Tơdrong Pơđơ̆k 25:6-7; Rôm 12:3-8
“’Bok Kei-Dei ăn kơ inh pơm jơ̆ng ‘bang Sư wă kơ inh bơtho ăn kơ iĕm tơdrong Sư, Sư wă kơ iĕm huay kơ pơang kơ đe khan iĕm bơngai hơgei hloh kơ bơngai nai. ‘Bok Kei-Dei ăn kơ iĕm hơgei pơm kiơ, gơh jang tơdrong kiơ, iĕm kư̆ kơ jang đĕch kăl kiơ pơang kơ đe.” (Rôm 12:3)
Nơ̆r jet tơchĕng pơwao:
– Yua kơ kiơ ih ‘nĕ kơ hăt hơoei ‘bơ̆t anih gĭt kăl đe ưang?
– Tơdrong iŏk đon ala ba ăn tơdrong đei yua kiơ kơ ih?
– Bơ̆n yua iŏk tơdrong iŏk đon ala thoi yơ lăm tơdrong bơ̆jang kơ Kră Yang?
Pơtao Sôlômôn đei nơ̆r bơtho hơđăl dêh: Ih ‘nĕ kơ hăt dah hơoei ‘bơ̆t anih lu đe ưang; athei mơ̆ng kơ pơtao ăn tơdrong ‘noh. Dah ih khan kơdih ih bơngai đe ưang, roi pơdah ‘bơ̆t anăp pơtao, đe gô tơ jur ih ‘bơ̆t anăp lu đe yŏng pơgơ̆r nai. Nơ̆r “’Nĕ kơ hăt dah hơoei ‘bơ̆t anih gĭt kăl lu đe ưang” (Tơdrong Pơđơ̆k 25:6) wă khan ih athei kăl kơ hơoei ‘bơ̆t anih trŏ kơ ih, ‘nĕ kơ ăn lu tơdrong pơhlŭ ih tơgar anih lu bơngai đe ưang hloh kơ ih. Dah ih dan ih kơdih dah mă khan ih kơdih trŏ kơ hơoei ‘bơ̆t anih đe ưang ‘noh, ih gô hiơ̆k dêh kơ tơdrong đe gô tơ jur lê̆ tơdrong jang ih. Đei bơngai gô pơm tơpă kơ ih tơdrong noh. Kơplah đe tơ jur ih ‘bơ̆t anih kơ đeh hloh đe dan ih ‘bơ̆t anih lŭch hloh, ih gô mơlâu kơ đe yua kơ ih pơang. Tơdrong “tơ jur lê̆ ih” wă khan pơm kơ ih mơlâu, pơm kơ ih jing lŭch hloh.
Tơdrong iŏk đon ala gô tơgŭm kơ ih kĕ ĕnh gơ̆t păng ba ăn tơdrong ư-ang gơh pơgơ̆r. Dah pơtao pôk atŏk tơdrong jang ih, ih gơh mơ̆t hơdai tơ khul lu yŏng pơgơ̆r hăm jơhngơ̆m hiôk hơđơ̆ng lui ngeh ih kơdih trŏ hăm tơdrong mơnat ăn ‘nâu. Kơlih kơ thoi noh, ih athei rơih iŏk tơdrong iŏk đon ala ‘lơ̆ng hloh kơ iŏk tơdrong mơlâu.
Tơdrong iŏk đon ala ưh kơ sĭ gơh yua iŏk tơ dôm tơdrong lăm chăl arih rim năr đĕch ôh, mălei kư̆m kăl kơ hŏk pơhrăm păng yua iŏk tơ gah bơhngol. Yang Bơhngol ‘Lơ̆ng ăn kơ kon pơlei gơh jang Kră Yang păng ăn đĕch tơdrong gơh hơgei phara kơhmă wă kơ wang hơdai hiơ̆k tơdrong jang Kră Yang. Hăm dôm tơdrong Kră Yang ăn rim ‘nu kơ bơ̆n athei đĭ jơhngơ̆m iŏk đon ala, đĭ jơhngơ̆m pơm mă ‘lơ̆ng dôm tơdrong jang Kră Yang pơjao. ‘Bok Pôl bơtho: “’Bok Kei-Dei ăn kơ inh pơm jơ̆ng ‘bang Sư wă kơ inh bơtho ăn kơ iĕm tơdrong Sư, Sư wă kơ iĕm huay kơ pơang kơ đe khan iĕm bơngai hơgei hloh kơ bơngai nai. ‘Bok Kei-Dei ăn kơ iĕm hơgei pơm kiơ, gơh jang tơdrong kiơ, iĕm kư̆ kơ jang đĕch kăl kiơ pơang kơ đe.” (Rôm 12:3)
Phŏ phŏ lu bơ̆n wă kơ đe pơyom kơ bơ̆n lei na hăt kơ pơư đêl bơ̆n jang tơdrong kĕ pran bơ̆n, ưh kơ đei phara kiơ năm hơoei kơdih ‘bơ̆t anih đe ư-ang. ‘Nâu bơih tơdrong arih ưh kơ hlôh wao yua kơ “Bơngai pơang kang rai pơm kơ sư jur; Mă-lei bơngai bu đei iŏk đon ala đe gô pơyom.” (Tơdrong Pơđơ̆k 29:23). Apinh Kră Yang ăn kơ rim lu bơ̆n băt kơnăl trŏ kơ anih jang, tơdrong kĕ pơm păng tơdrong Kră Yang mơnat ăn, arih iŏk đon ala wă kơ đei yua ‘lơ̆ng kơ hnam dơnŏ, khul bơngai lui păng kư̆m pơm hơdah anăn Kră Yang tŏk bŏk kon pơlei pơla.
Ơ Kră Yang, kơkuh kơ Ih, inh bơnê kơ Ih yua kơ Ih tơ jur Ih kơdih jing kon bơngai jing đĭch đam wă dŏng pơklaih inh. Apinh Ih tơgŭm inh arih băt iŏk đon ala, đĭ jơhngơ̆m chă Kră Yang lăm tôm tơdrong. Apinh Kră Yang tơgŭm inh dơ̆ng mă trŏ ‘bơ̆t anih mă Ih dan păng pơm kiơ̆ tôm tơdrong Ih pơjao. Yua anăn Kră Yang Yêsu Krist, Amen.
Bơ̆n hăm wă iŏk đon ala lăng đe nai gĭt ưang hloh kơ bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 14
Kênh Youtube BHKTHN:
https://www.youtube.com/c/bhkthn
