă kơ Aê Diê?
Mtao Salômôn mâo leh klei mtă klă mngač snăk: đăm dôk ôh hlăm anôk phung hing ang; brei mtao brei klei yuôm bhăn anăn. Tơdah anak čŏng mđĭ pô yuôm bhăn, mđĭ pô ti anăp mtao, anak srăng tŭ klei arăng mtrŭn ti anôk ti gŭ hĭn ti anăp phung hing ang mkăn. Pruê̆ blŭ “đăm dôk ôh hlăm anôk phung hing ang” (Klei Bi Hriêng 25:6) jing klei yuôm bhăn brei anak dôk djŏ anôk pô, đăm brei klei tluh mplư anak mă hĕ anôk phung hing ang hĭn kơ pô. Tơdah anak čŏng dưm pô amâodah lač pô năng hŏng anôk hing ang anăn, anak srăng rŭng răng kơ bruă arăng srăng mdlưh, klei arăng klă sĭt srăng ngă kơ anak. Tơdah arăng mtrŭn anak ti anôk ti gŭ hĭn, arăng dưm hlăm anôk ti gŭ hĭn, anak srăng hêñ hlăm ală pô mkăn kyua anak ngă mgao leh. Bruă ngă “bi mtrŭn ih” jing ngă bi hêñ anak, ngă kơ anak jing ti gŭ hĭn.
Klei luă gŭ srăng đru kơ anak mkhư̆ pô leh anăn ba klei ktưn hưn kơ anak. Tơdah mtao mđĭ anak, anak srăng dưi mŭt hlăm êpul mă bruă kơ mtao hŏng klei ktưn hưn jing pô năng hŏng klei mtao khăp hơiêng. Kyua anăn, jăk hĭn brei anak ruah klei luă gŭ hĭn kơ tŭ klei hêñ.
Klei luă gŭ amâo djŏ knŏng dưi ba yua hlăm dŭm mta bruă hlăm klei hdĭp grăp hruê ôh, ƀiădah ăt dưi hriăm leh anăn ba yua hlăm klei hdĭp mngăt. Yang Mngăt Jăk brei kơ phung ƀuôn sang Ñu klei brei mdê mdê čiăng hrăm mbĭt mă bruă Sang Aê Diê. Hŏng klei Aê Diê brei, grăp čô drei brei jih ai tiê luă gŭ, jih ai tiê ngă jăk bruă Ñu jao.
Khua ƀĭng kna Y-Pôl mtô: “Kyuadah hŏng klei pap Aê Diê brei leh kơ kâo, kâo mtrŭt grăp čô hlăm phung diih đăm mĭn kơ ñu pô êgao hnơ̆ng djŏ kơ ñu ôh, ƀiădah brei grăp čô mĭn bi djŏ tui si hnơ̆ng klei đăo Aê Diê brei leh kơ ñu” (Rôm 12:3).
Lu blư̆ drei čiăng kơ jih jang mnuih mpŭ kơ pô snăn ruăt hưn boh tŭ, klei thâo, amâo mdê ôh hŏng klei dưm pô hlăm anôk yuôm bhăn. Anei jing knuih hdĭp kƀah thâo mĭn, kyua “Klei mnuih mgao srăng mdlưh ñu pô, ƀiădah hlei pô thâo luă gŭ srăng mâo klei arăng mpŭ” (Klei Bi Hriêng 29:23). Akâo kơ Aê Diê đru grăp čô drei dlăng djŏ bruă klam, klei thâo leh anăn klei pap Aê Diê brei, hdĭp luă gŭ čiăng ba klei tŭ dưn jăk hĭn kơ gŏ sang, Phung Sang Aê Diê leh anăn ăt bi guh kơang Anăn Aê Diê ti krah êpul êya.
Drei luă gŭ dlăng pô mkăn năng mpŭ hĭn kơ pô mơ̆?
Wah lač: Ơ Khua Yang, kâo bi mni kơ Ih kyua Ih mtrŭn Ih pô dĭng buăl jing mnuih čiăng bi tui kâo. Akâo kơ Ih đru kâo thâo luă gŭ, jih ai tiê tui duah klei Ih čiăng hlăm djăp mta bruă. Akâo kơ Ih đru kâo dôk djŏ anôk Aê Diê dưm leh anăn ngă jăk bruă Aê Diê jao. Kâo wah lač hlăm Anăn Khua Yang Yêsu Krist , Amen.
Dlăng Klei Aê Diê Blŭ hlăm tlâo thŭn: Y-Yêrêmi 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
